LUKA 8 - PATHIAN LEKHABU THIANGTHO (BSI)

Jesu Nungzui ah Pang Numeite

¹ Zia nung ah chun khawlian leh khawneu haw chu a fang pek ah, Pathian gam chanchinpha chu gen in, a tâklang pek ah. Sawm leh ni’te chun ama a zui un;

² numei khenkhat, a natna a sukdam piak leh a sung ah thitha a nawdaw piakte, a sung ah thitha sagi a nawdaw piak Mari Makdalin kiti kha tawh,

³ Herod sepkolpa Chuza ji Joanna tawh, Susanna tawh, midang tam tak tawh le a hiu a, amau haw chun a thil neiteu ah kipat in ama â ding a bawl piak tau a.

Buchi The’ Tekhinthu

⁴ Khawtin ah kipat mipi tam tak a hung khawm phat un, a kiang un tekhinthu’n thu a hil a:

⁵ “Buchi the’ pakhat buchi the’ dingin a kuan ah; a the’ leh, a khen khat lamgei in a ketha, chot lumlet in a um a, chunglêng vachate’n a hung luak nâm tau a.

⁶ A khenkhat chu suangteu chung in a ketha, a hung kek sâm a; himaleh, a lei nawm bangma a umlo ziakin a keugawp kit pai tai.

⁷ Chuleh, a khenkhat chu hampa lingnei lak in a ketha; hampa lingneite chu tawh a kek khawm un, a hun dêp mang kit tai.

⁸ A dang khenkhatte chu lei phatna’n a kiau ah, a hung kek un, ga a hun suau ah, ale’ zakhatte’n a hung pung tai,” a tia. Zia sia chu a gen zaw phatin a hung kiko ah, “Kuale hetna ding nakhang nei chun he tau hen!” a tia.

Tekhinthu Thiltup

⁹ A nungzuite chun zia tekhinthu chu bang a genna a hem, ti a dong tau a.

¹⁰ Ama chun, nanghaw â ding ah Pathian gam thugûk chu het ding phal ahi’n; midangte â dingin vang tekhinthu ah gen ahi: Mu zing ngal ah, a mulo ua, hezing ngal ah, a hiatthiam lona ding un, ti in.

Tekhinthu Hilchetna

¹¹ A kiang un zia gual hin a gen a: Tekhinthu chu zia hi ahi: Buchi chu Pathian thu ahi.

¹² Lamgei ah kethate kha, thu chu a het phat ua leh diabol chu a hung ah, a gin ua hukdam ahi lona ding un a lunggil ua kipat thu chu a lamang ta sek hi.

¹³ Chuleh, suangteu chung ah kethate chu ziate hi a hiu: Thu a het ua kipak tak ah pom ngal ziang; himaleh, zung him him a nei puau ah, sawt lo sung bep a ging un, thepna a hung um phat leh pûk kit ziang sekte hi a hiu.

¹⁴ Chuleh, hampa lingnei lak ah kethate chu zia gual hi a hiu: Thu a het phat ua leh, a chiau a; damsung khawsak lungkhamnate, hausaknate leh nopsaknate’n a hun dêp ah; a ga piting ngai sek puau hi.

¹⁵ Lei phatna kethate chu ziate hi a hiu: Lungthim kitup tak leh pha tak in thu a hiau ah, a vop zing un, thuak hat tak in ga a hun sua sek ui, a tia.

Thaumei Tekhinthu

¹⁶ Kuama’n thaumei vâk in bêl sung a hem, jalkhun nuai a hem inle a koi ngai puau in, a tunna’n a tung sâng zaw sek ui, a hung lut zosia’n a vâk a mutheina ding un.

¹⁷ Kipuang lo ding ah thugûk bangma a um pua’n, hetdok lo leh lang lo ding ah selgûk bangma a um diak pawngal a.

¹⁸ Ziaziakchun, la thil hiatteu ah hin chingkam tak in um un; kuale a nei chu piak belap hi’ntin, kuale a neilo chu a neisunle lâkpiak hi’n a.

