KOLOSSA 3 - PATHIAN LEKHABU THIANGTHO (BSI)

Khrista Ah Hinna Thak Chu

¹ Chutichun, Khrista tawh kaithaw ah la um tâk uh chun, chunglam ah Pathian changlam ah kichû Khrista umna thil umte chu hawl un;

² chung lam ah thil umte ah chun la lungthim uh nga’n, lei ah thil umte chun kinga ta kiu in.

³ La thi tau ah, la hinnau chu Pathian ah chun Khrista tawh sêlgûk in a um tai.

⁴ Khrista I hinnau chu a hung kilat phat leh, nang uh le ama tawh lopi in kilang ding la hiu.

⁵ Chutichun, la taksau ah leilam thil doina umte hi that un: Tatsualnate, buaknate, huknate, nopna phalote, papnate, (papna chu milim hona ahi.)

⁶ Zia haw ziak ah hin Pathian lungnatna chu thu awilo chate chung in a tung sek hi.

⁷ Nanghaw le tu’ma zia thilte ah la hin lai uh khan, zia thilte chun la um sek uh kha.

⁸ Tu’hin vang, nanghaw’n le zia zosia chu: Lungnatnate, siatsonate, huatnate, gensiatnate, la kam ua zamawte hi tawh koimang un.

⁹ Zuau in kihotua kiu in, mihing lui chu a nasepte tawh la lîptha tau hi.

¹⁰ Mihing thak ah chun la kivan tau ah, zia mihing thak chu het bukimna nei dingin, a siampa tawh kipua ah siamthak ahi.

¹¹ Zia chun, Grik mi leh Juda mi, zektan leh tanlo, pauchuam mite, Skuthi mite, suak leh suaklo le a um diak ta puai; Khrista chu bangkim hi jawn, bangkim in a um hi.

¹² Chutichun, Pathian mi têl, mithiangtho leh doitakte gual in lainatna lungthimte, hepinate, kingaitawmnate, thunuaigolnate leh thok-hatnate chun kivan tau in;

¹³ kidaw zo tua chiat in, kua’nle mi chung ah thubuai nei taleu chin, kingaidam tua unla; Lalpa‘n a ngaidam gual in kingaidam tau in.

¹⁴ Zia zosia chung ah chun hepina’n kivan tau in, zia chu kikân zopna bukim chu ahi.

¹⁵ Chuleh, Khrista lungmuanna chun la lunggil un vaihawm ta hen; zia gual ah chun um dingin taksa pumkhat ah ko la hi him uh ahi; kipakna châng he tau in.

¹⁶ Khrista thu chu tam tak in nangmau ah umsak un, pilna chitin ah kizilsak leh, kihiltua ah um in, kipakna lungthim tawh Pathian kiang in, pâkna La te, Pathian La te, thagau lam La te sa in;

¹⁷ la hi tapo uh thugen a hem, thil hi’ a hem, ama ziakin Pa Pathian kiang in kipak thu gen kawm in, Lalpa Jesu min in hiu in.

Khristian Insung Umdan

¹⁸ Jite haw, Lalpa ah la hiding ua kilawm gual in, la pawsalteu kiang ah kitulut un.

¹⁹ Pawsalte haw, la jiteu hepiu inla, a chung un engsiat bawl kiu in.

²⁰ Chate haw, bangkim in la nu leh pateu thu awi un, zia chu Lalpa kipak lam tak ahi.

²¹ Pate haw, la chateu hi’nuak kiu in; chutilochun lungthuai kha’n au.

²² Suakte haw, taksa ah la puteu thu bangkim in zawm un, mihing kipakna ding mai ah sêm hilo in, lungthim thua neilo in Lalpa lau kawm in zawm un.

²³ Bangkim la hi’tapo uh chu mihing â gual ah sêm lo in, Lalpa â ding gual zaw’n thanuam tak in sêm un.

²⁴ La kipakman diu goluana chu chang ding la hiu ti la hiau a, Lalpa Khrista na chu la sêm uh ahi.

²⁵ Thil diklo bawlpa chun a bawl diklo man chu mu kit in ah, kidoichuamna him a um pawngal a.