JOSHUA 20 - PATHIAN LEKHABU THIANGTHO (BSI)

Bitna Khawpite Chu

¹ Ziaphatchun, Lalpa‘n Joshua a hun ho ah,

² “Israelte kiang in hiti hin gen in: ‘Mosi mang ah la kiang ua ka la gen gual ah khan kihumbitna ding khawpite chu guat chuam unla,

³ chanpal ah mi that kha a um ua leh, a tailut ziang theina ding un; tichun, thisan phuba latu ah kipat in la kihumbitna ding uh hung hi ding ahi.

⁴ Mi that kha palte chu zia khawpite lak ah khat pen pen ah chun tai lut intin, khawpi kul kotkhak bul ah dingin, zia khua upate kiang ah chun a chanchin vatut intin; zia gual ah mi liangvai chu khawpi sung ah pui lût in, a lak un a chêndensak ding uh ahi.

⁵ Chun, thisan phuba la ding pa chu a hung leh, a Invêngpa chun tu’ma lam ah huatna guk a la neisa hilo ah, chanpal ah a la thalup khâk ahiziak in, a khut ah chun a piakdaw lo diu ahi.

⁶ Mipi mai ah a chungchâng thutanna bawl ahi masangsia leh zia hun ah thiampu lianpen ah pang pen pen chu a thi masangsia’n, zia khawpi ah chun a chêng zing ding ahi; ziazaw chuleh, mi thatpa chu a In lam, a mi thalupna khua lam ah chun chia kit thei ta’n ah,’ ti’n gen in,” a tia.

⁷ Tichun, Naphtali tânggam ah Galili ah chun Kedesh tawh, Ephraim tâng gam ah Shekhem khua tawh, Judah tânggam ah Kiriath-arbate (zia chu, Hebron ahi’n) hi a guat tau a.

⁸ Chun, Jeriko sualam Jordan lui gâl lam ah chun Reuben phung ah mite, gam sung ah tângcham, gamthip mun ah Bezer khua a guat un; chuleh, Gad phung ah mite lak in Gilead gam ah Ramoth khua leh Manasseh phung ah mite lak in Bashan gam ah Golan khuate hi a guat tau hi.

⁹ Zia khuate hi Israelte zosia leh a lak ua nam dang mi, a chêngdente lak ah kua’n le chanpal ah mi a thalup khâk ua leh a tai lut ua, mipite ma-âng ah vaihawm piak ahi masangsiau, thisan phuba la dingpa khut ah kipat a thi lona ding ah, a tai lut theina ding ah kiguatte chu ahi.