Jesu Tawh Kichanauna

¹⁹ Zia lai tak ah chun a nu leh a suapite a hung ua, mipi tam tâkluat ziakin a hung lut thei puau a.

²⁰ Mi pakhat in Jesu kiang in, “La nu leh la suapite’n nangma hun mu nuam in, In mai lam in a ngak ui,” ti’n a vagen a.

²¹ Ama chun, a kiang un, “Pathian thu he ah jawmte hi ka nu leh ka suapite a hiu,” a tia.

Jesu’n Thigawpi A Vauthipna

²² Ni khat chu a nungzuite tawh long sung in a lut tau a: “Dil gâl langkhat lam ah gâl kâi hitiu,” a hun tia. Tichun, a kipan tau a.

²³ A kitawl lai un ama chu a la ipmu tai. Dil chung ah chun thigawpi nasa tak a hung hâng ta’n; a long uh tui a dim vâng vâng ah, lauthawn um tak in a um tau a.

²⁴ A kiang in a hung ua, a kaitho un: “Hotupa, hotupa, mangthai ding ka hitau hilam!” a tiu a. Ziaphat chun a hung tho ah, thigua leh tuifawn kisep vut vut chu a hun vau a; tichun, a hung chawl ua, a thip dîl dêl ziang tai.

²⁵ Chuleh, a kiang un, “La ginnau khoilam ah um ahi tam?” a tia. Amau chun lau ma ma leh maksa tak in, “Zia pa hi khoilam bang mi a hita, tui leh thiguale thu a pia, a thu a awi ziang uh hi?” a kitiu a.

Gerasin Gam ah Thitha Honpi A Nawdawna

²⁶ Galili gam jawn ah Gerasin gam chu a hung tung tau a.

²⁷ Khawmual a kaidaw phat un, khawpi kipat thitha vop pakhat in a la lamtua ah, ama chu sawt tak puan him him sil talo, In him him ah le um talo ah thânte ah um ziang a hita’n.

²⁸ Jesu a hun mu phât in a kiko ah, a ma-âng in a bokkhup ah, aw ngai tak in, “Jesu, Chungnung pen Pathian Chapa, bang ei law ding ah hung la hem? Ei sawisa lo dingin ka don la hi,” a tia.

²⁹ Zia thitha buak chu zia pa ah kipat chu pawt ding ah thu a piak tâk ziak ahi’n. (Ama chu thitha buak chun a man sek ah, thikkhau in a hên sek un, chuleh, bulle a tuk sek ui; himaleh, a kolbute chu a bottan ah, gamthip ah thitha buak chun a pui mang sek a.)

³⁰ Jesu chun, “La min bang a hem?” ti’n a dong a. A sung ah thitha tam tak um ahi ziakin ama chun, “Nuai ka hi,” a tia.

³¹ Amau chun kawkhûk mong bei ah sawl lut lo dingin a don tau a.

³² Zia tak ah chun tâng ah vokcha hon tam tak a tau a; thithate chun a kiang in, vokcha sung ah luttheina a don tau a. Ama chun a phal piak tai.

³³ Tichun, thitha buakte chu zia mipa sung ah kipat chun a pawtdok un, vokchate sung ah chun a lut tau a; vokchate chu kawllêk in a taithau in, dil sung ah chawm lut in, tui hapvâ in a thi zo tau hi.

³⁴ Vokcha vâkte chun thil umdan chu a mu phât un a tai ua, khua sung leh tânggamte ah chun a vagen jak tau hi.

³⁵ Chuleh, thil umdan en ding ah hung pawt in, Jesu kiang in a hung ua, zia tak ah chun Jesu kengbul ah thitha buak voppa kha thithate’n a nutsia tâk uh, puan sil leh chêng in, lungthim dik tak pu’n a la kichu a vamuu ah, a lau ma ma tau hi.

³⁶ A la musate chun, thitha buak voppa hung phatdaw dan chu a la gen tau hi.

