JOSHUA 7 - PATHIAN LEKHABU THIANGTHO (BSI)

Akan Gitlona Leh A Gawtna

¹ Himaleh, Israel chate’n hânsia lawkhumsa thilte ziakin a ginnau a la susia kha tau ah: Judah phung ah mi, Zerah chapa Zabdi chapa Karmi chapa Akan in hânsia lawkhum sate lak ah kipat bang a hem jat a la kilâkdaw ta’n; tichun, Israelte chung ah Lalpa a lungna ta’i.

² Joshua’n Jeriko khua kipat in Bethel sualam ah Beth-aven kiang ah Âi khua lam in mi a sawl ah, a kiang un: “Vachiau inla, gam chu va enthau in,” a tia. Tichun, a chiau ah, Âi khua chu a vaen tha tau a.

³ Joshua kiang in a hung kit ua, a kiang in, “Mi zosia chia a ngai puai; mi sâng ni a hem, sâng thum a hem chia ah, Âi khua chu valâk mai ding ahi. Mi tawmcha a hiziak un, mi zosia va kisukbuai sak lo mai in,” ti’n a gen tau a.

⁴ Chutichun, mipite lak ah sang thum ding vêl bep a vachia to ua; ahi’n, Âi khaw mite chun a hun del jak tau a.

⁵ Âi khua mite chun mi sawmthum leh guk ding vêl hial chu a la that tau ah; kul kotkhak bul ah kipat Shebarim tiang in a hun del ua, tângpang ah a hung jamna lam ua a thau ahi. Mipite chu lungthuai in a zawitha tau hi.

⁶ Ziaphatchun, Joshua chun, Israel upate tawh a puanteu botthêk in, Lalpa thuthung thingkuang mai ah bokkhup in a mâi ua lei tual si hial in a luchung ua leivui kibuak khum in, nitâk lam tiang in a bokkhup tau a.

⁷ Joshua chun, “Tamaijen, Lalpa PATHIAN! Amorte khut ah sukmangthai ding bep ah, bang ding ah zia mipite hi Jordan lui gâl la pui kâi khel khel ahi tam? Bang ding ah Jordan lui gâl lam ah khan lungawi tak ah a la um zaw mai lo ka hitau em!

⁸ Aw Lalpa, Israelte a mêlmateu ma-âng ah a jamsiat tâk mai uh hi bang gen ding ka hi tam!

⁹ Kanaan mite leh zia gam ah um zosia’n hun hia’n tiu in, ei hun ûm in, lei chung ah kipat ka min uh hi’mangthai zo ding a hitau hi. Zia phat chuleh, la min thupi tak chu bang la law ta diam?” a ti tai.

¹⁰ Lalpa‘n Joshua kiang ah chun, “Ding in! Bang ding ah la mai ah leitual si’ bokkhup zing la hi em?

¹¹ Israelte’n thil a hi’khial tau ah; ka thuthung vop phat ding ka ti chung in a talêk ua; thilpiak khen khat a kilak ua, a guu ah, lepchia tak in a tawi un, amau thil neisate lak in a koikhawm tau hi.

¹² Ziaziakchun, Israelte chun a mêlmateu zo thei ta pua’n au; amau chule suksiat ding ah hânsia kilawkhumsa gual in a kisiam tâk ziak un, a mêlmateu âng ah jamsia zaw ta’n au. La lak ua kipat hânsia lawkhum sate chu la sukmangthai masang siau hun umpi talo ding ka hi.

¹³ Mipite hi hi’thiangtho phot mai in, a kiang un, ‘Jing â ding in kisuthiangtho un; Lalpa, Israelte Pathian in zia gual hin a gen ngâl ah: Aw Israel, la lak un thil thianglo a um hi; la lak ua kipat thil thianglo chu la lâk mang masang siau, la mêlmateu zo thei ta pua’n lau.

¹⁴ Jingkal leh a phung a phung in la hung ding uh ahi. Lalpa‘n a mat khâk phungte chu a be’ a be’ in hung uh hen la; chuleh, Lalpa‘n a mat khâk be’te chu a Inkuan kuan un hung uh hen la; a Inkuan uh Lalpa‘n a mat khâkte chu a mi mal mal in a hung ding uh ahi.

¹⁵ Chun, kuale thil thianglo a la kilâk pen pen chun, Lalpa thuthung bawtsia’n, Israelte lak ah thil gilo leh ngolhuai tak a la bawl tâk ziakin, a nei zosia pum ah mei ah hâltum ding ahi,’ ti la gen ding ahi,” a tia.

¹⁶ Tichun, Joshua chu jingkal ma tak in a tho ah, Israelte chu a phung a phung in a hun pui khawm ah; chuleh, Judate chu matdaw in a um tau a.

¹⁷ Judah namte a hun puinai phatin, Zerahte chu mat daw in a hung um kit tau ah; Zerah bête lak ah a Inkuan kuan ua a hun pui nai phatin, Zabdi Inkuante chu mat daw in a um kit tau a.

¹⁸ Chuleh, a Inkuante chu a ban ban ah a pui nai phatin Judah phung ah Zerah chapa, Zabdi chapa, Karmi chapa Akan chu mat daw in a hung um tai.

¹⁹ Ziaphatchun, Joshua’n Akan kiang in, “Ka chapa, Israelte Lalpa Pathian chu chawihoi inla, a kiang in kiphuang mai in. Bang a la bawl khâ la hita em? ti, tu’ ma ma hin ei hil inla; ka kiang ah îm kin,” a tia.

²⁰ Chun, Akan in Joshua a dawnhu ah, “A dik hi; Israelte Lalpa Pathian chung ah thil bawlkhial chu keima ka hi. Thil ka la bawl chu zia hi ahi:

²¹ Gâllâk thil ah Shinar puan hoi tak leh, dangka shekel za ni leh sana tum shekel sawmnga ah gik ka mu phât in, ka en lâ ta lua’, ka la lâk mai ahi. A leng in ka puanbûk sung ah, lei nuai ah ka sêlgu’n, dangka chu a nuainung pen ah ka koi ahi,” a tia.

²² Tichun, Joshua’n mi a sawl ah, a mi sawlte chu puanbûk lam in a tai ngâl tau ah; a puanbûk sung ah a nuainung pen ah dangka chu sêlgu’n a la kikoi tai.

²³ Puanbûk ah kipat hun ladok in, Joshua leh Israelte zosia kiang ah chun a hun chawi tau ah; chuleh, Lalpa ma-âng in a koi tau a.

²⁴ Ziaphatchun, Joshua leh a kiang ah Israel zosia chun Zerah chapa Akan chu dangka tawh, puan tawh, sana tawh, a chapate leh a chanute tawh, a bawngchalte, a sabiltungte, a belamte leh a puanbûk leh a nei leh lam zosia a puau ah; Akor phâicham tiang in a pui tau a.

²⁵ Joshua’n a kiang un, “Bang ding ah ka chung ua buaina tunsak la hi em? Lalpa‘n tu’ni hin la chung ah buaina a hun tunsak ahi tai,” a tia. Chuleh, Israel mipi zosia’n suang in a sep tau ah; ziazaw ah chun mei ah hâl tum in, suang a sep khawm nalai un;

²⁶ a suang sia vûm uh chu tu’ni tiang hin a um nalai hi. Zia phat ah chun, Lalpa lungnatna a dai tai. Ziaziakchun, zia mun chu tu’ni tiang in, Akor phâicham, ti min putsak den in a um tai.