LUKA 19 - PATHIAN LEKHABU THIANGTHO (BSI)

Jesu tawh Zakai Kimu’na

¹ Jesu chu Jeriko khua’n a lut ah, chiathen a gua.

² Zia khua chun mi pakhat, a min Zakai kiti chu a um ah; ama chu sedawlte hotu ahi’n, mihausa tak ahi.

³ Ama chun, Jesu chu bang gual mi a hem ti he nuam in mu a nuam a; himaleh, ama chu mi niam ahi ziakin, mipi a tam ziakin a mupha pua’n.

⁴ A malam in a la tai ah, a en dingin theichang lêk in a kãl tai; zia lampi chu a hun hawna ding lam ahi him a.

⁵ Zia mun chu Jesu’n a hun phâk phatin a dâk ah, a kiang in, “Zakai, hung kum kin-gang in, tu’ni hin la In ah tung ding ka hi,” a tia.

⁶ Kintakin a kum a, kipak tak in a tunsak tai.

⁷ Zia a la mute zosia chun, “Migilo In ah tung ding in a lut tai,” ti’n a phun tau hi.

⁸ Chuleh, Zakai chu a ding ah, Lalpa kiang ah chun, “Ngaitia Lalpa, ka nei kimkhat hi gentheite kiang in pia’ng ka tin; chuleh, kua sum hita leh, ka lêpguk a um chun a le’li’n dit kit ing ka,” a hun tia.

⁹ Ziaphatchun, Jesu’n a kiang in, “Tu’ni hin zia In ah hin hukdamna a hung tung tai, ama chu Abraham chapa ahi.

¹⁰ Mangthaite hawl ah hukdam dingin Mihing Chapa hi hung him ahi,” a tia.

Dangka Sawmkhat Sukpun Tekhinthu

¹¹ Zia thute chu a ngaithâk zing lai un, Jerusalem khua a nai tak ziak leh, Pathian gamle hung kilang ngal ziang ding ah a ginchâk ziak un, tekhinthu a gen belap a.

¹² “Milian kua a hem gam neina thu vala’ hung kit dingin, gamla tak in a chia a.

¹³ Tichun, a chia ding kuan in a suak sawmkhatte chu a ko a, dangka sawm a pia; a kiang un, ‘Ka hung tun kit masia zia hin sumkawl a la vei un,’ a tia.

¹⁴ Himaleh, a gam mite chun ama chu a mu nuam puau ah, a chia nung ah chun palai a sawl zui un, ‘Zia pa hi ka chung ua vaihawm dingin ka doi puau hi,’ a tiu a.

¹⁵ Tichun, a gam neina ding thu chu a lâk zaw ah, a hung kit phatin, a suakte dangka a piakte khan bang jat jat a veipung awm ti hetna dingin a ko khawm a.

¹⁶ A masa pen pa chu a hung a, ‘Lalpa, la dangka sawmkhat in a pung hi,’ a hun tia.

¹⁷ A pu chun a kiang in, ‘Suak pha, la bawl phai; tawmcha chung ah la ginum ziakin khaw sawm chung ah vaihawm in pang in,’ a tia.

¹⁸ Chuleh, a panina pa chule a hung a, ‘Lalpa, la dangka kha panga’n a pung hi,’ a hun tia.

¹⁹ Ama kiang ah chunle zia gual ma chun, ‘Khua panga chung ah vaihawm in pang in,’ a tia.

²⁰ Chuleh, a dang pakhat a hung kit ah, ‘Lalpa, en tia, zia tak ah hin la dangka kha a um zing hi, puan in ka chûn hi;

²¹ nang hi mi genhak tak la hiziak in ka lau ah, la koi lo na’le la sek a, la tu’ lo na’le ât sek la hi,’ a tia.

²² Ziaphatchun, ama chun a kiang in, ‘La kamsuak ngei ah kipat in la chung thu ka tan ahi; nang suak gilopa, mi genhak tak ka hi ah, ka koi lo na’le ka lâk sek ah, ka tu’ lo na’le ka ât sek hi ti la het leh;

²³ bangatia, ka dangka hi sum sukpunna In bêk ah a la koi lo? Ka hung tun ah hin ka dangka chu a pung tawh ka hun phût ding hilo a hem?’ a tia.

