KOLOSSA 2 - PATHIAN LEKHABU THIANGTHO (BSI)

¹ Nanghaw leh Laodikia khua umte leh, taksa ah ka mêl mu nailote â ding ah bang gual tuk ah gim thuak ka hem ti, la het uh ka nuam hi.

² Pathian thugûk, Khrista ngei hi hetna a hun nei ua, hetchianna lam ah hausa tak ah a hung umtheina ding un, a lungthim uh tîlkho a hiu ah; hepina a kipumkhat theina ding uh chu ka doilam tak ahi ngal a.

³ Ama ah chun pilna leh hetna go zosia chu a kisêlgu ahi.

⁴ Zia hi kuama’n nialhat ah a hun thepzaw lona ding ua ka hun gen ahi.

⁵ Taksa ah la lak un umlo maleng thagau in ka um hi; la tat dan uh leh Khrista ah la ginnau det dan chu kipak tak in ka mu zing hi.

Khrista ah Hinna Bukimna

⁶ Ziaziakchun, Khrista Jesu, Lalpa chu la la pom tâk gual un, ama ah um zing un.

⁷ Ama ah zung kai leh lep to ah um in, zilsak ah la um gual un la ginnau ah chun det tak in um unla, kipak thu gen zing un.

⁸ Chingthei tau in, chutilochun, kua’nle Khrista thu lo gual in, mihingte thugosia leh khawvel thubulte gual in, a thupilteu leh thepna mai mai un gâllâk in hun la kha’n au.

⁹ Ama ah chun Pathian bukimna zosia chu taksa nei in a um zing ngal a.

¹⁰ Ama ah chun la bukim tau a; ama chu thuneina leh thilhitheina zosia luchang ahi.

¹¹ Ama ah chun nanghaw chu khut hilo ah zektan la hitau in, taksa ah gitlonate chu liptha’n, Khrista ah zektan la hitau a;

¹² baptisma ah ama tawh vui in la um tau a; zia ma ma ah chun mithi lak ah kipat Pathian nasep ginchâk ziakin, ama tawh kigual in kaithaw la hitau hi.

¹³ Chuleh, nanghaw la sukkhialnateu ziak leh taksa zektanlo ziak ah thi la hiu ah, nangmau ngei chu ama tawh a hun suk-hin kit la hi tau hi; I sukkhialnau zosia ei ngaidam ta ahi.

¹⁴ Batna lekha, thupiak ah kizik, I chung ua um zing, ei kãl sek chu a nuaimang tangal a; zia ngei chu kros ah kilden in a hi’bei tai.

¹⁵ Thuneina leh thilhitheinate chu liptha’n, kros ah chun ziate chu zo in kilang tak in a etsak tai.

¹⁶ Chutichun, nêk thu leh dawn thu a hem, kût ni thu a hem, tha thak thu a hem, sabbath thu a hem in kuama’n hun dem dâ tau hen.

¹⁷ Zia haw chu thil hung tung dingte lîm ahi; a tak vang chu Khrista ahi.

¹⁸ Kuama’n amau doilam thu bep ah kingainiam leh, vansawlchâkte biakna’n la kipakman uh hun lâkpiak kiu hen, a thil mu teu chu pansan in a taksa lam lungthim ua kisathei in,

¹⁹ luchang ah chun, taksa bâk chuam chuam kizom khawm leh kipetua in, Pathian ah chun a khanglian jel uh ahi.

Zilsakna Diklo ah Kipat Hilna

²⁰ Khawvel thubulte chu Khrista kiang ah la thisan ua leh, bangatia khawvel ah hing nalai gual ah thupiakte ah chu kipelut kit la hiu em?

²¹ Sukha kin, tep kin, khoi kin tite hi.

²² Ziate chu I mat zaw leh mangthai ding ahi; mihingte thupiak leh thugin mai ahi.

²³ Zia gual thilte chu, nop dan ah biak leh, thunuaigol leh taksa engbawlna hi a phachuam gual in kilang maleh, taksa nopna lam dâlna dingin vang a phatchuamna a um puai.