JOSHUA 19 - PATHIAN LEKHABU THIANGTHO (BSI)

Simeon Gam Channa

¹ A âisân niveina chu Simeon chung ah, a Inkuan dungzui ua Simeon phung ah mite chan dingin a hung kia’n; amau chanvo ding chu Judah phung ah mite chanvo lak in a hung pang ta’n.

² Chanvo ah a nei dingteu chu: Beer-sheba, Sheba, Moladah,

³ Hazur-shual, Balah, Ezem,

⁴ Eltolad, Bethul, Hormah,

⁵ Ziklag, Beth-markaboth, Hazar-shusah,

⁶ Beth-lebaoth leh Sharuhen: khawpi sawm leh thum, a khawpelteu chêng tawh a hiu a;

⁷ Ain, Rimmon, Ether leh Ashan: khawpi pali, a khawpelteu cheng tawh ahi kit a;

⁸ a khawpi kîmvêl ah a khawpel zosiau tawh, Baalath-beer leh Negeb ah Ramah cheng hitawh a hiu a.

⁹ Simeon phung ah mite chanvo ding chu Judah phung ah mite chanvo lak in a pang ah; Judah phung ah mite chanvo chu amau â dingin a let bêk ziakin, a gam channau lak ah chun Simeon phung ah mite chanvo ding chule piak a hiu.

Zebulun Gam Channa

¹⁰ A âisân thumveina chu a Inkuan dungzui ua a chan ding un Zebulunte phung chung in a kia’n. A chanvo uh gamgi ding chu Sarid tiang in a kithung pek ah;

¹¹ chuleh, gamgi chu tumlam zuan ah kithungto pek in Mara-lah chung lam ah Dabbesheth tiang in a kithung pek in, Jokneam sualam ah luicha a va sun a;

¹² Sarid ah kipat in sualam pang, nisa suakna zawn Kisloth-tabor gamgi tiang in a kawi to kit ah; Daberath lam zuan in Japhia tâng in a kithung kit a;

¹³ zia kipat chun sualam pang ah Gath-hepher leh Eth-kazin lam zuan in a kithung pek ah, Neah lam zuan in Rimmon lam in a chia theng ta’n;

¹⁴ chuleh, mallam ah Hanna-thon lam in a kikual phei ah, Iphtah-el guam in a tawp a;

¹⁵ Kattath, Nahalal, Shimron, Idalah leh Beth-lehem: khawpi sawm leh ni, a khawpelteu cheng tawh a huap a.

¹⁶ Zia kual sung cheng chu, Zebulun phung ah mite’n a Inkuan dungzui chiat ua, a goluana ding uh gamgi chu ahi’n; a khawpi leh a khawpelteu zosia tawh a chang tau hi.

Issakhar Gam Channa

¹⁷ Chun, a âisân liveina chu Issakhar chung ah, a Inkuan dungzui ua; Issakhar phung ah mite chan dingin a hung kia’n.

¹⁸ A gam un a huam sung chu Jezreel, Kesuloth, Shunem,

¹⁹ Haph-ara-im, Shion, Anaha-rath,

²⁰ Rabbith, Kishion, Ebez,

²¹ Remeth, En-gannim, Enha-ddah, Beth-pazzez;

²² Tabor, Shahazumah leh Beth-shemesh leh Jordan lui tiang in a gamgiu chun a hual khum ah: A sung ah khawpi sawm leh guk tawh a khawpelteu zosia le a huam hi.

²³ Zia cheng hi a Inkuan dungzui ua Issakhar phung ah mite chanvo: A khawpi leh a khawpel zosiau tawh a gochan ding teu chu ahi.

Asher Gam Channa

²⁴ A âisân ngaveina chu a Inkuan dungzui ua a chan ding un, Asher te phung chung in a kia’n.

