LUKA 16 - PATHIAN LEKHABU THIANGTHO (BSI)

Sumkol Ginumlo Tekhinthu

¹ Chuleh, Jesu’n a nungzuite kiang in zia gual hin a gen a: Mihausa kua a hem pakhat a um a, a sepkolpa khut in a nei zosia a etkol sak a; zia pa chun a nei leh lam etkolte chu a suchavai mai mai hi, ti ah hêk in a um ta’n.

² Tichun, ama chu a pu’n a hun ko ah, a kiang in, la chungchâng thu ka het hi bang thu a hem? La sumkol dan hun zik tup in la ei pia’n; tu’kipat sumkol ah pang talo ding la hi, a ti’n.

³ Sumkolpa chun a lungthim in, ka pu’n ka panna ei haisak ding ahi tâk leh, bangti’n ka hita dia aw? Lei chaw la ka pei pua’n, khutdaw la ka zakcha ngal in;

⁴ ka sumkolna ei haisak phat leh, min a In ua ei la lop luttheina ding un, ka bawl ding dan ka he tai, a tia.

⁵ Tichun, a pu sum bate chu pakhat khat in a ko ta’n, a masa pen kiang ah chun, ka pu sum bang jat a hem la bat? a tia.

⁶ Ama chun, Oliv thau te’na za khat a tia. Ama chun a kiang in, la lekha la’n la, chu’n la, sawmnga zik in a tia.

⁷ Chun, midang khat kiang in, nang in bang jat a hem la bat? a tia. Ama chun, Gehu bu te’na dim za khat a tia. Ama’n a kiang in, la lekha la’n la, sawmgiat zik in, a tia.

⁸ A pu chun, sumkol ginumlo chun pil tak ah thil a bawl ziak ah chun a pakcha ta’n, vâk chate sâng in zia khawvel chate hi a tu’lai thuu in a pilzawu hi.

⁹ Ka hil la hiu, lei chung sum hin jawl leh gual kisiam un, zia chu a bei phat leh kumtuang ah umna chun a hun lawp lut theina ding un.

¹⁰ Kuale tawmcha chung ah ginum chu, tam tak chung ah le a ginum hi; kuale tawmcha chung ah gin umlo chu, tam tak chung inle a ginum ngai puai.

¹¹ Zia lei chung sum leh pâi chung ah bawn la ginumlo ua leh, kua a hem sum tak tak hun vopsak ding?

¹² Midang â chung ah bawn la ginumlo ua leh, kua a hem nangmau â chu hun pia ding?

¹³ Suak kuama’n hotu pani na a sêmkop thei puai; pakhat muda in pakhat hepi intin; pakhat kiang ah kitulût intin, pakhat chu dangdâk in a. Pathian leh sum na sêmkhawm thei pua’n lau, a tia.

Dan leh Pathian Gam

¹⁴ Pharisai sum thangaite chun zia thute chu a het phat un, a nuisan un.

¹⁵ Ama chun a kiang un, mi mit mu ah thiam kichan mai la hiu a, ahi’n la, Pathian in la lungthim uh a he nai; mihing lak ah choisa’n ah la umnau hi, Pathian mit mu in ki’dak um tak ahi.

¹⁶ Ahi’n, dan thu leh jawlneite thu chu, Johan hung um tiang khan a um a; zia kipat chun Pathian gam chanchinpha genjak in a um ah; ahi’n, mitin in pawngbawl in lut a guau hi.

¹⁷ Dan thu sutvom neupen chale a manthai sâng in, van leh lei paithâk a bailam zawi.

¹⁸ Kuale a ji nol ah ji dang nei tapo chu ângkawm ahi; chuleh, mi ji nolsa nei chule ângkawm ahi.

Mi Hausa leh Lazar

¹⁹ Mi hausa kua a hem khat a um ah, puan sandup leh puan malngat in a kithuam sek a, nisi’n nuamsa tak ah ne leh dawn in a um sek hi.

²⁰ Chuleh, mi hausapa kotkhakbul in mi pakhat, a min Lazar kiti, a taksa pumpi meima dim a um a.

²¹ Mi hausapa dawkan ah kipat anmal ketha haw chu nêk a nuam sek in; uichate chun a meimate chu a liak piak sek un.

²² Mi gentheipa chu a hung thi ta’n, vansawlchâkte’n a pui ua, Abraham ângsung in a koi tau a. Mi hausapa chule a hung thi ta’n, a vui tau hi.

²³ Mithi khua chun nat genthei tak thuak in a um ta’n; a dakdaw leh, gamla tak ah Abraham ângsung ah Lazar um chu a mu tai.

²⁴ A vak ko a, “He pa Abraham, ei lungsiat inla, Lazar kha hun sawl in; ka lei sukdaina dingin a khutzung mûk kha tui in hun diatop hen, zia meikuang hin ei hi’na ma ma ziang hi” a ti’n.

²⁵ Himaleh, Abraham chun, “Ka chapa, nang in la dam lai khan thilpha la chang in, zia gual ma chun Lazar in thil phalo a chan kha hezing ta’n; tu’hin vang ama zia hin lungmuang tak in a um in, nangma thuakgim tak in la um ahi tai.

²⁶ Zia lo chunle, nanghaw lam ah kipat mite le a hung theilo ua, keimau lam ah kipatle kuama a hung theilona ding un, nanghaw leh keihaw kikâl ah hin lei khikêk thûk tak a um hi,” a tia.

²⁷ Ziaphatchun, ama’nle, “Ahileh, he pa ka ni la hi, ama chu ka pa In bêk ah ei sawl piak in;

²⁸ suapi pawsal panga ka nei in, amau haw chu zia natna mun ah hin a hung lona ding un, phatchuamngai tak in vagen tiam hen” a tia.

²⁹ Himaleh, Abraham in, Mosi leh jawlneite a um nau hi, amau thu chu a la ngai uh hen a tia.

³⁰ Ama chun, “He pa Abraham, hilo e, mi thisate lak ah kipat mi ngei hang chia leu, a gitlonau haisan in au,” a tia.

³¹ Ama chun a kiang in, Mosi leh jawlneite thu a ngailo ua leh, mithi lak ah thokit hiziang leule taksang diak pua’n au, ti’n a dawnhu tai, a tia.