KÂ LATE 1 - PATHIAN LEKHABU THIANGTHO (BSI)

Zion Siatna leh Thawmhauna

¹ Bang ding ah khawpi, mipi ah dim kha, thawmhau tak ah chu mai! Namte lak ah lopi tak ah um kha, bangtidan ah meithâi gual ah, hung um mai a ta’m! Gambung chung ah lengnu chu, Sia’mâng lakah khat gual bep in a um tai.

² Jankhua’n a kap ngawi ngawi ah, a biang ah mitthitui luang kawm in; a gual ngaite lakah ama thamuan ding, khatle a um puai; a lên gualpi zosia’n a lepbawl tau in, a kilanpi’n a hung pang tau hi.

³ Judah chu sal ah puimang ah um in, genthei tak ah na sepsak ahi tai; nam dangte lakah um in, chawldamna him a nei puai; ama hun delte chun a lungdon lai tak in, a hun delpha tau hi.

⁴ Zion zotna lampite chun a sûn ui, kuama kût mang ding a chia tâk lo ziak un; a kul kotkhak zosiau a thawmhau ta’n, a thiamputeu le a thûm tau; a nungakteu a lungkham tau a, a vang uh a se ta luai.

⁵ A gâlteu chu a hotuu a hung hiu a, a mêl huatteu chu a lawting tau hi; a gitlonau nasat bêk ziakin, Lalpa‘n a thoksak ta’n; a chateu chu a gâlteu âng in, sal ah pui in a um zo tau hi.

⁶ Zion chanu chu a hoina zosia’n a nusia tai. A lalteu zosia le sazukchal, hampa mu zo lo gual in a um tau a, a delte âng ah chun hatsam in a jam ui.

⁷ Jerusalem in a lungdon tawp khawk ni hin, masang lai ah a vâkvai lai nite kha a hezing hi. A sung ah mipite a gâlteu khut ah a pûklût phat un, amau panpi ding a um ta pua’n; nuaisia ah a umnau chu a mêlmateu in, musit tak ah nuisan in a en zing ui.

⁸ Jerusalem chu lungkham um tak in a gitlo tâk ziakin, nuisan ah hung um ahi; ama ja zosia’n a simmaw tau a, a ngawnchang hi’na a mu tâk ziak un; lungngai in a thûm ta’n, a mai a sêlmang tai.

⁹ A buakna chu a nîk in a bek ah, a khawnung thu ding bangma a gêl puai; a kiak niamna chu huaisia tak ahi, a thamuan ding khat le a um puai. “Aw Lalpa, ka haksat dan hi hun en tiam in, mêlmate’n ei tawden tau hi!” a ti’n.

¹⁰ Mêlmate’n a go thil zosia chung in a khut uh a jak khum un; a mun thiangtho nam dangte, lut a phal lona mun chu nam dangte chun, a sim tau hi.

¹¹ A mipite’n dip dap in an a hawl un; a hatnau hi’halna dingin, a go thil lûl tak teu a zuak tau. Aw Lalpa, en tiam in, bang gual bep ah man tawm ka hitau em!

¹² Nanghaw lampi vak lumlette haw, nang uh â ding ah bangmalo hiziang a hem? Ei hun en tiam un, ka chung ah lungngaina tung, Lalpa‘n a lungnat hun ah, ka chung ah a hun tunsak gual hi, a um ngai diam?

¹³ Chung lam ah kipat in mei a hun sawl ah; ka gu sung in a lût ah; ka kengte â dingin lên a jak ah, ei kiheisak kit tai; chau leh basam ah nitum ah um dingin ei nusia tai.

¹⁴ Ka bawsiatnate ziakin, ngawngkol tawh hêndên ka hi’n; a khut in ei kân khawm a; ka ngâwng ah bât in, ka tha zosia a ke tai; ka nan zaw lo dingte khut in, Lalpa‘n ei pedok tai.

¹⁵ Ka gâlhatteu Lalpa‘n bangmalo a sua in; ka tangvalteu hi’chimitna ding, hunbî a pua’n khum tai; nungak thiangtho Judah chu, grep sûkna khûk ah, chil in a chuanchil tai.

¹⁶ Zia thilte ziak hin ka kap in; ka mitthi tui a luang hi; thamuantu ding leh ei hi’hat ding, a gamlat tâk ziak in; mêlmate’n ei nuaisia tâk ziak un, ka vonchoiteu nutsia in a um zo tau.

¹⁷ Zion in a bân a jakdok ah, a thamuantu ding la kuama umlo; Lalpa thupiak ah Jakob do dingin, a Invêngte zosia dogâl a suak zo tau hi. A lak un Jerusalem chu, buaksia gual a hung hi tai.

¹⁸ Lalpa vang a dik hi, a thupiak dodâl in ka la hel ta mai un; himaleh, ngai un, ka mipite haw, ka genthei dan hi ngaituau in; ka nungakte leh tangvalte sal in a tâng zo tau.

¹⁹ Ka ngainatte chu ka ko ah, himaleh, ei kilepsan tau; ka thiampute leh upate chun, amau hi’hal ding an a hawl lai un, khawpi sung in a thiden tau.

²⁰ Aw Lalpa, en tiam in, bang gual lawm ah lungdong ka hi tam! Ka gilpi a kichok in, ka lungchang a kichok ziang tai; la chung ah ka la hel nasa ta law tau hi. Kotzing ah chemjam in lusûnna a tut in, Intin ah thi’na ngen ahi kit hi.

²¹ Ei thamuantu ding umlo ziak ah, ka thûm dan a he ngâl un. Ka mêl huatte zosia’n, ka buaina a hechiat ui; zia hi nangma bawl ahi ti, a het ziak un a kipak ma mau hi. La puan tâksa ni ah chun tun sak inla. Keima tuak hi amau le tuak sak in

²² A gitlo’nau zosia la kiang tung hen la; ka bawsiatna zosia ziak ah, ka chung ah la bawl gual hin, amau chung inle bawl in; ka thûmna a tam ta’n, ka ngaituana le a chau zo tai.