JOSHUA 6 - PATHIAN LEKHABU THIANGTHO (BSI)

Jeriko Khua Suksiatna Leh Lâkna

¹ Jeriko khawpi ah mite chun, Israelte a lau ziak un kot a kisungkam khum tau ah; kuama a pawtdok le a um ta puau hi.

² Lalpa‘n Joshua kiang in: “En tiam in, Jeriko khawpi tawh a lengpau leh a sepai zosiau chu la khut ah ka piak a hitau.

³ Gâldo mite tawh a khawpi chu khatvei la vêl suak diu ahi. Zia gual ah chun ni guk sung la bawl ding uh ahi’n;

⁴ belamchal kî pengkul sagi chu thiampu sagite chun khat chiat ah chawi in, thuthung thingkuang jawnte ma-âng ah chun a chia ding uh ahi. A ni sagi tin ni leh zia khawpi chu sagivei vêl suak unla, thiampute chunle a pengkul uh mût chiat uh hen.

⁵ Belamchal kî pengkul a hun mût hâm veng veng uh la het phat uh leh, mipi zosia chu ngai tak in kiko chiat un; ziaphat chuleh khawpi kulbâng chu chimtha gei gui intin, mipite chu amau jawn chiat un lût ta’n au,” ti in.

⁶ Tichun, Nun chapa Joshua chun thiampute chu a ko khawm ah, a kiang un, “Thuthung thingkuang chu jawn unla, thiampu sagi in Lalpa thuthung thingkuang ma lam ah chun belamchal kî pengkul sagi chu chawi in chiau hen,” a tia.

⁷ Chuleh, mipite kiang ah chun, “Ma lam zuan in chia pek unla, khawpi chu vêl suak un; gâlvan chawite chu Lalpa thuthung thingkuang ma lam in chiasak un,” a tia.

⁸ Joshua’n mipite chu thu a piak zaw phatin, thiampu sagite chun Lalpa ma âng ah belamchal kî pengkul sagi chu chawi in, ma lam zuan in a chiau ah, a pengkul uh mût malam pek in Lalpa thuthung thingkuang jawnte chun a zui pek tau hi.

⁹ Pengkul mut thiampute ma-âng a chun gâlvan chawite chu a chiau ah; a nungdâlte chun thuthung thingkuang chu a hun zui ua pengkul chu chawl lo in a mût tau hi.

¹⁰ Joshua’n zia gual hin mipite chu thu a hun pia’n: “Kiko un, ti ah thu ka hun piak ni a tun masang sia, la kiko lo ding uh, husa le la neilo ding uh, la kam ua le thu a pawtdok lo ding ahi,” a tia.

¹¹ Chutichun, Lalpa thuthung thingkuang chu tawh khawpi chu khatvei a va vêl suak zaw phatin, a gia mun uh a tung kit ua, a giak tau a.

¹² Tichun, Joshua chu jingkal matak in a tho ah, thiampute’n le Lalpa thuthung thingkuang chu a jawn pan ngâl ua.

¹³ Thiampu sagi, belamchal kî pengkul sagi chawite chun a pengkul uh mût pek in, Lalpa thuthung thingkuang ma lam ah chun a chia pek tau a. Chuleh, gâlvan ah kithuamte chu a ma lam ua chia in, a nungdâlte chun Lalpa thuthung thingkuang chu a hun del pek ua, pengkul chu a mût pek tau a.

¹⁴ Ni ni a tin ni chunle khawpi chu khatvei a va vêl suak kit ua; chuleh, a giamun uh a zuan kit ua. Zia gual ah chun ni guk sung a bawl tau a.

¹⁵ Chun, a ni sagi tin ni chun, phalvak in a tho ua, a bawl ngai un khawpi chu sagivei a vêl suak tau a. Zia ni bep ah chun khawpi chu sagivei a vêl suak ui.

¹⁶ Chuleh, a vêl sagi tin phat ah thiampute’n pengkul a mût phat un, Joshua chun mipite chu, “Kiko tau in! Lalpa‘n khawpi chu a hun pia tai.

¹⁷ Khawpi leh a sung ah thil um zosia hi Lalpa â ding ah piakdaw thian ah, hisiat dim dem ding ahi. Rahab nawchizuaknu leh a In ah umte cheng bep hawi ding a hiu, ama’n I mi sawlteu kha a la sêlguk ziakin.

¹⁸ Nang uh chu zia thil hânsia lawkhumsa lak ah kipat hin kikoi kâng unla, suksiat ding ah kipedoksate hi a la en lâ in, Israelte giamun hi hânsialaw ding ah siam in, a chung ah buaina tunsak khawlaw in lau.

¹⁹ Ahi’n, dangka leh sana, sum-eng leh thik tak ah kisiam, ûm leh bêlte chu vang Lalpa chanvo thiangtho ahiziak in, Lalpa sumbawm ah koi ding ahi,” a tia.

²⁰ Chutichun, thiampute’n pengkul a mût phat un, mipite chule a kiko tau a. Mipite’n pengkul git a het phat un a kiko chiat tau a; khawpi kulbâng chule a chimtha zung zung ta mai a; tichun, mipite chu a majawn chiat un a lut ua, khawpi chu a la tau a.

²¹ Ziaphatchun, khawpi sung ah um zosia, pawsal leh numei, chapang leh piting, bawngchal, belam leh sabiltung a leng un chemjam in a that gam sik sek tau hi.

²² Joshua’n gam vaentha ding ah a la sawlte ni kiang in, “Nawchizuaknu In ah valût unla, a kiang ah thutiam la bawl dungzui un, ama leh a nei zosia chu vapuidok tau in,” ti’n a sawl a.

²³ Gam entha vachia tangvalte ni chule a valut ua, Rahab tawh, a pa, a nu, a suapi pawsal leh a chanaute zosia leh a nei thil zosiau a vasomdok tau ah; Israelte giamun paw lam in a umsak tau a.

²⁴ Khawpi leh a sung ah thil um zosia chu mei in a hâltum tau a; dangka thikte, sanate, sum-eng leh thîk ah kisiam, ûm leh bêlte bep chu Lalpa sumbûk ah chun a hun koi tau a.

²⁵ Himaleh, nawchizuaknu Rahab chu a Inkuanpite zosia tawh, a nei thil zosiau pum in Joshua’n a hawi vek a. Jeriko khawpi entha ding ah Joshua’n a mi sawlte a la sêlgûk ziakin, zia ni kipat chun Israelte Inkuan lak in a chêngden tau hi.

²⁶ Ziaphatchun, Joshua’n zia gual hin thutiam a puangdok tai: “Zia Jeriko khua tundin kit gua tapo chu, Lalpa ma ah hânsialaw in um hen la! A cha masa pen in a suangphûm lem hen la, a cha neu pen in a kul kotkhakte chu, hun siam hen,” ti’n a gen a.

²⁷ Chutichun, Lalpa‘n Joshua a umpi ah; gam pumpi ah chun a minthang tai.