JOSHUA 5 - PATHIAN LEKHABU THIANGTHO (BSI)

Khangthakte Zektanna

¹ Chuleh, Jordan lui gâl tumlam ah Amorte leng zosia tawh, tuisuagiat gei jul ah Kanaan mite leng zosia chun, Lalpa‘n Israel mite zosia’n Jordan lui a gâl kâi masang siau, Jordan lui tuite chu Israelte â dingin a kangtansak hi, ti a het phat un, Israelte a lau ziak un a lungthim uh timaw zo in, a tha leh zung le a nei puau hi.

² Zia hun ah chun, Lalpa‘n Joshua kiang in, “Suanggial chemcha in siam inla, a vel ni’na dingin Israelte zektan piak in,” ti’n a gen a.

³ Tichun, Joshua’n le suanggial hiam chemcha ah siam in, Gibeath-haar-a-loth ah chun Israelte zek a tan piak tai.

⁴ Joshua’n a zek uh a tan piakna ziak chu: Aigupta gam ah kipat hung pawtdok zosia leh gâldo mi zosia kha, Aigupta gam ah kipat gamthip ah a zin sung un a thigam zo tau a.

⁵ Aigupta gam ah kipat hung pawtdok zosia kha zektansa ngen himaleu, Aigupta gam ah kipat a hung pawtdok nung ua, gamthip ah a zin sung ua piang zosia kha zektan lo ngen a hiu a.

⁶ Lalpa thu a ngailo ziak un Israel mipi, Aigupta gam ah kipat hung pawtdok zosia leh a gâldo mi teu tiang ah sukmangthai sik sek ah a um tiang un, Israel suante chu gamthip ah kum sawmli sung zet a vâkvai tau ah. Lalpa‘n a pu leh pateu kiang ah kihaksial ah piak ding ah a la tiamna gampha, khuaizu leh bawngnawi luanna gam chu musak lo dingin a la kitiam tai.

⁷ Tichun, amau thasâng ah a tundin, a suan leh pâkteu chu zektanlo ngen a hiu a; lam kâl ah zektanlote kha Joshua’n a zek uh chu a tan piak ta ahi.

⁸ A nam pumpiu ah zek a tan zaw phat un, a dam suak masiau, amau mun chiat, a gia mun chiat un a nichuang tau a.

⁹ Lalpa‘n Joshua kiang in, “Tu’ni hin Aiguptate hun musitna zosia la chung ua kipat in ka ladok tai,” a ti tai. Tichun, zia mun chu tu’ni tiang hin Gilgo a sak tau hi.

Gilgal Ah Chiakân Kût

¹⁰ Chun, Israelte zosia Gilgal ah a châm sung un, Jeriko phâijawl ah chun zia tha, a ni sawm leh li nitâk ah chun Chiakân Kût a mang tau a.

¹¹ Chiakân kût a mat zaw jing ma mau ah chun, zia gam ah bu piang, thawipanglo vaithum leh bu kikang gam chu a ne tau a.

¹² Zia gam ah bu piang a nêk niu ah chun Manna a ke ta pua’n; tichun, Israelte’n Manna a dong ta puau ah; zia kum ah chun Kanaan gam ah bu leh bâl piangte chu a ne pan tau hi.

Joshua Thil Mu

¹³ Khatvei chu Jeriko khawpi kiang ah Joshua a dâk to lai in, mi pakhat, a khut ah chemjam lâmsa, a âng ah ding a mu ta mai ah. Joshua’n a zuan ah, a kiang in, “Ka lam ua pang la hem, ka mêlmateu lam ah pang?” ti’n a dong a.

¹⁴ Ama chun, “Kuama lam ah ka pang puai; ahi’n, Lalpa sepaite lamkai ding ah hung ka hi,” ti’n a hun dawnhu ta’n. Tichun, Joshua’n a mai ah lei tual si’n bokkhup in, chibai a bûk ah, a kiang in, “He pu, la suakpa hin bang bawl leng lei ti em?” ti’n a dong a.

¹⁵ Lalpa, sepaite lamkaipa chun Joshua kiang in: “La kengtawdap kha sût in, la dinna mun kha mun thiangtho ahi ngâl in,” a hun ti ta’n. Tichun, Joshua chun a sûttha ngâl tai.