MARKA 3 - PATHIAN LEKHABU THIANGTHO (BSI)

Mi Khutzengpa Chu

¹ Ama chu sunagog ah a lut kit a; zia tak ah chun mi pakhat khutzeng a um a.

² Ama chu a hêktheina ding un sabbath ni’ a hi’dam leh hi’dam lo a la en zing ua.

³ Zia khut zeng kiang ah chun, “Ei hun nai in,” a tia.

⁴ Chuleh, amau haw kiang ah chun, “Aleh, sabbath ni’ hin sukphat a thiang em, suksiat? Hukhin a thiang em thalup?” a tia. Himaleh amau chu a thip chil chel ua.

⁵ Ziaphat chun lungna tak kawm in amau chu a en vêl ah, a lung tâk ziak un a lungna ma ma a; zia pa kiang ah chun, “La khut hun zâk in,” a tia; ama chunle a hun zâkdok phut ah, a khut chu a dam ngal tai.

⁶ Pharisaite chu a pawtdok ua, ama a tha theina ding dan uh ngaitua in, Herod pawl ah mite tawh a vakiho-khawm tau a.

Tuipi Pâm ah Mipi

⁷ Jesu chu a nungzuite tawh Dil lam in a chia mang tau a; zia lam ah chunle Galili gam ah kipat mipi hungte chun a hunzui pek un.

⁸ Thil lopi tak tak a bawl a hun het tâk ziak un, Jerusalem ah kipat, Idumia leh Jordan gâl lam ah kipat, Tura leh Sidon tuam ah mite tawh, mi tam tak a kiang in a hung khawm tau a.

⁹ Mipi chu a hung tam ziak un, a sukbuai lona ding un a nungzuite chu kuangneu pakhat ngaituasa koi dingin a hil a.

¹⁰ Mi tam tak a sukdam ziakin, damlo haw chu a hung kikhawm sau sau tau a; ama khoi khâk dingin, a hung khawm tau a.

¹¹ Thitha buakte chun ama a mu phât ua leh, a ma-âng in a bokkhup un, “Nang Pathian Chapa chu la hi,” ti’n a kiko sek un.

¹² Himaleh, a chanchin chu genjak lo dingin khau tak in thu a pechiat tai.

Sawm leh Nite Teldawna

¹³ Ama chu tâng lam in a kãl to ah, a mi têlte chu a kiang lam in a ko chuam a; amau chu a kiang in a hung ua.

¹⁴ A kiang ah um ding leh thu gen ah a sawl dingin nungzui sawm leh ni’te chu a guat a,

¹⁵ natnate sukdam theina leh thithate nawdaw theina thuneina a pia’;

¹⁶ a nungzui a têl sawm leh ni’te chu: Simon, (ama’n Peter a sak;)

¹⁷ Zebedai chapa Jakob tawh, Jakob suapi Johan, (Bonarjis a sak, zia chu, “Van-gi Chate,” ti’na ahi’n,) kiti tawh,

¹⁸ Andria, Philip, Bartholomai, Matthai, Thoma, Alphâi chapa Jakob leh Thaddai tawh, Kanaan mi Simon tawh,

¹⁹ a matsak dingpa Juda Iskariot tawh a hiu a; In pakhat ah a lut ua.

Belzebul ahi A Ti’nau

²⁰ Zia tak ah chun mipi a hung kikhawm kit tau a, an nangawnle a ne man ta puau hi.

²¹ Mipite chun, “A ngol ahi tai,” a tiu ah a suapite’n a het phat un, a thotâng dingin a chia tau hi.

²² Jerusalem lam ah kipat lekhazik hungte chun, “Belzebul tawh a kijawl un, thithate hotu a hiziak ah thithate nawdok ahi chu,” a tiu a.

²³ Amau chu ko khawm in a kiang un, tekhinthu’n a gen a: “Setan in Setan ma bangti’n nawdok thei ding a hem?

²⁴ Gam pakhat chu amau leh amau kido leu, zia gam chu dingdok thei pua’n tin;

²⁵ chuleh, Inkuan khatle amau leh amau kido leu dingdok thei pua’n au.

²⁶ Setan le ama leh ama kido ah, a kilan chun dingdok thei pua’n tin, himaleh, mangthai zaw ding ahi; chutichun, a hun tawpna a hung tung tai.

²⁷ Mihat chu min a kân masak zet lo ua leh kuama’n a In bulu in, van ladok thei pua’n au; a kân zaw tak ua leh a chom thei bep ui,” a tia.

²⁸ Titakzet in ka hil la hiu, mihingte hi a gitlonau leh a Pathian gensiatnau ngaidam thei sik sek ahi;

²⁹ himaleh, Thagau Thiangtho gensia chu ngaidam thei hipua’n tin, kumtuang thiamlo channa lau um tak in a um zawi, a tia.

³⁰ “Thitha buak vop ahi,” a ti ziak un zia cheng chu a gen ahi.

Jesu Inkuanpi Tak Tak te Chu

³¹ Zia tak ah chun Jesu nu leh a suapite chu a hung ua, In mai ah a hung ding un, a ko dingin mi a sawl ua.

³² Mipi a kiang ah kichute chun a kiang in, “La nu leh la suapite’n In mai lam ah sawn a hun hawl ui,” a tiu a.

³³ Ama’n a dawnhu a, “Ka nu leh ka suapite chu kuate a hiu em?” a tia.

³⁴ Tichun, a kiang ah kichute chu a en vêl a, “En un, ka nu leh ka suapite hi!

³⁵ Kuale Pathian lung lam bawl tapo chu, ka suapipa, ka suapinu leh ka nu ahi,” a tia.