LUKA 24 - PATHIAN LEKHABU THIANGTHO (BSI)

Jesu Thawkitna

¹ Hapta khat ah ni masa pen, jingkal ma tak ah chun gimtui a siamteu chu chawi in, thân ah chun midang khenkhat tawh a vachiau a.

² Thân ah kipat suang chu likdawsa’n a vamu tau a.

³ A sung a lut ua leh, Jesu luang chu a mu ta puau a.

⁴ Lungkham tak ah a um lai un, mi pani puanvam tak, mi sal thei hial sil in a kiang un a hung ding ua.

⁵ Numeite chu a lau ma ma ziak un, a mai ua leitual si hial in a ma âng un a bokkhup tau a; ahi’n, amau chun, “Bang a tia mithi lak ah mihing hawl la hiu em? Zia tak ah hin a um ta puai, a thokit tai;

⁶ Galili gam ah a um lai ah a thugen kha hezing un.

⁷ ‘Mihing Chapa chu migilote khut ah piak in um intin, khênden intiu in; himaleh, a ni thum ni leh hung thokit ding ahi,’ a ti kha,” a tiu a.

⁸ Ziaphatchun, a thugente kha a hun hedok tau a.

⁹ Thân ah kipat chun a hung nung tai kit ua, thil umdan zosia chu sawm leh khatte leh midang dang kiang inle a vahil tau a.

¹⁰ Sawlchâkte kiang ah thil umdan hung gente chu Mari Makdalin, Joanna, Jakob nu Mari leh a lak ua numei dang umte sia tawh a hiu a.

¹¹ Himaleh, a thugen uh chu a la taksang ziang puau a, thu manlo gen gual bep in a la ngai ua.

¹² Ziaphatchun, Peter chu a kipan ah, thân lam ah chun a tai ah; a bok ah, thânsung chu a vak et leh a puannem, amau koi ma ma kha a vamu, thil umdan chu lamdang sa’n a chia kit tai.

Emmau Lampi’ Kilâkna

¹³ Zia ni chun a lak ua mi pani Emmau khua lam chu zuan in a chiau a, Jerusalem ah kipat mêl sagi vêl ding bep ahi’n.

¹⁴ Amau chu lampi ah chun thil umdante gen in a holim pek ua.

¹⁵ A chanchin ngaitua leh gen khawm ah a um lai un, Jesu’n a hun nai ah, a kitonpi ta’n.

¹⁶ Himaleh, ama chu a la hetlona ding un a mit uh sukvâi in a um a.

¹⁷ Jesu chun a kiang un, “La chia kawm ua la holimnau kha bang thu a hem?” a tia. Lungkham mêlpu tak in a ding tau a.

¹⁸ Kleopas a tiu chun a hun dawnhu a, “Jerusalem ah nang ngen ah um la hia hem tu’lai tak ah thil umdan la het lo ziang chu?” a hun tia.

¹⁹ Ama chun, “Bang thu em,” ti’n a dong a. Amau chun, “Nazareth Jesu, Pathian leh mi zosia mit mu ah a thu leh thilhi ah jawlnei minthang tak chanchin,

²⁰ thiampu lalte leh ka vaihawmteu in thi dingin thiamlo chansak ah, a khetden tâk uh chu.

²¹ Kei hawn la Israelte tandok ding pa ahi ding ka kinep siat uh tawh, a bang hileh, zia thil tunna chu tu’ni hi a ni thum ni ahi tai.

²² Ahi’n, ka lawi lak ua numei khenkhatte’n jingkal ma tak in thânsung a va-et ua leh ei hi’lungkham ta ngei ui!

²³ A luang a vamu zaw lo phat un, a hung kit un; vansawlchâkte a hun muu leh, amau chun a thawkit thu a la hil uh chu a hung gen un.

²⁴ Chuleh, ka lak ua lawi khatle thân lam ah a vachiau leh, numeite gen gual ma chun a vamu diak puau in,” a tiu a.

²⁵ Ziaphatchun, ama chun, “Aw mi ngolte haw, jawlneite thugen zosia taksanna lam ah ngongte haw!

²⁶ Messiah chun zia thilte zosia chu thuak ah, a lopina lut ding him hilo a hem?” a tia.

²⁷ Tichun, Mosi leh jawlneite lekhabu’n a pan a; Pathian Lekha ama chanchin kizik tapo chu a hilchian piak tai.

