LUKA 12 - PATHIAN LEKHABU THIANGTHO (BSI)

A Lêm ah Pha Demna

¹ Zia nung ah chun mipi sim sên lo ding hial tam tak hung khawm in, a kiphu mên mûn ziang tau ah; a nungzuite kiang ah chun: Pharisaite phatlêmna thawi lak ah chun chingthei un.

² Puandaw lo ding ah îmgûk bangma a um pua’n, suklat lo ding ah sêlgûkle bangma a um diak puai.

³ Thim lak ah la gen uh chule vâk ah ngaithâk hi’ntin, pindan sunggil ah gûk ah mi nakhang ah la genteu chule Inchung vûm ah kikopi hi’n a.

Hangsan tak ah Kiphuang Ding ah Hilna

⁴ Gualte haw, ka hil la hiu, taksa that ah, zia nung ah chu bangma law thei talo chu lau kiu inla;

⁵ la lau ding uh chu ka hun hil masa ahi: A hun thalup nung ah le gawtmun ah hun pai lut thei nalai chu la lau diu ahi.

⁶ Vachong panga paisa ni ah a zuak sek uh hilo a hem? Himaleh, a lak ua pakhat chale Pathian in a hemil kha a hem?

⁷ La samzang zosiau hile sim suak dim diam ahi. Ziaziakchun lau kiu in, vachong tam tak sâng ah lûlzaw ma ma la hiu.

Ngaidam theilo

⁸ Zia hile ka hun hil la hiu: Mite ma ah ei panpi chu, Mihing Chapa hin Pathian vansawlchâkte ma ah panpi ding ahi.

⁹ Himaleh, mite ma ah ei kilepsan chu, Pathian vansawlchâkte ma ah kilepsan ah um ding a hiu.

¹⁰ Mihing Chapa demna thu gen tapo chu ngaidam thei hi’ntin; Thagau Thiangto demsia chu vang ngaidam thei hipua’n a.

¹¹ Chuleh, sunagog ah a hun pui ua, thuneite leh vaihawmte ma ah a hun pui phat ua leh le, bang ka gen in, bangti’n ka dawnhu diam ti ngaitua in lungkham kiu in.

¹² Thagau Thiangtho chun a hun hun in la gen ding uh chu hun hiatsak ding ahi, a tia.

Mihausa Ngol Tekhinthu

¹³ Mipi lak ah kua a hem khat in Jesu kiang in, “Hotupa, ka suapipa go ei hawm dingin ei gen piak in,” a hung tia.

¹⁴ Ama chun a kiang in, “Lawm, la chung ua vaihawm ding leh thil hawm piak dingin kua’n ei guat ah a hem?” a tia.

¹⁵ Chuleh, Jesu chun, a kiang un, “Chingthei un! Huaihapna lak ah chun kiveng un! Nei leh lam leh thil hauna mai hi mihing dampi pen ahi puai,” a tia.

¹⁶ Tichun, a kiang un tekhinthu a gen a: “Mi hausa kua a hem khat in louma suak tam tak a nei in.

¹⁷ Zia gual hin a hung kingaitua ah, ‘Ka bu leh bâl koikhawmna ding a kiting ta pua’n, bangti’n ka bawl ta dia aw?

¹⁸ Zia gual hin a ngaitua ta’n, ka bu In hi phetha’ng ka tin, a lianzaw’n sa’ng ka tin; zia tak ah chun ka bu leh bâl leh ka thilte chu koikhawm ing ka tin;

¹⁹ zia tak chuleh ka thagau kiang in, ka thagau, kum tam tak â dingin la kholdok tai, tun vang chawldam ta’n; ne’n la, dawn inla, nuam tak in um ta’n, ti’ng ka” a ti tai.

²⁰ Himaleh, Pathian in a kiang in, “Mi ngolpa! Tu’jan ah hin la hinna la ding a hiu. La thil guanggalte chu kua â ding a hita diam?, a ti’n.

²¹ Mi ama â ding bep ah go khol khawm ah, Pathian lam ah hausa lo chu, zia gual chu hiding a hiu,” a tia.

Lungkham lo Ding ah Hilna

²² A nungzuite kiang in, ziaziakchun ka hil la hiu: La hinnau, la nêk diu, la taksau leh sil leh chên ding ngaitua in lungkham kiu in.

²³ Hinna hi nêk ding sâng in a thupi zaw’n, taksa hile sil leh chên sâng in a lopi zawi.

²⁴ Va-akte hi ngaitua tiam un: Thâi a ching ngai puau in, lâkle a lakhawm ngai puau hi; bu In leh bupang le a nei diak puau hi; himaleh, Pathian in a vâk tho hi. La hinnau chu vachate hinna sâng in a lûl zaw na lawm lawm e!

²⁵ Aleh, la lak un, nangmau kingaitua hat ziak ah dunglam tong khat kibelap thei la um awm?

²⁶ Zia a neupen chu bawn hi’theilo in, bangatia thil dang la lungkham sek awm?

²⁷ Lili pâk khan dan hi ngaitua tiam un; na a sêm puau in, patle a khêk ngai puau hi; himaleh, ka hil la hiu, Solomon ngeile a lopina zosia a kivan khan, zia lili pâk pakhat hile a tuk zo puai.

²⁸ Hampa, gamlak ah ni khat um ah a jing ah keugawp kit ah, thukkhûk ah pai ziang ding bawn, Pathian in zia gual lawm ah hi a chei chun, aw nanghaw, ginna nei zolote haw, nang uh hi bang gual bep in a hun chei zaw ta diam?

²⁹ Ziaziakchun, nêk leh dawn ding mai buaipi kiu inla, lungkham kiu in.

³⁰ Zia thilte zosia hi khawvel ah namtin in a hawl ui; himaleh, la Pau chun la mamawu zosia chu a henai.

