LUKA 23 - PATHIAN LEKHABU THIANGTHO (BSI)

Pilat Ma ah Jesu Dinna

¹ Mipi zosia chun kithu gual tak in Pilat kiang in Jesu chu a pui tau a.

² Tichun, ama hêkna thu a gen pan tau a: “Zia pa hin, Messiah, Leng ka hi, a ti hen; Lengpa kiang ah sia choi ding a zada hen, ka nam uh a pui siai,” a tiu a.

³ Pilat in thu a hun dong a, “Nang hi Judate Lengpa la hi em?” a tia. Ama chun, “Nang in la ti chulam,” a tia.

⁴ Ziaphatchun, Pilat in thiampulalte leh mipite kiang ah chun, “Zia pa chung ah hin a dik lona bangma ka mu puai,” ti’n a gen a.

⁵ Himaleh, amau chun, “Galili gam ah kipat in zia mun tiang leh, Judea gam ah khaw tin ah thu hil in, mi zosia a tîlsia sek hi,” ti’n hanaw in a naw tau a.

Herod Ma ah Jesu Dinna

⁶ Pilat in zia chu a het phat in, Galili gam mi ahileh hilo a dong chian a.

⁷ Herod vaihawmna nuai ah mi ahi ti a hun hetchian phatin, Herod le zia hun ah chu Jerusalem ah a um lai tak ahi ziakin, ama kiang lam in a sawl zaw tai.

⁸ Herod chun a chanchin tam tak a la hiatsa ahi ban ah, a mu nopnale a sawt tâk ziakin, Jesu a mu phât in a kipak ma ma a. Chuleh, a thilmak bawl khenkhat le mu a kinem a.

⁹ Ama chu dotna tam tak a la dong a; himaleh, Jesu chun bangma cha’n a dawnhu puai.

¹⁰ Ziaphatchun, thiampute leh lekhazikte chu a hung kipan ua, a hêk thei chan un a hun heksia tau a.

¹¹ Herod chunle a gâl do pawl sepaite a tîl ah, tawtbawlna mang in, a nuisan tau a; chuleh, puan lopi tak a silsak a, Pilat kiang in a sawl kit tai.

¹² Zia ni chun Pilat leh Herod chu a kihothei tau a; zia malam ah khan kituak lo hial a la hiu a.

Jesu Thina Ding Thutanna

¹³ Pilat chun mipite leh a vaihawmteu tawh thiampu lalte chu a ko khawm ah, a kiang un:

¹⁴ “Mite a pui siai, ti ah ka kiang ah la hun pui uh kha ahi’n; ngai un, la mau in ka enchian ta hen, la hêkna thuu ah khan zia pa chung ah hin bangma a mawna ka mu puai;

¹⁵ Herod inle a mu diak lo ziakin a hun sawl kit ta hilam; en un, ama hin bangma thina ding hial a bawl puai.

¹⁶ Ziaziakchun, ama hi sawi ing ka tin, thâdok mai ing ka,” a tia.

¹⁷ Zia tawhbang kût ni hileh, Pilat in mi pakhat a thâdaw sek chu a ngaina mawng a hisek hi.

¹⁸ Ziaphatchun, aw kituak tak in a hung kiko ua, “Zia mi hi himangthai inla, Barabba ei hun thâdaw piak zaw’n,” a hun tiu a.

¹⁹ Ama chu khawpi sung helna tualthat ah a la pan ziak ah suangkul tâng ahi’n.

²⁰ Pilat chun, Jesu chu thâdaw a nop ziakin, a kiang un a hun gen kit a;

²¹ himaleh, amau chu a hung kiko ua, “Kros ah khenden in! Kros ah khenden in!” a tiu a.

²² A thumveina chun, a kiang un, “Bangatia hem? Bang a hi’khial a hem? Ama chung ah hin thina ding hial bangma ka mu puai, sawi ing ka tin, thâdok mai ing ka,” a ti kit a.

²³ Himaleh, aw ngai tak ah hung kiko kit in, khetden dingin a phût tei tei tau ah; a awu chun a hun thuzaw khawng ta’n;

²⁴ tichun, Pilat chun a dot gual ua chun thu a hun tan tai.

²⁵ Chuleh, helna leh tualtha ziak ah suangkul tâng chu a hun thâdok ah, a dot dungzui un Jesu chu a nop nop ua a bawl ding un a hun pedok tai.

Kros ah Jesu Khetdenna

²⁶ Jesu chu a puidok tau a. Kurini khaw mi, Simon a tiu chu a gam lam ah kipat hung chu a man ua, kros chu a puaksak ua, Jesu nung a zuisak tau a.

²⁷ Mipi tam tak in a hun zui un, a lak ua numei haw chun kap leh mau kawm in a zui pek un.

²⁸ Jesu chu a hung kinunghei ah, “Jerusalem chanute haw, kei ei kâ kiu inla, nangmau leh la chateu â dingin kap zaw tau in.