²⁸ A chiana ding uh khua chu a nai phatin, ama chu gamla deu ah chia gaw gual tak in a hun makhel a.

²⁹ Himaleh, amau chun a tho ua, “Ka kiang un um ta’nla, khuale a vâigei ta’n, ni le tum ding a hita hi lam,” a tiu a. Tichun, a kiang ua um dingin a lut tai.

³⁰ An ne ding ah a chut lai un, vaithum chu a la a maljawl ah, a hun phelsua ah, a kiang un a pia.

³¹ Ziazaw chun, a mit uh a hung vâk phut ta’n, ama chu a hun he tau a, ama chu a munau mun ah chun a mang tai.

³² Ziaphat chun, amau chu a kiho ua, “Lampi ei holimpi ah, Pathian Lekhathu ei hun hilchian lai ah khan I lungthim uh a hal huai him hilo a hem maw?” a kitiu a.

³³ Zia dakkal sung ma ma chun a kipan ua, Jerusalem lam ah a chia kit tau a, sawm leh khatte a la um khawmnau ah chun a chiau ah, amau haw chun,

³⁴ “Lalpa kha a thokit tak tak hi, Simon kiang inle a kilâk hi,” ti’n a la gen ua.

³⁵ Chuleh, amau inle, lampi thil umdante leh vaithum a phelsua ah, a mêl a het danteu chu a gen tau hi.

Jesu A Nungzuite Kiang ah A Kilâkna

³⁶ Zia thu chu a gen lai tak un, Jesu chu a lak un a hung ding phut a, “La chung un thamuanna um ta hen,” a hun tia.

³⁷ Himaleh, amau chu a lau ua, lamdang a sa ma mau ah, thitha ho hi’n a, a tiu a.

³⁸ Ama chun a kiang un, “Bang ding ah lungkham la hiu em? Bang a tia la lunggil ua gingla la hiu em?

³⁹ Ka khutte, ka kengpêkte hi en un, keima ngei ka hi hilam! Ei khoi un la, en un; lei mu gual uh hin thagau in phe leh gu a nei puai,” a tia.

⁴⁰ Zia chu a gen zaw in, a khutte leh a kengpêkte chu a etsak a.

⁴¹ A kipak tâkluat ziak leh mak a sak bek set ziak ua, gingcha ziang theilo ah a um lai un, ama chun a kiang un, “Nêk ding bang a hem khat la nei awm?” ti’n a hun dong a.

⁴² Amau chun sanga minsa tangkhat a piau a,

⁴³ ama chun a la, a ma-âng ua chun a ne tai.

⁴⁴ Chuleh, a kiang un, “La lak ua ka um lai ah thu ka gen sekte kha zia thute hi ahi, Mosi dan leh Jawlneite leh Pâkna La te ah ka chungchâng thu a la kizik gual ah, bangkim hung guitung ding ahi, ka ti te kha,” a tia.

⁴⁵ Ziaphatchun, Pathian Lekhathu chu a hiat thiam theina ding un a lungthim uh chu a sukvak piak tai.

⁴⁶ Ama chun a kiang un, “Zia gual ah hin a la kizik hi, ‘Zia thilte chu Messiah chun thuak intin, a ni thum ni leh thina kipat in thokit ding ahi.

⁴⁷ Ziaphat chuleh, Jerusalem ah kipat in namtin kiang in, gitlona ngaidamna thu leh gitlo haisanna thute ama min in genjak in au;

⁴⁸ tichun, nanghaw hi zia thilte hiatpite chu la hitau hi.

⁴⁹ Ngai un, ka Pa tiamsa chu la chung un hun sawl ding ka hi; zia chung lam ah kipat thilhitheina ah thuam ah la um masang siau chu, Jerusalem khawpi hin um zing un,” a tia.

Jesu Van ah A Kaltona

⁵⁰ Chuleh, amau chu Bethani khua tiang in a pui ah; chun, a khut jak in, amau haw chu a maljawl a;

⁵¹ amau haw a maljawl lai tak in, amau tawh khen in a um ta’n, van lam ah lâk to in a um tai.

⁵² Ama chu a biau ah, kipak ma ma in Jerusalem khua lam in a hung kit tau a;

⁵³ tichun, tempul ah chun Pathian pâk leh chawihoi in a um zing tau hi.