²⁵ A gamgiu chun Helkath, Hali, Beten, Akshaph,

²⁶ Allammelek, Amad leh Mishal a huam ah; a tumlam gamgiu chun Karmel leh Shihor-libnath a supha’n;

²⁷ sualam in a kihei kual kit ah, Beth-dagon a chia kual khum ah, Zebulun leh mallam pang ah Iphtah-el guam ah Beth-emek leh Neiel a vatung ah; mallam ah Kabul tiang a tung a;

²⁸ Ebron, Rehob, Hammon, Kanah leh Sidon tiang a tung a;

²⁹ chuleh, Ramah lam zuan ah chia in khawpi kul nei Tura a vatung ah; Hosah lam zuan in a chia kit ah, tuisuagiat in a lut tai; Maha-lab, Akzib,

³⁰ Ummah, Aphek leh Rehob: a leng ah khawpi sawm ni leh ni, a khawpelteu cheng tawh a huam a.

³¹ Zia cheng chu a Inkuan dungzui ua Asher phung ah mite chanvo leh a khawpi leh a khawpelteu chu a hiu a.

Naphtali Gam Channa

³² A âisân gukveina chu Naphtali chung ah, a Inkuan dungzui chiat ua, Naphtali phung ah mite chan ding chu a hung kia’n.

³³ A gamgi ding uh chu Heleph ah kipat leh Zaanannim ah gangpi bul ah kipat leh, Adami-nekeb leh Jabneel ah kipat Lakkum tiang ah chia in, Jordan lui in a tawp a;

³⁴ gamgi chu tumlam ah Aznoth-tabor lam zuan ah kihei kit in, Zebulun simlam vak sukha in Hukkok tiang in a kithung ah, tumlam in Asher a tung ah, sualam in Judah gam ah Jordanlui a tung hi.

³⁵ A gam sung ah khawpi kuldet neite chu: Ziddim, Zer, Hammath, Rakkath, Kinnereth,

³⁶ Adamah, Ramah, Hazor,

³⁷ Kedesh, Edrei, En-hazor,

³⁸ Iron, Migdal-el, Horem, Bethanath leh Beth-shemesh a hiu a: Khawpi sawm leh kua, a khawpelteu cheng tawh a hiu a.

³⁹ Zia chu a Inkuan dungzui ua Naphtali phung ah mite chanvo, a khawpiteu leh a khawpelteu chu ahi.

Dan Gam Channa

⁴⁰ A âisân sagiveina chu a Inkuan dungzui ua, a chên ding un Dante phung chung in a kia’n.

⁴¹ A gamgiu chu Zorah, Eshtaol, Ir-shemesh,

⁴² Shaalabbin, Aijalon, Ithlah,

⁴³ Elon, Timnah, Ekron,

⁴⁴ Eltekeh, Gibbethon, Baalath,

⁴⁵ Jehud, Bene-berak, Gath-rimmon,

⁴⁶ Mejarkon leh Joppa tawh gamgi jawn ah um Rakkon tawh a hiu a.

⁴⁷ Dan phung ah mite’n a gam uh a matsua phat un, Dan phung ah mite chu Leshem do in a kuan to ua, khua chu a zawu ah, chemjam ah a tha’gam zaw phat un a kilak ua, a luaden tau ah; a min dingin Dante suantu bul minsak in Leshem chu Dan a sak tau hi.

⁴⁸ Zia chu ahi a Inkuan dungzui chiat ua Dan phung ah mite luana ding ah gam, a chanvo uh chu: zia khawpite hi a khawpelteu cheng tawh a hiu a.

Joshua Chanvo

⁴⁹ A gam pumpi chu amau chanvo ding chiat ah a hung kihop zaw phat un, Israelte chun amau chanvo lak ah kipat in Nun chapa Joshua chanvo ding a hun siam piak chiat tau a.

⁵⁰ Lalpa thupiak dungzui in, Ephraim tâng gam ah khawpi a dotna mun Timnath-serah chu a pia tau ah; zia khawpi chu a siampha’n, a chêng den tai

⁵¹ Ziate chu thiampu Eleazar tawh, Nun chapa Joshua tawh, Israel Inkuan lak ah phung tin ah upa zosia’n Shiloh khua, Lalpa ma ah kikhopna biakbûk kotkhak bul ah, âisân ah a chanvo ding chiat uh a hoppiaknau chu ahi. Chutichun, gam pumpi chu a kihawm zo tau hi.