³¹ Tichun, Pathian gam chu hawl masa leu chin, zia thil zosia chule piak belap in um in lau.

Van ah Go Khol Ding Ahi

³² Lawi tawmchate haw, lau kiu in; lenggam hun piak ding hi la Pau kipakna lam tak ahi ngal a.

³³ La thil neiteu chu zuak un la, gentheite kiang in piau in; Paisa dip lui theilo chu kingaituau inla, guchate’n le a nai theilonau, a nget inle a nêk siat theilona van ah chun khol khawm zaw tau in.

³⁴ La go umna taphot un la lungthim uh le um ding ahi ngal a.

Suak Kiging Zing

³⁵ La kawng uh gâk unla, la thaumei uh vâksa’n um un;

³⁶ a pu mo lawm ah chia hung tun kit hun ding helo ah ngâk, a suakpa gual in kiging zing in um un; ama chun a pu a hung ah kotkhak a hun kiu phat leh, hon piak ziang thei dingin a la um sek ahi kha.

³⁷ A puu a hung phat ah, kigingsa a la um zing a suakte chu mi hampha ahi nau e! Titakzet in ka hil la hiu, zia gual mi chu a kawnggâk sa’n a um in, an ne dingin a kichutsak in, a hung pawt ah, a nêk leh châk ding bawl in a um sek hi.

³⁸ Jankhang ah hung in, phalvak ding kuan ah hung ziang leh le, zia gual ah a hun tuakkhâk a suakte chu a hamphau hi.

³⁹ Zia hi hiau in, Inneipa chun gucha hung ding hun chu a la he masa leh, a la kiging intin, a In chu suksiat sak lo ding ahi.

⁴⁰ Zia gual tak ah chun, nang uh le kiging zing in um un; Mihing Chapa chu la ginchâk lo lai tak un hung ding ahi, a tia.

Suak Ginum leh Ginum lo

⁴¹ Peter in, “Lalpa, zia tekhinthute hi keimau haw bep a hem lei hil, mi dang zosia le?” a tia.

⁴² Lalpa chun, ahileh, suak ginum leh sepkol ginum, a pu’n a Insung hotu ding ah a guat ding leh, a hun tak ah a nêk ding uh ngaitua tûp piak sek ding chu a kua pen chu ahi diam?

⁴³ Suak, a pu’n zia gual ah a la bawl lai tak a hun tuakkhâk chu a hampha ahi.

⁴⁴ Thu dik tak la kiang un ka gen ahi, zia pa ngei chu a nei zosia chung ah thunei pen in hun koi in a.

⁴⁵ Ahi’n, zia suakpa chun a lungthim in, Ka pu chu hung vak pua’n tin, ti hen la; a suak chanpite chu a numei a pawsal in a la jep ta hen la, ne leh dawn in a la kham ta leh;

⁴⁶ zia suakpa pu chu, a kigin lo lai tak leh a ginchak lo lai tak in hung phut ta leh, ama chun sâttel intin, mi ginumlote lak in koi ta’n a.

⁴⁷ A pu lung lam he ma ma ngal ah, ama â ding leh a pu lung lam le bawl ngai diak lo suakpa chu, tam vei tak vok hiding ahi.

⁴⁸ Himaleh, a la helo him him leh, vokna ding tiang bawl a la um chun, awlcha vok hi’n a. Tam tak kipete chun tam tak a piak uh ngai in tin, tam tak kikolsakte kiang ah chun tam tak kiphût ding ahi.

Jesu Chu Inkuan Kikhenna ahi

⁴⁹ Leichung ah mei ko tha ding ah hung ka hi, tu’ ma ma hin kâng ziang ngal leh ka tina lawm lawm e!

⁵⁰ Baptisma chan ding ka nei nalai in, zia chu a kichai masia chu ka lung a ki-ipna lawm lawm e!

⁵¹ Lei ah chamna lensak ding ah hung hiding in lei gingchau em? Ka hil la hiu, hilo hial, kikhenna umsak ding ah hung ka hizawi!

⁵² Tu’kipat hin In khat ah mi panga umna’nle pathum langpan intiu in, panite tawh kilang intiu in, panite chunle pathumte chu langbawl in au;

⁵³ kilang bawl chiat intiu in: Pa chun chapa lang intin, chapa chunle a pa lang intin; nu chunle a chanu lang intiu in, chanu chunle a nu lang in au; mo chunle a talpinu lang intin, talpi chunle mo chu lang in a, a tia.

Hunbî Tepte’na

⁵⁴ Mipite kiang ah chun thu a hun gen kit a: “Tumlam ah kipat sûm a hung pawt tak leh, ‘Gua hung zu ding ahi’ la ti pai sek un; a hung zu sek ngei hi.

⁵⁵ Simlam hui a hung hân tak leh, ‘Khua hung lum ding ahi tai’ la ti kit un; zia chule a hung dik sek hi.

⁵⁶ Nanghaw miphalêmte haw! Khua leh van umdante hawle la hethiam ui; bangtidan ah hun umdante hi hethei lo la hiu em?” a tia.

Kilanpi Tawh Kilep Ding

⁵⁷ Ahileh, bangatia nangmau â ding ah thil dik chu ngaitua sek lo la hiu em?

⁵⁸ La kilanpi tawh vaihawmte ma ding ding ah la kiton lai un, kilemna ding ngaitua mai un; achutiloleh, vaihawmna la tun ngal ngal ua leh, vaihawmte chun miman hotu kiang ah hun pia’n tin, ama chun suangkul ah hun khum ding ahi.

⁵⁹ Ka hil la hiu, paisa khat tiang ah la piak thian masia hung pawtdok lo hial ding la hi, a tia.