JOSHUA 21 - PATHIAN LEKHABU THIANGTHO (BSI)

Levite Khawpi Ding Ah Koichuamte

¹ Tichun, Levite Inkuan ah upate chu thiampu Eleazar, Nun chapa Joshua leh Israelte lak ah phung tin ah luchangte kiang ah chun a hung tau a;

² Kanaan gam ah Shiloh khua chun, a kiang un zia gual hin a hung gen tau a: “Lalpa‘n Mosi mang in ka umna ding uh khawpite leh a kîmvêl ah ka ganchateu tatna ding tawh lei piak ding un thu a la pia tai,” a tiu a.

³ Chutichun, Israelte chun Lalpa thupiak dungzui in amau chanvo lak ah kipat in, a nuai ah khawpite hi a kîmvêl ah a gancha tatna ding pum in, Levite chênna dingin a pedok chiat tau a.

⁴ A âisân uh chu Kohathte Inkuan chung in a ke masa pen ah. Tichun, thiampu Aron suan ah Levite Inkuan chênna ding ah chun, Judah phung ah mite chanvo lak leh, Simeon phung ah mite chanvo lak leh, Benjamin phung ah mite chanvo lak ah kipat in khawpi sawm leh thum a chang tau hi.

⁵ Chuleh, Kohathte Inkuan lak ah a dang cheng chun, Ephraim phung ah mite chanvo lak leh, Dan phung ah mite chanvo lak leh, Manasseh phung kimkhatte chanvo lak ah kipat in khawpi sawm chu a âisânnau in a chu kit tai.

⁶ Chun, Gershonte Inkuan chun Issakhar phung ah mite chanvo lak ah kipat leh, Asher phung ah mite chanvo lak ah kipat leh, Naphtali phung ah mite chanvo lak ah kipat leh, Bashan gam ah Manasseh phung kimkhatte chanvo lak ah kipat in khawpi sawm leh thum a chan ding un a âisân nau in a ke tai.

⁷ Merarite chunle a Inkuan dungzui ua a chan ding un, Reuben phung ah kipat leh, Gad phung ah kipat leh Zebulun phung ah kipat in khawpi sawm leh ni a chang ui.

⁸ Zia khawpi leh a gancha tatna dingteu zosia chu a âisân dungzui un, Levi phung ah mite chan ding ah Lalpa khan Mosi kiang ah thu a piak dungzui in Israelte’n a pechiat tau a.

⁹ Judah phung ah mite chanvo ah kipat leh, Simeon phung ah mite chanvo lak ah kipat in zia khawpite hi piak a hiu a.

¹⁰ Ziate cheng hi Aron suante lak ah Kohathte Inkuan lak ah khat, Levite lak ah pangte â dingin âisân chu a kia masa pen hi.

¹¹ Judai tânggam ah um Hebron le kiti sek, Kiriath-arba (zia Arba chu Anakte suantu ahi) khua chu a gancha tatna ding gam zosia tawh a pia tau hi.

¹² Ahi’n la, khawpi kîmvêl ah lou mun leh a khawpite chu vang, Jephuneh chapa Kaleb gochan dingin piak ahi.

¹³ Thiampu Aron suante â dingin, mi thatkhate tailutna ding ah bitna khawpi Hebron leh a gancha tatna ding gam leh, Libnah khua leh a gancha tatna gam zosia,

¹⁴ Jatter khua leh a gancha tatna gam tawh, Eshtemon khua leh a gancha tatna gam tawh,

¹⁵ Holon khua leh a gancha tatna gam tawh, Debir khua leh a gancha tatna gam tawh,

¹⁶ Ain khua leh a gancha tatna gam tawh, Juttah khua leh a gancha tatna gam tawh, Beth-shemesh khua leh a gancha tatna gam tawh a leng ah khawpi pakua chu zia phung te ni ah kipat chun piak a hiu a.

¹⁷ Benjamin phung ah mite chanvo lak ah kipat in: Gibeon khua leh a gancha tatna gam tawh,

¹⁸ Anathoth khua leh a gancha tatna gam tawh, Almon khua leh a gancha tatna gam tawh, a leng ah khawpi pali piak a hiu a.

¹⁹ Aron suan ah kipat thiampute khawpi chu a leng in sawm leh thum tawh, a gancha tatna gamteu chiat tawh a hiu.

²⁰ Chun, Kohathte Inkuan ah mi, chan nei nai lo Levite Inkuan lak ah pangte khawpi ding ah piakdaw ah um chu, Ephraim phung ah mite chanvo lak ah kipat ahi.

²¹ Amau â dingin Ephraim tânggam ah um mithatte â ding ah bitna khawpi Shekhem leh a gancha tatna gan tawh, Gezer khua leh a gancha tatna gam tawh,

²² Kibzaim khua leh a gancha tatna gam tawh, Beth-horon khua leh a gancha tatna gam tawh, a leng ah khawpi pali piak a hiu a.

