MARKA 7 - PATHIAN LEKHABU THIANGTHO (BSI)

Upate Thugosia ah Kipat Thuhilna

¹ Pharisaite leh lekhazikte khen khat Jerusalem ah kipat a kiang in a hung un,

² a nungzuite lak ah khenkhat in khut thiang lo ah; zia chu khut sawp lo ah, ti’na ahi’n, an a nêk uh a hung muu a.

³ (Pharisaite leh Judate zosia hin upate thugosia a zui ziak un, khut sawp lo in an a ne ngai puau in;

⁴ kaithial ah thil kizuak him himle sawp lo in a ne ngai puau hi; zia gual chun thil chan ding a hau ma mau a, no sawp ding, bêl sawp ding, kuang sawp ding leh ûm leh bêlte sawp ding tite haw hi.)

⁵ Tichun, Pharisaite leh lekhazikte chun, “Bang ding ah la nungzuite hin upate thugosia gual lo tak ah khut sawp lo ah an ne ziang a hiu em?” ti’n a hung dong un.

⁶ Ama chun a kiang un, “Nanghaw miphalêmte haw, Isai in la chungthuu a la gen hi a dik ngut hilam: Zia mite hin a kam un ei chawihoi un, a lungthim un vang ei gamlat ma mau hi.

⁷ Mihing thupiakte chu thugin gual in a zilsak un, ei biaknau chu a thawn mai ahi, ti a zik gual khan,” a tia.

⁸ Pathian thupiakte chu ngaisak lo in, mihing thugosia chu la zui ui, a tia.

⁹ Chuleh, a kiang un, “Nangmau thupiakte chu la zuitheina ding un, Pathian thupiakte chu la paitha sik sek ui!

¹⁰ Mosi chun, la nu leh pa ja in, kuale a nu leh pa hosia chu thi mai hen, a ti’n;

¹¹ himaleh, nang uh chun, kua’nle a nu a hem, a pa a hem kiang ah, lei matna ding chu Korban ti leh, (zia chu, Pathian kiang ah piakdaw, ti’na ahi,)

¹² a nu â ding a hem, a pa â ding a hem in bangma a bawl piak la phal ngai ta puau in,

¹³ nangmau thugosia ziak ah chun, Pathian thupiak chu bangmalo in la koi un; zia gual chun thil tam tak la hitau hi,” a tia.

¹⁴ Ziazaw chun mipite chu a ko khawm kit ah, a kiang un, “La leng un ka thugen hi ngai phau inla, hethiam tau in;

¹⁵ pawlam ah kipat mihing sung ah lutte hin kuama a subuak pua hen, mihing ah kipat hung pawtte chun mi chu a subuak zaw sek ahi.

¹⁶ Kuale hetna ding ah nakhang nei chun he tau hen,” a tia.

¹⁷ Mipi lak ah kipat a pawt daw phatin, In sung in a lut ah; a nungzuite chun a tekhinthu umzia chu a dong ua.

¹⁸ Ama chun a kiang un, “Nang unle hethiam nailo la hiu maw? Paw lam ah kipat mihing sung ah lutte chun ama chu a subuak thei puai, ti helo la hiu em?

¹⁹ A lunggil sung khoi lo in, a gilpi sung ah lut ahi ziakin, a hung pawt theng mai sek hilo a hem?” a tia. (Zia chu an zosia a thiang hi ti a genna ahi.)

²⁰ Ama ma chun, “Mihing sung ah kipat hung pawt chun mi a subuak zaw sek hi.

²¹ Mihing lunggil ah kipat chun ngaituana phalo: Ângkawmnate, gûkchâknate, tualthanate,

²² thanhuainate, du-âmnate, phatlonate, mithep nopnate, huknate, kisaktheinate, mi demsiat nopnate, ngolnate haw hi a hung pawt sek hi.

²³ Zia tawhbang thil phalote hi sunglam ah kipat hung pawt in, mihing chu a subuak sek hi,” a tia.

Grik Numei Ginna

²⁴ Zia tak ah kipat chun a pawtdok a, Tura leh Sidon bial sung lam ah chun a chia ah, In khat ah a lut ah, kuama kihiatsak a nuam pua’n; himaleh, a kisêl thei diak ta puai.

²⁵ Numei pakhat, a chanu naupang neucha thitha buak vop chun a chanchin a hun he, a kiang in a hung ah, a kengbul ah chun a hung bokkhup a.

²⁶ Numei chu Jentel mi a hia, pianna lam ah chun Sirophoiniki mi ahi. Ama chun a chanu sung ah kipat thitha buak nawdok dingin a hung don a.

²⁷ Himaleh, Jesu’n, “Naupangte chu hung vâ masau hen, chate vaithum lâkpiak ah, uichate piak chu a kilawm puai,” a tia.

²⁸ Amanu chun a kiang in, “Lalpa, hi’ vang a hinai, ahi’n la, uichate’nle naupangte khachenên dawkân nuai ah um chu a ne sek uh hilam,” a tia.

²⁹ Ziaphatchun, Jesu’n a kiang in, “La thu gen ziak ah chun, chia ta’n, la chanu sung ah kipat chun thitha buak a pawt tai,” a tia.

³⁰ Tichun, In lam in a chia ta’n, a chanu thitha buak in a nutsia sa, lupna lum chu a vamu tai.

Bengngong Sukdamna

³¹ Tura gam chu hun pawtsan in, Sidon lampi haw ah, Dekapolis bial hun haw malam pek in, Galili Dil chu a hung tung kit ta’n.

³² Zia tak ah chun a kiang in, mi pakhat bengngong, pau kichian theilo a hun pui un; a chung ah khut nga dingin a don un.

³³ Ama chu mipi lak ah kipat chun a puidok chuam ah, a bilhawmte ah chun a khutzung a thun ah, a chil a sek ah, a lei le a vak khoi piak a;

³⁴ van lam a en ah, a hung khuaisa, “Ephphatha,” a hun tia, zia chu, “Hung kihong in,” ti’na ahi.

³⁵ Tichun, thakhat in a nakhang chu a hung kihong ah, a lei chu a hung tawi thei ah, kichian tak in a hung pauthei tai.

³⁶ Zia thu chu kuama gen lo dingin thu a pia; himaleh, a ha-khap po leh nasa zaw diak in a tângkopiu a;

³⁷ “Ama chun bangkim a bawlpha tai; bengngongte khua a hetsak a, pautheilote le a pausak hi,” ti’n lamdang a sa ma mau hi.