JOSHUA 18 - PATHIAN LEKHABU THIANGTHO (BSI)

Phung Dangte Channa Gam

¹ Ziaphatchun, Israel mipi zosia chu Shiloh mun ah kikhawm un, kikhopna biakbûk a jak tau a. Gam pumpi amau thunuai in a hung um suak tai.

² Israelte lak ah gochan ding ah gam hop piak nailo phung sagi a um nalai un.

³ Tichun, Joshua’n Israelte kiang ah chun, “Lalpa, la pu leh pateu Pathian in a hun piakna gam chu lua ding ah uai âi tak ah bang chan um nalai ding la hiu em?

⁴ La phung tin ua kipat in mi pathum chiat hun teldok unla, a luana ding uh gam kihawm dan zosia vaen chian ah, a umdan dik tak hun zikdok dingin sawl ing ka, ziazaw chuleh hung kit uh hen.

⁵ Mun sagi in kihawm phot uh hen la, Judah in simlam ah a gam uh luau hen la, a ban ah Joseph Inkuan in mallam pang ah a gam uh luau hen.

⁶ Gam chu mun sagi in hawm unla, la hopdan uh kichian tak ah zik in ei piau in; chuleh, zia mun ah hin nang uh â dingin Lalpa I Pathian uh âng ah âi a la sân piak ing ka.

⁷ Levite chun la lak un chanvo nei pua’n au, Lalpa thiampu’na chu amau chanvo ahi ngâl a; chuleh, Gad leh Reubente leh Manasseh phung ah mi a kimkhatte chun, Jordan lui gâl sualam ah amau chanvo ding ah Lalpa suak Mosi’n a la piak tâk ziakin,” a ti tai.

⁸ Tichun, zia mite chu a kuandok tau ah; gam chanchin zikdok ding ah chiate kiang in Joshua’n, “Gam chu vachuan suak unla, a chanchin kim tak ah zikdok in, ka kiang ah la hung kit diu ahi; ziaphat chuleh, keima’n Shiloh mun ah Lalpa ma-âng hin nanghaw â dingin âi a la sân piak ding ka hi,” ti’n thu a pia’n.

⁹ Chutichun, mite chu a kipan un, gam chu a vachuan suak tau a; chuleh, a gam chu mun sagi ah hawm in, a khawpite chule a bân bân in a zikdok tau ah; Shiloh mun ah Joshua giabuk in a hung kit tau hi;

¹⁰ chuleh, Joshua’n Shiloh ah Lalpa ma-âng ah âi a la sân piak ta’n; zia mun ah chun Joshua’n Israelte lak ah gam a hop piak chiat ta’n, phung tin â dingin gam a pechiat tai.

Benjamin Gam Chan

¹¹ A Inkuan dungzui ua a chan hopna ding uh âisân chu Benjamin phungte â dingin chu a hung kia ta’n, amau channa ding gam chu, Judah phung leh Joseph phungte ni kikâl a hung hi tai.

¹² A mallam gamgi ding uh chu Jordan lui in a kipan a; Jeriko simlam kenliang in a kithungto pek ah, tumlam ah tâng gam lam in a chia to pek ah; Beth-aven gamthip in a tawp tai.

¹³ Zia kipat chun Luz lam zuan in simlam in a chia pek ah, Luz kenliang a paltan suk a (zia Luz chu Bethel ahi;) zia kipat chun Beth-horon Nuainung zaw simlam ah tânggam ah um Astaroth-addar tiang in a kithung suk hi.

¹⁴ Chuleh, a langkhat lam ah Beth-horon gâl lam, a simlam ah tâng lam zuan in tumlam jul in a chia pek ah, Judah phung ah mite khawpi Kiriath-baal (zia chu Kiriath-jearim ahi) in a tawp ah. Zia chu tumlam pang ah a gamgiu ahi.

¹⁵ A simlam chu Kiriath-jearim daipâm in a kipan ngâl ah; gamgi chu zia kipat chun Nephtoah tuinâk ah Ephron lam in a kithung pek a;

¹⁶ chuleh, a suk lam ah kithung in, Rephaim phâicham mallam in, Hinnom chapa phâicham vak kigâl mu’na mual mong lam in a kithung suk pek ah; tichun, Jebushte kênliang mallam ah Hinnom phâicham lam a zuan suk ah, En-rogel lam in a chia suk pek a;

¹⁷ zia kipat chun mallam ah Enshemesh lam zuan in a hung kihei kual to kit ah, malai ah Adummim kiti tawh kigâlchân Geliloth lam in a kithung pek ah; zia kipat chun Reuben chapa, Bohan Suangphu lam in a chia suk a;

¹⁸ Beth-arabah kenliang mallam paltheng in Arabah a vak sun a;

¹⁹ zia kipat chun Beth-hoglah kênliang mallam in a chia pek a; tichun, Jordan lui simlam mong, Tuipi Thi mallam gei tak hun sun in a tawp tai.

²⁰ Jordan lui chu a sualam gamgiu ahi ngâl ah. Zia huang sung hi a Inkuan dungzui chiat ua Benjamin phung ah mite luana ding ah a gam channau chu ahi.

²¹ Tu’hin, a Inkuan dungzui ua, Benjamin phung ah mite luana ding khawpite chu Jeriko, Beth-hoglah, Emek-keziz,

²² Beth-arabah, Zemaraim, Bethel,

²³ Avvim, Parah, Ophrah,

²⁴ Khephar-ammoni, Ophni leh Geba-a leng ah khawpi sawm leh ni, a khawpelteu chiat tawh ahi:

²⁵ Gibeon, Ramah, Beeroth,

²⁶ Mizpeh, Kephirah, Mozah,

²⁷ Rekem, Irpeel, Taralah,

²⁸ Zela, Haeleph, Jebus (zia chu Jerusalem ahi); Gibeah leh Kiriath-jearim, a leng ah khawpi sawm leh li, a khawpelteu chiat tawh a hiu a. Zia haw hi a Inkuan dungzui ua, Benjamin phung ah mite luana ding ah a chanvo uh chu ahi.