JOSHUA 8 - PATHIAN LEKHABU THIANGTHO (BSI)

Âi Khua Lâkna Leh Suksiatna

¹ Ziaphatchun, Lalpa‘n Joshua kiang in, “Lau kin la, lunglel diak kin; gâl kap thei zosia pui inla, tu’hin Âi khua chiatopi ta’n. Ngai in, Âi khua lal leh a mite, a khawpi leh a gam zosiau la khut ah ka hun piak ahi tai.

² Jeriko khawpi leh a lengpau chung ah la bawl gual in, Âi khua leh a lengpau chung ah le bawl ding la hi’ngâl ah; gâl lâk thil leh gancha zosia chu la chan ding un chawm gam tau in. Khawpi nung lam ah kipat bulu dingin a chângpang koi in,” ti’n a gen a.

³ Chutichun, Joshua leh gâl kap thei zosia chu Âi khua sim dingin a kuan tau a. Joshua’n gâl hangsan mi sîng thum a teldok ah, jan in a sawldok ta’n,

⁴ a kiang un, “Khawpi bulu dingin a nung lam ah a la pang unla; khawpi ah kipat gamla tak in chia mang kiu inla, la leng un kiging zing in um un.

⁵ Keima leh ka kiang ah um zosia’n khawpi chu hun zuan ing kau. Tu’ma lam ah gual tho khan, ei do ding ah a hung kuan phat uh leh jam mang ing ka tiu in.

⁶ Khawpi hun pawtsan ah ei hun deldok masiau jam ing ka tiu in; zia phat chuleh, amau in, ‘Tu’ma gual khan I ma-âng un a jam jak kit zo tau,’ ti ta’n au. Amau in ei hun del zui phat uh leh,

⁷ a nung lam ua la chân-gûknau mun chiat ah kipat hung pawt in, khawpi chu la hun bulu ding uh ahi; Lalpa la Pathian un la khut un hun pia ding ahi ngâl a.

⁸ Chuleh, khawpi chu la lak zaw phat uh leh, Lalpa‘n thu ei piak dungzui in, ngai un, thu ka hun pia ta la hiu, khawpi chu mei in la hâl tum diu a hi”; ti’n thu a pia tai.

⁹ Zia gual ah chun Joshua’n amau chu a sawldok ta’n; Âi khua tumlam kâi ah, Bethel leh Âi khua kikâl ah chân-gûkna mun zuan in a chia tau ah; zia jan ah chun Joshua chu giamun in a giak tai.

¹⁰ Jingkal phatin Joshua chu vaima tak ah tho in, mipite a ko khawm ah, Israel upate chu tawh Âi khua lam zuan in mipite ma-âng in a chia tau a.

¹¹ A umkhawmpi gâldo mi zosia chu tawh kiton in, ma lam hun nai in, Âi khua mallam kâi ah chun a kisel tau ah; guam khat in Âi khua tawh amau chu a hâl tau hi.

¹² Mi sang nga vêl pui in, Âi khua tumlam kâi ah Bethel leh Âi khua kikâl ah chânggu ding a koi a.

¹³ Sepaite chu a umna ding chiat un a koitup zo ta’n, sepai tam zaw chu khawpi mallam kâi in a koi ah, a nungdâlte chu khawpi tumlam kâi in a um ui. Ahi’n, zia jan ah chun Joshua chu phâiguam ah chun a giak a.

¹⁴ Âi khua lengpa’n a hun gâl mu phat in, Israelte do ding in Arabah jawn lam ah chun ama tawh, a mipite leh khawpi sung ah chêng zosia chu jingkal vaima tak in a kuandok tau ah; himaleh, khawpi nung lam ah amau chânggu lawi um a hiu ti lam him him a he puau hi.

¹⁵ Chun, Joshua leh Israelte zosia chu zawsa gual ah um in, gamthip lam zuan in a tai mang zo tau a.

¹⁶ Khawpi sung ah um zosia amau delzui dingin a kikokhawm tau a. Joshua a delzui lai un, khawpi ah kipat gamla deu tak a hung taidok tau a.

¹⁷ Âi khua leh Bethel khua chun Israelte del ding ah hung taidok lo pakhat chale a um ta puau; khawpi chu kihongsa nusia in Israelte chu a del zui tau a.