²³ Dan phung ah mite chanvo lak ah kipat in: Elteke khua leh a gancha tatna gamte, Gibbethon khua leh a gancha tatna gamte,

²⁴ Aijalon khua leh a gancha tatna gamte, Gath-rimmon khua leh a gancha tatna gamte, a leng in khawpi pali piak a hiu a.

²⁵ Manasseh phung kimkhatte chanvo lak ah kipat in: Taanakh leh a gancha tatna gamte leh Gath-rimmon leh a gancha tatna gamte, a leng ah khawpi pani piak a hiu a.

²⁶ Kohathte Inkuan lak ah a dang cheng in a chan uh chu a leng in khawpi sawm tawh, a gancha tatna gam chiat tawh ahi.

²⁷ Levite Inkuan lak ah pakhat Gershonte chanvo ding chu, Manasseh phung ah mi a kimkhatte lak ah kipat, mithatte bitna khawpi, Bashan ah um Golan khua, a gan tatnau gamte, Beeshterah khua, a gancha tatna gam ahi’n; a leng ah khawpi pani piak a hiu a.

²⁸ Issakhar phung ah mite chanvo lak ah kipat in: Kishion khua a gancha tatna gam; Daberath khua, a gancha tatna gam,

²⁹ Jarmuth khua a gancha tatna gam, En-gannim khua a gancha tatna gam a leng ah khawpi pali piak a hiu a.

³⁰ Asher phung ah mite chanvo lak ah kipat in: Mishal khua tawh a gancha tatna gam, Abdon khua a gancha tatna gam tawh,

³¹ Helkath khua, a gancha tatna gam tawh, a leng ah khawpi pali piak a hiu a.

³² Naphtali phung ah mite chanvo lak ah kipat in: Galili gam ah Kadesh khua tawh a gancha tatna gam tawh, mi thatte a ding ah bitna khawpi Hammoth-dor khua a gancha tatna gam tawh, Kartan khua a gancha tatna gam tawh, a leng ah khawpi pathum piak a hiu a.

³³ Gershonte lak ah Inkuan chuam chuamte khawpi chu, a leng ah sawm leh thum, a gancha tatna gam cheng uh tawh ahi.

³⁴ Levite lak ah a dang cheng Merarite Inkuan â dingin Zebulun phung ah mite chanvo lak ah kipat in: Jokneam khua, a gancha tatna gam tawh, Kartah khua a gancha tatna gam tawh,

³⁵ Dimnah khua tawh a gancha tatna gam tawh, Nahalal khua tawh a gancha tatna gam tawh, a lengah khawpi pali piak a hiu a.

³⁶ Reuben phung ah mite lak ah kipat in: Bezer khua, a gancha tatna gam tawh, Jahzah khua, a gancha tatna gam tawh,

³⁷ Kedemoth khua, a gancha tatna gam tawh, Mephaath khua, a gancha tatna gam tawh a leng ah khawpi pali piak a hiu a.

³⁸ Gad phung ah mite lak ah kipat in: Gilead ah Ramoth khua, a gancha tatna gam tawh, mithatte â ding ah bitna khawpi Mahanaim khua, a gancha tatna gam tawh, Mahanaim khua a gancha tatna tawh,

³⁹ Heshbon khua, a gancha tatna gam tawh, Jazer khua, a gancha tatna gam tawh a leng ah khawpi pali piak a hiu a.

⁴⁰ Levi Inkuan ah a um nalai cheng Merarite lak ah khenkhatte kiang in khawpi sawm leh ni piak a hiu a.

⁴¹ Israelte chanvo lak ah kipat Levite chanvo ding ah kipedok zosia chu khawpi sawmli leh giat, a gancha tatna gam tawh ahi.

⁴² Zia khawpi zosia hin a kîmvêl un gancha tatna gam awngle a nei chiat un; khawpi zosia chu zia gual chiat chu a hiu a.

⁴³ Chutichun, Lalpa‘n a suanteu kiang ah piak ding ah a la kipau tiamna gam zosia chu, Israelte Inkuan a pia ta’n; gam chu a luau ah, a chêngden tau hi.

⁴⁴ A pu leh pateu kiang ah a la kitiam gual in, kil tin ah kipat in Lalpa‘n muanna a pia ta’n; a mêlmateu zosia a khut un Lalpa‘n a piaksa ahi ziakin, a mêlmateu lak ah khat chale amau do ngam a um ta puau hi.

⁴⁵ Lalpa‘n Israelte kiang ah thilpha a tiam zosia kha, pakhat chale a thawn in a um pua’n, a guitung kim chiat hi.