MARKA 13 - PATHIAN LEKHABU THIANGTHO (BSI)

Tempul Siat Ding Thu Genlawkna

¹ Tempul ah kipat a hung pawtdawu chun, a nungzuite lak ah pakhat chun a kiang in, “Hotupa, entia, a suangte leh a In hi a lopi sam e!” a tia.

² Jesu’n a dawnhu, a kiang in, “Zia In lopi tak hi la muu maw? Zia tak ah suang kithuate hi sukchip lo in pakhat chale nutsia in um pua’n tin, a leng un kaichip sik sek hiding ahi,” a tia.

³ Chun, Oliv tâng ah tempul lam nga a kichut lai un, Peter, Jakob, Johan tawh Andria chun a kiang in:

⁴ “Zia chu bangtik leh a hung tung diam? Ziate hung tunna ding tepte’na chu bang a hem ei hil in,” ti’n a chuam in a dong un.

⁵ Jesu’n a kiang un, “Kuama’n a hun pui mang zaw lona ding un chingthei tak in um un.

⁶ Mi tam tak ka min in hung intiu in, ‘Ama chu ka hi,’ ti’n mi tam tak hun pui mang in au.

⁷ Kido thu leh kido thuthangte la het tak ua leh lungkham kiu in; zia chu a hung tung ding him ahi; ahi’n, a tawpna chu hinai tadi pua’n a.

⁸ Nam chuam leh nam chuam kido intiu in; gam chuam leh gam chuam kido intiu in; mun chuam chuam in lîn kilîng intin; kial hung tung in a. Zia chu nauvei kipatna ahi,” a tia.

Sukgentheina Ding Genlawkna

⁹ Himaleh, nanghaw vang chingthei tak in um un; vaihawmte hun mat sak intiu in, sunagog ah hun vua’n tin uh; keima ziakin vaihawmte leh lengte ma ah, amau hiatsakna dingin pui in um in lau.

¹⁰ Chun, chanchinpha hi nam zosia kiang ah gen suak hi masa ding ahi.

¹¹ Ahi’n, mat leh piakdaw ah la um tak ua leh le, la gen ding uh chu ngaitua lawk diak kiu inla, la lungthim unle gêl masa kiu in; a hun tak ah la kiang ua hiatsak ah um chu gen mai un; nangmau ah kipat pawt la gen ding uh a hipua’n, Thagau Thiangtho in a hun hiatsak ding a hizaw ngal a.

¹² Zia tak chuleh, mi pakhat chun a suapi chu tha dingin hun matsak in tin, Pa chunle a chapa, chate’nle a nu leh pateu do dingin kipan intiu in, a thina ding uh le hun ngaitua in au.

¹³ Keima min ziakin mi zosia muda hi’n lau; himaleh, a tawp tiang ah thuakzote chu hukhin in um in au.

Kithoina Hi’buakpa

¹⁴ Hi’buaksekpa chu a din lona ding ah ding la mu tak ua leh, (a sim kha zosia’n a umzia hechiat mai uh hen!) Judea gam ah umte chu tânggam ah jam mang mai uh hen la;

¹⁵ Inchung ah um chule a In sung lam in kum suk ki’hen, In sung ah a thil vala dinginle lut diak ki’hen;

¹⁶ lou ah um le In lam ah puan la dingin tai ki’hen.

¹⁷ Zia hun ah nauvop lai leh nau nawichep lai neite chu a chung uh a gik hi!

¹⁸ Zia la jamna ding uh chu phalbi lai a hilona dingin pauchap un.

¹⁹ Zia hun tung ding ah gentheina chu, zia gual ah huaisia him him chu Pathian thilsiam tîl ah kipat tu’hun tiang ah le um kha nai lo a hi’n, a nung inle um kit ta ngai lo ding ahi.

²⁰ Lalpa‘n zia hun chu hi’chom lo vang leh, mihing him him dam in suakcha pua’n au; himaleh, ama’n a têldawte ziakin a hun chu a sukchom ahi.

²¹ Zia hun tak chuleh min la kiang un, “En tia, zia hin Messiah chu a um hi!” a hem, “Zia son a um hi!” a hem tileule taksang kiu in.

²² Messiah lêmte leh jawlnei lêmte chu hung um intiu in, tepte’na leh thilmak lamdang tak tak hun mu sak intiu in, thei vang leh teldawte natiangle thep zaw gaw ding a hiu.

²³ Nang uh vang pilvâng tak in um un, bangkim ka hun hil lawk la hiu hi.

Mihing Chapa Hungna Ding

²⁴ Himaleh, zia buaina huaisia tak chu a hung tun zaw tak leh, Nisa hung thim intin, thapi le vâk ta pua’n tin;

²⁵ van ah kipat in aksite hung kia’n tin, van ah thil hi’theinate chu hung kilîng in a.

²⁶ Ziaphat chuleh Mihing Chapa hi a lopina tawh, thilhitheina thupi tak tawh, sûm chung ah khin hung suk in a.

²⁷ Ziatak chuleh a vansawlchâkte hun sawl intin, a mi têlte kawl kil li sung ah umte chu lei langkhat ah kipat in van tawp tiang in hun lakhawm in a.

Theichang Kung ah Zillai

²⁸ Theichang kung ah kipat hin tekhinthu zil un; a bâkte a hung sel ah, a duate a hung um pat tak leh nipi a nai tai ti la he sek ui.

²⁹ Zia gual ma chun, nang unle zia tawhbang chu a hung tun la mu tak ua leh, ama chu a hung nai ta hen kotbul in a um tai ti hiau in.

³⁰ Titakzet in ka hil la hiu, zia thilte chu a tunkim ma sia, zia khangthakte hi bei pua’n a.

³¹ Lei leh van mangthai intin, ka thu ahileh vang mangthai pua’n a.

Kigin Zing A Kûlna

³² Himaleh, a ni leh a hun ding chu kuama’n a hepuai, vansawlchâkte’n le, Mihing chapa’n le a hepuai, Pa bep in a het ahi.

³³ Ziaziakchun, chingthei tak leh pilvâng tak in um zing un; a hun ding kuama’n la hepaw ngal un.

³⁴ Mihing Chapa hi, khual gamla tak ah mi pakhat zindok gual chu ahi; zia pa chun a In a nutsia ding kuan in, a suakte kiang in thuneina a pia’n, a sep ding uh a pechiat ah, kotkhak vêngpa le ginum tak ah la vêng dingin thu a piai.

³⁵ Ziaziakchun, kiging zing in um un, Inneipa hung ding hun chu nitâk a hem, jankhang a hem, âk khuan a hem, jingkal a hem la hepaw ngal un;

³⁶ thakhat in hung thut intin, la i-mut lai hung sikha kha’n a.

³⁷ La kiang ua ka gen hi mi zosia kiang ah ka gen ahi: Kiging zing tau in, a tia.