²⁹ Ngai tiam un, ‘Chîng ah, a sung ah nau um kha lo leh, nau nawichep ding neilote chu a vang uh a phai,’ ti kha a guitun ni hung um intin,

³⁰ zia ni tak chuleh, mual kiang in, ‘Ei deldên in,’ ti’n tiu in; tâng kiang ah chun, ‘Ei khu’khum in,’ ti’n au.

³¹ Thinghing lai bawn zia gual tak ah hi a bawl ua leh, a keu vâng vâng chu bang bep a hun law ta ding awm?” a hun tia.

³² Chuleh, tualthat midang panile ama tawh khailup khawm dingin a pui ua.

³³ Lugu Mun a tiu chu a tun phat un, zia tak ah chun Jesu chu migilo tualthat pani, a changlam ah pakhat, a veilam ah pakhat chu tawh kros in a khenden tau hi.

³⁴ Jesu’n, “He pa, amau hi ngaidam in, a thilhiu a het lo ziak uh ahi,” a tia. Âisân in a puante chu a kihawm tau a.

³⁵ Mipi chun a kiang ah dingin a la en zing un. A kiang ah lamkai a la dingte chun a hun engho un, “Pathian mi têl, Messiah chu la hileh, midang bawn hukdam sek a, kihukdam lechin hiding a paw em,” ti in.

³⁶ Sepaite chunle a hun nuisan ua, uain thuk a hung piau a,

³⁷ “Judate Lengpa la hi’leh nang leh nang hung kihukdam ta’n la,” a tiu a.

³⁸ A chung ah lekha kizik a tâk un, “ZIA HI JUDATE LENGPA ahi,” ti in.

³⁹ Tualthat a khetdenteu lak ah pakhat zaw chunle a hun êngho ah, “Messiah chu la hileh, hung kihukdam inla, keimau le ei hukdam ta’n la,” a hun tia.

⁴⁰ Himaleh, pakhat zawk chun a hun gai a, “Pathian la lau paw maw? Ama tawh thiamlo channa kibang tak ah gawt ah I um hi,

⁴¹ ei hi vang I chan ding him ahi’n, I thilhi man chu I mu ahi; ama hin vang bangma a hi’khial puai,” a tia.

⁴² Ziazaw chun, “Jesu, la gam la tun tak leh ei hezing in aw,” a tia.

⁴³ Jesu’n a kiang in, “Titakzet in ka hil la hi, tu’ni hin Paradis ah ka kiang ah um ding la hi,” ti’n a dawnhu tai.

Jesu Thina

⁴⁴ Sûnkim a hung hita’n; zia hun ah kipat chu sunnung lam dak thum tiang, lei chung pumpi chu a hung thim suak ta’n.

⁴⁵ Nisa a hung thim ah, tempul pindan puanjak chu a lai tak in a hung kithêk ta’n.

⁴⁶ Zia hun ah chun Jesu chu aw ngai tak in a hung kiko a, “He Pa, la khut in ka thagau ka hun vopsak hi,” a tia. Zia chu a gen zaw in a thagau a tha tai.

⁴⁷ Sepai zahotu chun thil umdan chu a mu phât in, “Zia mi hi midik tak a la hi ngei hi,” ti’n, Pathian a chawihoi tai.

⁴⁸ Tichun, ama en ah hung khawm mipi zosia chun, thil umdan chu pha tak ah ngaitua zing kawm in, a awm uh chûm kawm kawm in a chia kit tau hi.

⁴⁹ Ama a la mêlhette zosia leh, Galili gam ah kipat hun zui numeite chun a gâl ah thîl zing in, thil umdante chu a mu chian tau a.

Jesu Vuina

⁵⁰ Zia hun ah chun, mi pakhat, a min Joseph kiti vaihawmte lak ah mi, mi diktat tak leh mi pha tak a um a.

⁵¹ Ama chu a vaihawm lai ua a thiltup dan uh doi lo ah a la pang him kha a la hi’n. Judate khua Arimathai mi ahi’n. Pathian gam a la ngâkla ma ma khat ahi.

⁵² Zia pa chu Pilat kiang in a vachia a, Jesu luang chu a vadon a.

⁵³ Ama chun a vala tha’n, puan nêm in a tuam ah, suang kikhuak thân pakhat, kuama kisial khâk lona chun a sial a.

⁵⁴ Zia ni chu kisak lawkna ni, Sabbath ni ding kuan cha ahi’n.

⁵⁵ Zia tak ah chun, Galili gam ah kipat numei hungte khanle a zui pek ua, a luang kisial dan leh a thân umdan chu a vamuu a.

⁵⁶ A hung kit ua, gimtui leh sathau haw a ngaituau a; thupiak dan dungzui in sabbath ni chun a chawl tau hi.