³⁷ Ziaphatchun, Gerasin gam leh a tuamvêl ah mi zosia chun a lau ma ma ziak un, amau chu nusia dingin Jesu chu a don tau hi. Tichun, long ah chun a lut ah, a kile’kit tai.

³⁸ Ahi’n, thitha buakte pawtsanpa kha a hung ah, a kiang ah um zing dingin a hung kidon a; himaleh, Jesu’n a la sawl kit ta’n, a kiang in:

³⁹ “La In lam ah chia kit inla, la chung ah Pathian in thil a hun hi’piak dan hi vagen jak ta’n,” ti in. Tichun, ama le a chia kit ah, a chung ah Jesu’n thil lopi tak a hi’piak dan chu, khawpi sung zosia ah chun a gen jak tai.

Numei Thipût leh Jaira Chanu Sukdamna

⁴⁰ Jesu a hung tun kit phatin, ama a la ngâk zing mipite chu a kipak ma mau a;

⁴¹ zia tak ah chun mi pakhat, a min Jaira a tiu, sunagog hotupa chu a hung a. Jesu kengbul in a hung bok khup ah, a In ah hung dingin a don a;

⁴² a chanu neisun, kum sawm leh ni mi chu damlo thi vâng vâng in a um a. A chia lai ah chun mipi chun a tuam hut hut tau a.

⁴³ Zia tak chun numei pakhat, kum sawm leh ni thipût a hung ah, ama chun a nei zosia daktor kiang in a sêng zo ta’n; himaleh, kuama’n a hi’dam thei puau a.

⁴⁴ Jesu nung lam in a hung ah, a puan mong a hung khoi a; ziaphatchun, a thipût chu a hung kang tai.

⁴⁵ Ziaphatchun Jesu’n, “Kua a hem ei khoi?” a hun tia. Himaleh, Ama khoi kha chu umlo ahi dan uh a gen chiat tau a. Peter chun, “Hotupa, mipi’n a hun tuam hut hut un, a hun phu mên mûn uh hi lam,” a tia.

⁴⁶ Himaleh, Jesu’n, “Kua a hem khat in ei khoi hi, keima ah kipat thilhitheina a pawt hi ti ka hia’i,” a tia.

⁴⁷ Numei chun, kisêl zo lo ding ka hi ti a kihiat phatin, kithing kawm kawm in a hung ah, a ma-âng in a hung bokkhup ah, bang ziak ah vakhoi a hem ti leh, a natna a hung dam ngal dante chu mipite het in a kiang in a hung gen tai.

⁴⁸ Jesu chun a kiang in, “Ka chanu, la ginna la dampi ahi; thamuang tak in chia ta’n,” a tia.

⁴⁹ Zia thute chu a la gen lai tak in, sunagog ah hotupa In ah kipat chun mi pakhat a hung tai ah, “La chanu kha a thi tai: Hotupa kha sukbuai dâ mai ta’n,” ti’n a hung gen a.

⁵⁰ Himaleh, Jesu’n a la he, a kiang in, “Lau kin. Gingcha mai in, hung hing kit ding ahi,” a hun tia.

⁵¹ A In a hung tun phat in, Peter tawh, Jakob tawh, Johan tawh, zia naupang nu leh pa tilo ngal chu kuama lut ding a phal pua’n.

⁵² Mi zosia chun kap in, a la sûn ma mau a; himaleh, ama chun, “Kap kiu in, a thi ei puai, a ipmu a hizawi,” a tia.

⁵³ Amau haw chun a thi ahi ti a het ziak un a la nuisan tau a.

⁵⁴ Amau haw chu a sawldaw sik sek zaw phatin, amanu chu a khut in a vak tûk ah, a ko ah, “Bawinu, hung tho in!” a tia.

⁵⁵ Tichun, a thagau chu a hung kit ah, kin tak in a hung thodok tai! Zia phat ah chun bang a hem khat a nêk ding pia ding in a hil a.

⁵⁶ A nu leh pa chunle mak a sa ma mau a; himaleh, ama chun a thil hi’ chu kuama hil lo dingin thu a pia tai.