MARKA 15 - PATHIAN LEKHABU THIANGTHO (BSI)

Pilat Ma ah Jesu Dinna

¹ Jingkal phatin, thiampu lalte chun lekhazikte, upate leh vaihawm pawlte zosia tawh a kikokhawm tau a. Jesu chu kânsa’n a pui ua Pilat kiang in a pedok ngal tau a.

² Pilat chun, “Nang hi Judate Lengpa chu la hi em?” ti’n a dong a. Ama chun, “Ahi lei ti hilo a hem,” a tia.

³ Thiampu lalte chun thil tam tak in a hun hêk tau a.

⁴ Pilat in a dong kit a, “Bangma dawnhuna ding helo la hem? En tiam in a hun hêknau zozai hi,” a tia.

⁵ Jesu’n vang bangma’n a dawnhu pua’n; Pilat chun mak a sa ma ma hi.

Pilat in Jesu Khetden Ding ah Pedok

⁶ Kût ni leh suangkul tângte lak ah a dot pen pen uh pakhat a thâdaw sek ahi’n.

⁷ Suangkul ngâkte lak ah midang pakhat, a min Barabba a tiu chu, helpawl ah pang, a mi tha ziak ah tâng a la um a.

⁸ Mipi chu a hung ua, a hi’dan ngai gual ah hi’kit dingin a hung don un.

⁹ Pilat chun a kiang un, “Aleh, Judate Lengpa hi hun thâdaw piak leng la nuam awm?” a tia.

¹⁰ Mitthipna ziak ah thiampu lalte’n a mat uh ahi ti a he ngal a.

¹¹ Himaleh, thiampu lalte chun mipite chu Barabba thâdawsak dingin a tîlsiau a.

¹² Pilat in a kiang un, “Aleh, Judate Lengpa la tiu hi bang ka law diam?” a tia.

¹³ Amau haw chu a hung kiko ua, “Kros ah khenden in,” a tiu a.

¹⁴ Ziaphatchun, Pilat in, “Bangatia hem? Bang a hi’khial ah a hem?” a tia. Amau chu a khawk zaw diak in a hung kiko ua, “Ama chu kros ah khenden in,” a tiu a.

¹⁵ Pilat chun mipi suklungawi a nuam a; tichun, Barabba chu a thâdok ah, Jesu chu a jep ah, khetden dingin a pedok tai.

Sepaite’n Jesu A Tawtbawlna A Matnau

¹⁶ Sepaite chun Lengpa huang sung ah pui lût in (zia chu gam-ukpa chênna chu ahi;) sepai pawl zosiate chu a ko khawm tau a.

¹⁷ Tichun, puan sandup a silsak ua, linglukhuk a phêk ua, a khuksak un:

¹⁸ “Chibai! Judate Lengpa,” a tiu a, chibai a bûk tau a.

¹⁹ Chuleh, a luchang chu luangkang in a vuau ah, a chil uh a sekkhum un; khiangkho in chibai a bûk tau hi.

²⁰ Chuleh, tawtbawlna a matzaw phat un, puan sandup chu a lipthau ah, ama puan a silsak kit ua, kros ah khetden dingin a pui tau hi.

Jesu Kros ah Khetdenna

²¹ Kurini khua hung kipan, Rufa leh Alexanderte pa, Simon chu lampi chia lai a tuak khau ah, ama chu a man ua, kros chu a putsak tau a.

²² Jesu chu Golgotha mun ah chun a pui tung tau a, zia chu Lugu mun ti’na ahi.

²³ Chuleh, a dawn dingin uain, murra tawh kihel a piau a; himaleh, ama chun a dawn nuam puai.

²⁴ Ama a khetden phat un, a puante chu a chan ding uh hetna dingin âisân in, a kihawm un.

²⁵ Ama a khetden hun uh chu jingkal lam dak kua ahi.

²⁶ A chung ah chun ama a hêknau lekha a tâk un, “Judate Lengpa” ti in.

²⁷ A kiang in gucha pani, a changlam ah pakhat, a veilam ah pakhat a khenden un.

²⁸ “Ama chu mi nunsiate lak in sim in a um hi,” ti Pathian lekha thu kha a guitung tai.

²⁹ Zia tak hun haw khate chun a luu a sukkhum un, “E hei, nang tempul susia, ni thum sung ah sa zo pa,

³⁰ nang leh nang kihukdam inla, kros ah kipat chun hung kumtha ziang ta’n la,” a tiu a.

³¹ Zia gual ma chun thiampu lalte leh lekhazikte chunle tawtbawlna mang in, “Midang bawn hukdam ah, ama leh ama kihukdam theilo.

³² Israelte Lengpa Messiah chu ka het ua, ka gintheina ding un, kros ah kipat chun hung kum ziang ta’n la,” a tiu a. A kiang ah kikhendente chunle a engho tau a.

Jesu Thina

³³ Sûnkim ah kipat in nitâk lam dak thum tiang gam pumpi a hung thim ta’n.

³⁴ Nitâk lam dak thum ah chun Jesu chu aw ngai tak in a hung kiko a, “Eloi, Eloi, lema sabakhthani?” a hun tia. Zia chu, “Ka Pathian, ka Pathian, bangatia ei nusia la hem?” ti’na ahi.

³⁵ A kiang ah dingte lak ah khen khat in a la het un, “Ngai tiam un, Elijah a ko hi,” a tiu a.

³⁶ A lak ua mi pakhat a vatai ah, thilpân khat uain thûk ah dia dim in, mol khat in a tâk ah, a dawnsak a, “Hiti hin um hen, ama latha dingin Elijah a hung em a la en hitiu,” a tia.

³⁷ Chuleh, Jesu chu aw ngai tak in a kiko a, a thagau a tha tai.

³⁸ Tempul ah puanjak chu a chung lam ah kipat in a nuai lam tiang in a hung kithêk a.

³⁹ A majawn ah sepai zahotu ding zing chun zia gual ah a thagau a tha chu a mu in, “Ziapa hivâng Pathian Chapa ahi tak tak hi,” a tia.

⁴⁰ Gamla tak ah kipat a la thîl zingte lak in numeite le a pang un; ziate lak ah chun Mari Makdalin tawh, Jakob neuzaw leh Josia nu Mari leh Salome le a hiu hi.

⁴¹ Amau haw hin Galili gam ah a lênlai ah khan a la zui in, a na a la sep piak sek a hiu a; chuleh, numei dang Jerusalem chan ah hunzui pawlte le tam tak a hung pang chiat ui.

Jesu Vuina

⁴² Nitâk lam a hung hi in, Kisaklawk ni, zia chu Sabbath ni masang ahiziak in,

⁴³ Arimathia khua vaihawmte lak ah pang milian ja um tak khat, Joseph chu a hung ah, ama chu Pathian gam hung tun ding ngakla ah um zing sek ahi’n; hangsan tak in a hung ah, Pilat kiang in a valut a, Jesu luang chu a vadon a.

⁴⁴ Pilat chun a thipai ziang chu mak a sa ma ma a; sepai zahotu chu a ko ah, a thina chu a sawt ta em ti a dong a.

⁴⁵ Sepai zahotu kam ah kipat a thimin tai ti a het phat in, a luang chu Joseph kiang in a pedok tai.

⁴⁶ Joseph chun puan malngat a chaw, a luang chu a la tha’n, puan malngat chun a tuam a, thân pakhat, suang kikhuak kuak in a sial ta’n, zia thânkot ah chun suang pakhat a lîk lut a.

⁴⁷ Chun, Mari Makdalin leh Josia nu Mari khanle a sialna mun chu a muu hi.