MARKA 4 - PATHIAN LEKHABU THIANGTHO (BSI)

Buchi The’ Tekhinthu

¹ Dil pâm ah thu a hun gen pan kit a. Mipi tam tak a hung khawm un, kuang sung ah a lut ah, a kichu, mipite zosia chu se’pho ah chun a um un.

² Amau chu tekhinthu’n thu tam tak a hil ah, a thuhil chu:

³ “Ngai un, buchithe’pa buchi the’ in a kuan in;

⁴ a the’ lai in, a khenkhat chu lam pâm in a ketha, chunglêng vachate a hung ua, a hung luak zo tau a.

⁵ Khenkhat chu lei patna, suangsi lei lak in a ketha, a lei asâ lo ziak in chomlo kâl in a hung kekdok a.

⁶ Nisa a hung sâng ah, a hun kâk leh, zung a thâk lo ziakin a vuai pai tai.

⁷ Chuleh, khenkhat chu hampa lingnei lak in a ketha, hampa lingneite chu a hung khang ua, a hun dêp ua, ga him him suang lo in a um tau a.

⁸ A dang khenkhatte chu lei phatna’n a kethau ah, a hung kek un, ga a hun suau ah, ale’ sawmthumte, ale’ sawmgukte leh ale’ zakhatte’n a hung ga tai,” a tia.

⁹ A kiang un, “Kuale hetna ding ah nakhang nei chun he tau hen,” a tia.

Tekhinthu Thiltup

¹⁰ Chun, ama ngawn ah a um na’n a nungzuite leh a kiang ua umte chun, zia tekhinthu umzia chu a dong tau a.

¹¹ Ama’n a kiang un, “Pathian gam thugûk chu nang uh het ding ah phal a hi; pawlam ah umte â ding chun vang tekhinthu bep ah kigen ahi;

¹² achutiloleh, ‘En maleu, a muchian lona ding un; bil in he maleu, a het thiam lona ding un; achutiloleh, hung kihei kit intiu in, ngaidam hi kha’n au,’ ” a tia.

Buchi The’pa Tekhinthu Hilchianna

¹³ Chun, a kiang un, “Nang unle zia tekhinthu kha hechian theilo la hiu em? Zia kha la het lo ua leh bangti’n tekhinthu dang zosia he thei ding la hiu em?

¹⁴ Buchithe’pa chun thu chu a the’ hi.

¹⁵ Lam pâm ah kethate chu ziate hi a hiu: Thu chu amau ah the’ in a um ah; himaleh, thu chu a het phat uh leh Setan chu kin tak in a hung ah, a lung sung ua thu kithe’ chu a hung lâkmang piak ta sek hi.

¹⁶ Chun, suangsi lei lak ah kethate chu zia gual hi a hiu: Thu chu a het ua leh kipak tak in a pom pai un;

¹⁷ himaleh, amau ah chun zung him him a um pua’n, hun chomcha thuak zo in, zia nung chuleh, thu ziak ah sukgentheina leh engbawlnate a hung um phat leh a pûk ta sek uh ahi.

¹⁸ Chuleh, hampa lingnei lak ah kethate chu ziate hi a hiu: Thu chu a hiau a;

¹⁹ himaleh, khawvel ngainatnate, hausak nopnate, thepnate leh thil dang dang ah nopnate a hung lut phat leh ga sua zo lo in a um ta sek ui.

²⁰ Chuleh, lei phatna kethate chu ziate hi a hiu: Thu chu a het tak ua leh pom ngal in, a ga hun suau ah, ale’ sawmthum, ale’ sawmguk leh ale’ za khat ah hung pungte chu a hiu,” a tia.

Law Nuai ah Thaumei

²¹ Chun, a kiang un, “Thaumei hi min law nuai a hem, jalkhun nuai a hem ah koi ah, a tunna tung lo dingin a vâk sek ua a hem?

²² Phuanlat lo ding ah sêlgûk bangma a um pawngal in; lang lo ding ah îpguk le bangma a um diak puai.

²³ Kuale hetna ding ah nakhang nei chun he tau hen,” a tia.

²⁴ Chun, zia hile a gen kit a, “La thil hiatteu ah hin pilvâng tak in um un; nangmau te’na ngai ma ah te’piak in um ding la hiu; kipiak be ding bawn la hi nalai ui.

²⁵ A neite chu piak be hi’ntin; a neilote chu a neisun uh le lâkpiak hiding a hiu,” a tia.

Thâichi Khandan Tekhinthu

²⁶ Zia hile a gen a: “Pathian gam chu mi pakhat in lei ah thâichi tu’ hen la;

²⁷ jan ah ipmu’n, sun phat leh tho hen la, thâichi chu a jia het lo in a la kek in, a la khang ta leh, zia gual chu ahi.

²⁸ Lei chun ga a hun sua sek a; a lim in a kung, chuleh a vui, ziazaw chuleh a vui ah a ga chu.

²⁹ Himaleh, zia a ga chu a hung min tak leh bulâk a hun tâk ziakin, kawite a hun pan pai sek tai,” a tia.

Ankam Mu Tekhinthu

³⁰ Zia gual hin a gen kit a, “Pathian gam chu banggual in ka tekhin diam? Ahiloleh, bang tekhinthu mang leu hin I genchian thei diam uh?

³¹ Ankam mu changkhat lei ah kithe’ gual ahi, lei ah thâichi zosia sâng in neupen maleh,

³² a hung kithe’ a, a kekdok in, thâichite lak lak ah a lianpen a hung suak ah, a bâk lian tak tak a hung um ah, chunglêng vachate chu a buk ah a giak thei sek uh tawhbang hi ahi,” a tia.

Tekhinthu A Matna Chu

³³ Zia gual tekhinthu tam tak chu mang in, a hetthei ding lam lam un a kiang un a gen sek a.

³⁴ Tekhinthu lo in a kiang un thu a gen ngai puai; amau ngawn ahi tak ua leh, vang a nungzuite kiang in a hilchian sek hi.

Jesu’n Thigawpi A Vau Thipna

³⁵ Zia ni ma ah chun, nitâk lam ahi in a nungzuite kiang in, “Gâl langkhat lam ah kâi hitiu,” a tia.

³⁶ Mipi chu nusia’n, ama le kuang sung ah amau lak ah um in a chiapiu ah, kuangneu dang le a kiang un a um a.

³⁷ Thigua hat tak in a hung hâng ah, tui kinawkte chun kuang chu a sep vut vut ah, tum ding a kisa ziang tai.

³⁸ Ama chu khapchâk khap in kuang mei lam ah a la ipmu. A kaitho un, a kiang in, “Hotupa, ka manthai diu hi khawksa lo la hem?” a tiu a.

³⁹ Ama chu a hung tho ah, thigua chu a vau a, Dil kiang ah chunle, “Thip inla um hiat hiat in,” a tia. Tichun, thigua chu a hâi ah, a thip dîl dêl tai.

⁴⁰ Chuleh, a kiang ua chun, “Bangatia, chuti lawm lawm ah lau ziang la hiu em? Ginna la nei zo ma ma lo uh ahi maw?” a tia.

⁴¹ A lungkham ma mau a, “Zia pa hi bang gual mi a hita bep diam! Thigua leh Dil nasan inle a thu a awi uh hi?” a tiu a.