LUKA 14 - PATHIAN LEKHABU THIANGTHO (BSI)

Jesu’n Pawsal Tivûng Pakhat A Sukdamna

¹ Jesu chu Pharisai hotu khat In ah an ne ding ah a chia lai in, mipite chun a la entha zing ua.

² Zia tak ah chun mi pakhat tivûng ah damlo a kiang in a hung a.

³ Ziaphatchun, Jesu’n dan thiamte leh Pharisaite kiang ah chun, “Zia pa hi sabbath ni sukdam a thiang em thiang lo?” ti’n a dong a.

⁴ Himaleh, amau chu a thip bik bek tau a. Ziaphatchun, ama chu a ko ah, a hi’dam ah, a chiasak kit tai.

⁵ A kiang un, “La lak un kua a hem in, a cha a hem, a bawng a hem, a sabiltung a hem khat sabbath ni’n kawkhûk sung ah ke’lut taleh, kaidok lo ding kua a hem um?” a tia.

⁶ Zia thu ah chunle kuama’n a dawnhu thei kit ta puau hi.

Umchan Pha leh Mi Bawlphat

⁷ Chuleh, a mi chialteu in chutna pha pha a têl sek uh a mu phât in, a kiang un tekhinthu a gen a:

⁸ “Mo lopna ankuang ûm ding ah min a hun chial phat leh, chutna phapen ah chun chu ziang kin; achutiloleh, nang sâng ah ja um zaw a la chial khan tiu in, a chialpa chun:

⁹ ‘Zia pa chutna ding hi awt in’ hun ti leh nang chu zakcha tak in chutna tawp pen ah chun kichu kha’n la.

¹⁰ A hun chial phat ua leh, chutna niam pen ah chun vakichu zaw ta’n; tichun, a chialpa chu a hung tak leh la kiang in, ‘Lawm, chutna pha deu ah sawn vakichu’n’ hun ti zaw’n a. Chutileh, la ankuang ûmpite mit mu ah chun jana chang inla.

¹¹ Ama kingaisangte chu suktawm in um intiu in; ama kingaitawmte chu vang choisa’n in um in au,” a tia.

¹² Chuleh, a chialpa kiang ah chunle, “Sûn a hem, jan a hem ah gualvâkna la siam tak leh, la gualte, la suapite, la chanaute leh la Invêng ah mihausate chu ko kin; achutiloleh, amau haw chun hun ko thuk kit pai intiu in, din zo kit kha’n au.

¹³ Gual la vâk tak leh, mi gentheite, mi piansualte, kengbâite leh mitthûmte chu chial zaw ta’n.

¹⁴ Ziate chun ditna ding a nei lo ding ziak un a hampha hiding la hi; midikte thawkit tak leh dit kit ah um ding la hi,” a tia.

Gualvâkna Thupi Tekhinthu

¹⁵ A ankuang ûmpi kua a hem khat in zia thute chu a la het in, a kiang in, “Pathian gam ah an ne dingte chu a hampha nau e!” a tia.

¹⁶ Jesu’n a kiang un, “Mi pakhat in nitâk luaithe’na thupi tak a bawl ûm dingin mi tam tak a chial a.

¹⁷ An nêk hun ahiphatin: ‘Hung tau in; bangkim siam zaw ahi tai’ ti ah a mi chialte ko dingin a suakpa a sawl a.

¹⁸ Himaleh, a mi chialte zosia chu a la kihotuak in suanlam a bawl chiat tau a. A masa pen chun, ‘Gam neukhat ka chaw hen, ka va-et a ngai hi, ei la ngaithiam dingin ka hun don hi’ a ti’n.

¹⁹ Midang khat chun, ‘Bawngchal tuak nga ka la chaw hen, a enchian ah vachia ding ka hi, ei la ngaithiam dingin ka hun don hi’ a ti kit in.

²⁰ Midang khat chun, ‘Ji ka nei in, ka hung thei ta puai’ a la ti kit a.

²¹ Suakpa chun a pu kiang in zia thute chu a vagen a. In neipa chu a lungna ta’n, a suakpa kiang ah chun, ‘Chia kin-gang inla, kotzing leh khawpi sung gawlchiak kâlte’n chia inla, gentheite, piangsualte, mitthûmte leh kengbaite hun pui lût in’ a ti tai.

²² Ahi’n, suakpa chun, ‘He pu, la thu ei piak gual ah khan ka hita hen, ahi ziakin mun a awng nalai hi’ a tia.

²³ A pu chun, a suakpa kiang ah chun, ‘Chia inla, lamlian leh dai kiang vêl ah le mi la mu mu hun ko khawm in, ka In ah mi a dim theina ding un.

²⁴ Ka hil la hi, ka mi chialte pakhat chânle ka gualvâkna an ne pua’n au, a ti tai,” a tia.

Nungzui Hi’na ding Dan

²⁵ Mipi tam tak tawh a kiton lai un, ama chu a hung kihei ah, a kiang un:

²⁶ Kuale, a pate, a nute, a jite, a chate, a suapite, a suapinute leh ama hinna natiangle haw diak lo chu ka nungzui hithei pua’n au.

²⁷ Kuale ama kros kiput ah ei zui lo chu ka nungzui hithei pua’n au.

²⁸ Nanghaw lak ah kua’nle Insâng sak gaw leu chin, sak zawna ding khop sum la nei leh neilo uh he dingin, chutmun ah a man ding jat sût masa lo ding kua a hem um?

²⁹ Achutiloleh, dân leh a In suangphûm lem zo zet in, zo zo lo in hung um taleh, mi a hung mu zosia’n nuisan intiu in,

³⁰ Zia pa hin a Insak a pan zet ah, sak la a sa zo ta pua’n, ti’n au.

³¹ Ahiloleh, leng pakhat chu leng dang do dingin kisa hen la, mi sîng ni tawh hung kuan ding chu, ama’n sîng khat tawh a la do zo ding a hileh hilo, kichu zet in ngaitua masa lo ding a hem?

³² Chuti a hilo vânglak leh, leng dang chu gamla tak ah a um lai in, kichamna thu gen dingin palai sawl in a.

³³ Zia gual ma chun, kuale a nei zosia nusia ngam lo chu ka nungzui hitheilo ding ahi.

Chi Tekhinthu

³⁴ Chi hi a phai, a hinla, chi le a dau tak leh bangin hi al kit thei ding a hem?

³⁵ Leiphatna dinginle panna nei ta pua’n tin, êknin dinginle panna nei ta pua’n ah; tichun, min a paimang ta sek ui. Kuale nakhang nei chun he tau hen, a tia.