²⁴ Tichun, a kiang ah dingte kiang ah chun, ‘A dangka kol sun kha lâkpiak unla, sawmkhat kolpa kiang ah khan piau in,’ a tia.

²⁵ (Amau chun, ‘Lalpa, ama chun dangka sawmkhat hial a neina kha lam’ a tiu a.)

²⁶ Ama chun, ‘Ka hil la hiu, a nei chu piak belap hi’ntin, a neilo chu a neisunle lâkpiak hiding ahi.

²⁷ Chuleh, ka mêlmate, a chung ua ka vaihawm ding zadate kha le, zia lam ah hin hun pui un la, ka ma-âng ngei ah hin that un,’ a tia,” ti’n a gen a.

Jerusalem ah Choihoina Tawh A Lut

²⁸ Jesu’n zia thute chu a gen zaw phatin, ama chu a masa’n a hung pang a, Jerusalem lam zuan in a chia to tau a.

²⁹ Bethphage leh Bethani khua kiang, Oliv tâng kiti mun chu a hung tung un; zia kipat chun a nungzuite pani a sawl a:

³⁰ “La majawn ua khawneu ah sawn vachiau inla; zia khua chu la lut phat ua leh, sabiltungno kihên vamu’n la tiu in, zia chu kuama chuan khâk nai lona hi’ntin; zia chu hun tham unla, hun kai ziang un.

³¹ Mi kua a hem khat in, ‘Bangatia, la thap uh a hem?’ ti a hun dot ua leh, ‘Lalpa‘n a doina a um ah ahi,’ tileuchin,” a tia.

³² Tichun, a mi sawlte chule a chiau ah, a ti gual gual chun a vamuu a.

³³ Zia sabiltungno chu a vak thap ua leh, a neite chun a kiang un, “Bangatia, zia sabiltungno chu tham la hiu em?” a la tiu a.

³⁴ Amau chun, “Lalpa‘n a doina a um ah ahi,” a tiu a.

³⁵ Tichun, Jesu kiang in a hun kai ua; a chung ah chun a puanteu a dâp un, Jesu a chuansak tau a.

³⁶ A chia phat un, lampi dung ah chun a puanteu a pha pek un.

³⁷ Tichun, Jerusalem khua a hun nai tau a, Oliv Tângpang ah chun a hung suk un, a nungzui mipi zosiate chun, a thil lopi tak tak bawlte ziak ah chun, Pathian chawihoi in aw ngai tak in a kiko tau a:

³⁸ “Lalpa min ah Lal hung chu a hampha na e! Van ah chamna thu leng hen la, vansang pen ah khin lopina um ta hen!” a tiu a.

³⁹ A lak ua Pharisai khenkhatte chun a kiang in, “Hotupa, la nungzuite hi vau ta’n la,” a hung tiu a.

⁴⁰ Ama chun a kiang un, “Ka hil la hiu, zia mite hi a thip ua leh le, suangchang bêk kikodok ding ahi,” a tia.

Jerusalem A Kâkhumna

⁴¹ Jerusalem a hun nai ma ma phat un, khawpi chu a vak en ah, a kâkhum ta’n:

⁴² “La thamuanna ding ah thil hung tung chu, tuni bêk ah hin he ta mai lechin aw! Himaleh, tu’hin la mit ah kipat sêlmang in a um tangal in.

⁴³ Bangtik ni a hem leh la mêlmate chun kul in hun ûm khum intiu in; hun châng kîmvêl intiu in, a ning a ning in hun ûm bichil intiu in.

⁴⁴ Pathian in a hung kanthâk lai hun la het lo ziak un la huap sung ah la chate, nangma tawh leitual jepna’n hun mang intiu in; la huap sung ah suang kitiang him himle khêk pua’n au,” a tia.

Jesu’n Tempul A Sukthianna

⁴⁵ Tempul sung in a lut a, thil zuakte leh chawte chu a hun nawdok a;

⁴⁶ a kiang un, “Ka In chu pauchapna In ahi, ti zik ahi ngal a; nang un guchate kikhum khawmna’n la mang tau hi!” a tia.

⁴⁷ Tichun, tempul ah chun nisi’n in thu a hil sek a; himaleh, thiampu lalte, lekhazikte leh mipi lak ah a lawi upateu chun ama tha theina ding a hawl tau a;

⁴⁸ himaleh, mipite chun a thugen chu a ngai chim theilo ziak un, a bawl ding dan a hethei puau hi.