JOSHUA 4 - PATHIAN LEKHABU THIANGTHO (BSI)

Gilgal Ah Suang Sawm Leh Ni Phu’na

¹ Israel nam pumpi’n Jordan lui a gâl kâi suak phat un, Lalpa‘n Joshua kiang in:

² “Mipite lak ah kipat phung tin ah mi pakhat chiat, mi sawm leh ni têl inla,

³ ‘Jordan lui ah thiampute dinna mun, a keng ua a chotnau mun lai tak ua kipat suang sawm leh ni lau inla, paw gâl kâi unla, tu’jan ah la giakna ding mun tak un phut un,’ ti’n thu pia’n,” a tia.

⁴ Chutichun, Joshua’n le Israelte phung tin lak ah kipat mi khat chiat, sawm leh ni a la teldaw sate chu a ko khawm a.

⁵ Joshua’n a kiang un: “Lalpa la Pathian uh thuthung thingkuang, Jordan lui lai ah um kha makhel unla, mi tin in la liangko un suang pakhat chiat, mi khat in Israelte lak ah phung khat chiat thasâng in puu in;

⁶ tichun, zia chu la lak un tepte’na hi’n ah. Tu’nung ah la chateu in, ‘Zia suang hi bang etsakna a hem?’ ti ah a hun dot phat ua leh,

⁷ Lalpa thuthung thingkuang ma-âng in Jordan lui tuite a kangtan in; chuleh, Jordan lui a jawn gâlkai lai un Jordan lui chu a kangtan hi, ti hil in la tiu in. Chutichun, zia suangte hi Israelte â ding ah kumtuang ah hetzingna hita’n a,” a tia.

⁸ Joshua’n thu a piak dungzui ah chun Israel mipite’n le a bawl tau a. Israelte phung jat dungzui in Jordan lui lai ah suang sawm leh ni a lau ah, Lalpa‘n Joshua kiang ah a gen dungzui in a paw gâl kâi ua, a giakna ding mun tiang uh pu’ in, zia chun a ngatha tau a.

⁹ (Chuleh, thuthung thingkuang jawn thiampute dinna mun, Jordan lui lai tak ah chun Joshua’n suang sawm leh ni a phu ah; ziate chu tu’ni tiang hinle a umzing nalai hi).

¹⁰ Mosi’n Joshua thu a la piak gual in, Lalpa‘n mipite kiang ah hi ding ah Joshua thu a la piak zosia a bawl zaw masiau chu, thuthung thingkuang jawn thiampute chu Jordan lui lai tak in a ding den tau a. Tichun, mipite chu kinaw tak in a gâl kâi zo tau hi.

¹¹ Mipi zosia a gâl kâi suak phat un, Lalpa thuthung thingkuang leh thiampute chu mipite malam ah chun a chia jel tau a.

¹² Mosi’n thu a la piak gual khan, Reubente, Gadte leh Manasseh phung kimkhatte chu Israel mipi zosia ma-âng ah kigâlvan in a ma la tau a.

¹³ Gâlthuam ah kivan zo diam, mi sîng li vêl chu gâldo ding ah kigaw zo in, Jeriko phâijawl ah chun Lalpa ma âng in a chia tau a.

¹⁴ Zia ni chun, Israel mipi zosia mit mu in Lalpa‘n Joshua a chawihoi ta’n; Mosi a lau gual uh khan, a dam sung sia’n ama chule a lau tau a.

¹⁵ Chun, Lalpa‘n Joshua kiang in:

¹⁶ “Thuthung thingkuang jawn thiampute chu Jordan lui ah kipat hung pawtdok dingin thu pia’n,” a tia.

¹⁷ Ziaphatchun, Joshua’n le thiampute chu, “Jordan lui ah kipat in hung pawtdok tau in,” ti’n thu a vak pia’n.

¹⁸ Lalpa thuthung thingkuang jawn thiampute chu Jordan lui lai ah kipat a hung pawtdok ua, thiampute keng in mualkâng a chot phat in, Jordan lui tuite chu a luan ngai in, a luikam dim in a luang mat kit tai.

¹⁹ Mipite chu dam tak in, tha khatna a ni sawm tin ni chun, Jordan lui a gâl kâi tau a; tichun, Jeriko sua lam ah Gilgal ah chun a giak tau hi.

²⁰ Chuleh, Jordan lui lai ah kipat a puak dawu suang sawm leh nite chu, Joshua’n Gilgal ah chun a phut ta’n;

²¹ Israelte kiang in, “Tu’nung leh la tu’ la chateu in a pateu kiang ah, Zia suang haw hi bang etsakna kibawl a hem?, ti a dot phat uh leh,

²² Zia mun ah hin Israelte’n lei hul in Jordan lui a gâl kâi ui, ti la tu la chateu la hilna ding uh ahi, a tia.

²³ Lalpa la Pathian un malâi ah Tuipi San ka gâl kâi masang siau a tûktân gual ah khan, Lalpa la Pathian un Jordan lui tuite chu le la gâl kâi masang siau la ma âng un a kan tansak in;

²⁴ tichun, lei chung ah nam zosia’n Lalpa bân thahat dan a het ua, nanghaw’n le Lalpa la Pathian uh kumtuang ah la lau zing theina ding un ahi,” ti’n a gen tai.