JOSHUA 2 - PATHIAN LEKHABU THIANGTHO (BSI)

Jeriko Ah Enthate Sawlna

¹ Ziaphatchun, Nun chapa Joshua’n, Shittim ah kipat in a gûk in mi pani a sawl ah, a kiang un, “Chia unla, a gam pha tak in vaen unla, a diak in Jeriko khawpi chu vaenchian un,” a tia. Tichun a chiau ah, nawchizuak khat, a min Rahab In ah lût in, a giak den tau a.

² Jeriko khua lengpa kiang in, “Israel mite gam entha dingin tu’jan a hung ui,” ti thu a la hil tau a.

³ Jeriko khua lengpa chun Rahab kiang in, “La zinte kha hun puidok in, gam pumpi entha ding ah hung a hiu,” ti’n thu a pia.

⁴ Himaleh, numei chun a zinte chu pui in a sêlgu ta’n. Lengpa kiang in, “Mite chu ka kiang in a hung ui ti chu a dik hi; ahi’n, khoilam ah kipat hung a hiu ka hepuai.

⁵ Chuleh, thimbut, khawpi kul kotkhak kikhak ding kuanvêl ah khan a pawtdok tau hi. Khoilam a zawt uh le ka hepuai; del kin leu chin delpha mai thei lei veu,” ti’n a dawnhu a.

⁶ Ama chun la, zia mite chu a Inchung ah sameibawm kung a pho lak ah a sêl ahi ngâl a.

⁷ Khawpi ah mite chun Jordan lui palmun tiang in a vadel tau ah. A del dingte pawtdok zaw phatin khawpi kul kotkhak chu a khâk tau a.

⁸ Enthate ni a i-mut mau in Rahab chu Inchung lam in a hang kal to a,

⁹ a kiang un: “Zia gam hi Lalpa‘n a hun piaksa ahi tai, nang uh kicha’n launa’n ka dim tau in, zia gam ah chêng zosia hi nang uh lau ah timaw gawp ka hitau hi ti ka hia’i;

¹⁰ Aigupta gam ah kipat la hung pawtdok lai ua, Lalpa‘n la masang ua Tuipi San a kangtansak dante, Jordan lui gâl ah Amorte leng pani, Sihon tawh Og chung ah la thilbawl uh, khatia amau la hi mangthai danteu kha ka la he ngâl un.

¹¹ Zia thute chu ka la het phat un, ka ngaituanateu chu a timaw gawp ngâl ta’n; nang uh ziakin hânsanna nei ka um ta puau ah. Lalpa la Pathian uh hi chung lam van leh nuai lam lei ah Pathian tak tak chu ahi ngâl a.

¹² Tu’hin, keima’n lungsiatna ka hun musak tâk gual hin, nang unle ka Inkuanteu chung ah lungsiatna latsak dingin Lalpa min ah kitiamna bawl un. Ginum tak in tepte’na ei pia unla;

¹³ ka pa, ka nu, ka suapite leh a nei zosiau thi’na ding lak ah kipat ei humbit dingin ka ni la hiu,” a vati ta’n.

¹⁴ Zia mi teni chunle a kiang in: “Ka thil hung bawl uh kuama hil lo ah la um phot chun, Lalpa‘n zia gam hi ka khut ua ei piak phat leh, pha tak in hun bawl ing kau. I gen gual ua I umlo po po uh leh Lalpa‘n I hinnau la mai hen!” a ti tau a.

¹⁵ Zia nu In chu khawpi kulbâng chung ah um, khawpi sung lam ah chêng ahiziak in, a tukvan ah kipat in khauhual in a zinte chu a kikhâi thâksak tai.

¹⁶ Chuleh, a kiang un: “A hun delzuite khan a hun muphâk lona ding un tâng lam in chia to phot un. A hun hawlte a kile’kit masangsiau zia lam ah chun ni thum va kisêlgu phot un; ziazaw chuleh, chia theng thei ta’n lau,” ti’n a gen nalai a.

¹⁷ Amau teni chunle, “Nangma’n kei uh lei kikhâmsakna chung thu ah chun thiamlo ka chanlona ding uh chu zia gual hi hi’n a:

¹⁸ Zia gam hi ka hun do phat ua leh, kei uh lei khâithâkna tukvan ah hin zia khauhual san hi la la khâithâk lo ah; chuleh, la pa leh la nu, la suapite leh la Insung mi zosia la la umpi lo ah,

¹⁹ la Insung ah a la um lo ah khawpi kotzing ah a la pawtdok khâk uh chun, amau thi’na chung in amau in a maw kipuak intiu in, kei uh ei ngaw thei pua’n lau; ahi’n la, la In sung ah la umkhawmpite lak ah khat chung ziang ah le khut tha a um chun, zia mi thi’na ziak ah chun a maw paw’ngâl ing kau.

²⁰ Chuleh, zia thu hi la gendaw chun, lei kitiamsakna thu ah hin a suakcha hi’ngâl ing kau,” a tiu a.

²¹ Ziaphatchun, ama’nle, “La gen gual un hita hen,” ti’n a dawnhu tai. Amau chu a sawldok ah, a chia mang tau ah. Chuleh, ama’nle a tukvan ah chun zia khauhual san chu a khit den tai.

²² Tichun, a pawtdok un, tâng lam ah chia to in, amau hawlte kile’kit masia, ni thum sung a vakisel tau a. Amau hawlte chun lamdung a hawl ua la a mu zo ta puau a.

²³ Amau chule tâng lam ah kipat in a hung suk kit tau ah; Jordan lui gâl kâi in, Nun chapa Joshua kiang in a hung ua, thil umdan zosia chu a hung hil tau a.

²⁴ Joshua kiang in, “Lalpa‘n a gam pumpi chu I khut un ei pia tak tak na ahi; zia bep chule hilo in, zia gam ah chêng zosia chu ei uh ei lau in I âng un a timaw zo tau hi,” a tiu a.