¹⁸ Ziaphatchun, Lalpa‘n Joshua kiang in, “La khut ah chemjam chu Âi khua lam in lek ta’n; zia khua chu la khut ah hun pia ding ka hi’ngâl ah,” ti’n a hun gen ta’n. Tichun, Joshua’n le a khut ah chemjam chu khawpi lam in a vak lek tai.

¹⁹ A khut a hun lapdaw phatin, a chânggu lawi zosia kha a kisêlnau mun chiat ah kipat hung pawtdok in, khawpi hun zuan in, a sung ah a lût un, a la ngâl tau a; chuleh, khawpi chu a hâl kuang ngâl tau a.

²⁰ Âi khua mite’n a vak nung et kit phat un, khawpi kângkhu chu van lam in a kitung to luai luai mai ta’n. Gamthip lam ah jamte khan amau a hun le’del kit tau a; tichun, khoilam lam ah le zamdawna ding tha leh zung a nei ta puau a.

²¹ Joshua leh Israel mipite’n, a chânggu lawi in khawpi chu la zo ah, mei ah a hâlnau khu kitung to chu a mu phât un, kinung hei vak in Âi khua mite chu a hun that tau a.

²² Chuleh, a dangte le amau do dingin khawpi lam ah kipat in a hung pawtdok ua; tichun, pakhat chale a suakcha leh a hing um lo in Israelte chun a that gam tau hi.

²³ Himaleh, Âi khua lengpa chu a hing in a man ua, Joshua kiang in a hun pui tau a.

²⁴ Chuleh, Israelte’n amau gamthip ah a delnau mun ah, Âi khua mite zosia a nunung pen tiang ah chemjam ah a thalup zaw phat un, Israelte zosia chu Âi khua a chia kit ua, khua sung ah umte chu le chemjam in a va that gam sik sek tau a.

²⁵ Zia ni thi zosia chu numei leh pawsal kigawm in, sîng khat leh sang ni a hiu ah, a leng un Âi khua chêngte ngen a hiu.

²⁶ Âi khua chêng zosia a tha gam suak masiau, Joshua’n a chemjam jukdawsa kha a koitha paw’ngâl a.

²⁷ Lalpa‘n Joshua kiang ah thu a piak gual ah, zia khawpi sung ah gancha leh gâl lâk thilte bep Israelte’n a kilâk tau a.

²⁸ Chutichun, Joshua’n Âi khua chu a hâl tum ta’n, tu’ni tiang ah thilsia kipaikhawmna’n a siam tai.

²⁹ Chun, Âi khua lengpa chu nitâk lam in thinglêk in a khailum ta’n; nisa tum jul in Joshua’n thu a piak dungzui in thinglêk ah kipat in a latha tau a, khawpi kul kotbul in a pai ua, a chung in suang a siavum tau ah, zia chu tu’ni tiang hinle a um nalai hi.

Joshua’n Thuthung siamthak

³⁰ Chuleh, Joshua’n Lalpa, Israelte Pathian â dingin Ebal tâng ah chun mâichâm khat a siam ah,

³¹ Mosi dan lekhabu ah Lalpa suak Mosi’n Israelte thu a la piak, “Suang kisêk hilo, chuleh a chung ah thîk matchâk him him kilek kha lo in mâichâm siam in,” a la ti gual ah kisiam chung ah chun Lalpa â dingin hâlmang thilpiak leh kichamna thilpiak ah kithoina chu a lân tau a.

³² Zia tak ah chun, Israelte zosia ma-âng ah chun Mosi’n dan thu a la zik dawsa haw chu Joshua’n suang ah chun a ziksawn kit ta’n.

³³ Israel mipi zosia, gam dang mi leh gam ah chêngsa zosia, a upateu tawh puituteu leh vaihawmteu zosia chu, Lalpa thuthung thingkuang jawn thiampute ma-âng ah chun a ding khawm tau ah; a kimkhatte chu Gerizim tângpang ah chun a ding un, a kimkhatte chu Ebal Tângpang ah chun a ding un; tichun, Lalpa suak Mosi’n Israelte chu a maljawl phot ding uh ahi ti thu a piak tâk gual ah khan.

³⁴ Chun, ziazaw chun, dan thu zosia, dan lekhabu ah chuang zosia gual in, maljawlna thu leh hânsia lawna thu zosia chu a simdok a.

³⁵ Mosi thupiak zosia chu Israel pungkhawm zosiate leh numei leh chapang neucha chate leh, gam dang mi a lak ua chêngdente ma-âng ah chun Joshua’n simdok lo him him a nei puai.