JOSHUA 11 - PATHIAN LEKHABU THIANGTHO (BSI)

Kanaan Gam Mallam Ah Lal Pangkhawmte Zaw’na

¹ Hazor ah Lengpa Jabin in zia thu chu a la het phat in, Madon Leng Jobab leh, Shimron leng leh, Akshaph Leng leh,

² mallam tânggam ah lengte, Kinneroth simlam ah Arabah leh phâijawl leh tumlam ah Naphoth-dor ah Leng leh,

³ sualam leh tumlam ah Kanaan mite, tânggam ah Amor mite, Hit mite, Periz mite, Jebus mite leh Mizpah gam ah Hermon tâng nuai ah Hiv mite kiang in mi a sawl a.

⁴ Tuisuagiat pang ah piaunêl jat ah tam, a sepaiteu zosia tawh, a sakolteu leh a kângtalai tam tak uh tawh a hung kuandok tau a.

⁵ Zia leng zosia chu kizom khawm in, Merom luidung ah hung in, Israelte do dingin a giak khawm tau hi.

⁶ Chun, Lalpa‘n Joshua kiang in, “Amau chu lau kiu in, jing leh tu’hun ma ma hileh amau chu tha’sa ngen in Israelte kiang ah hun pia ding ka hi; a sakolteu zapigui sat tan piak in la tiu in, a kângtalaiteu chu hâl tum piak ding la hiu,” a hun ti’n.

⁷ Tichun, Joshua chun a sepai zosia tawh Merom luidung ah chun hun do phut in, a baw tau a.

⁸ Lalpa‘n amau chu Israelte khut in a pia’n, Israelte’n a do un, Sidon khawpi leh Misrephoth-maim mun tiang leh sualam ah Mizpeh phâiguam chan in a delzui tau a. Pakhat chale hawilo in a that gam sik sek tau hi.

⁹ Tichun, Lalpa thupiak gual tak in Joshua’n a chung un a bawl ta’n; a sakolteu zapigui sat tan piak in, a kângtalaiteu chu a hâl tum piak tai.

¹⁰ Joshua kile’kit vak in Hazor khua chu a la’n, a Lengpa chule chemjam in a that a. Tu’ma lam ah chun Hazor khua chu zia tuam ah chun khawpi lian pen a la hi’n.

¹¹ Chuleh, zia khua um zosia chu chemjam in a that gam sik sek ah; a ha’thei zosia lak in pakhat chale a hawi pua’n; chuleh, Hazor khua chule a hâl tum tai.

¹² Chun, lengte khawpi zosia chu a lengteu zosia pum in Joshua’n a man sik sek a; Lalpa suak Mosi’n thu a piak dungzui ah chemjam ah that in, a sumangthai sik sek tai.

¹³ Mual chung ah khawpi ahileh vang Joshua’n Hazor khua a hâl tum tilo ngâl, Israelte’n a dang khat chale a hâl tum puau hi.

¹⁴ Zia khawpite ah a gâllâkteu leh gancha zosia chu Israelte’n amau â dingin a kilâk tau a; himaleh, mihing ahileh vang a hi’mangthai zaw masiau chemjam in a that un, hinna nei taphot chu khat chale a hawi puau a.

¹⁵ Lalpa‘n a suak Mosi kiang ah thu a piak gual in, Mosi’n le Joshua kiang in thu a la pia’n; zia gual ma’ chun Joshua’n le a bawl tai; Lalpa‘n Mosi kiang ah thu a piak zosia chu bawl lo khat chale a nei puai.

Joshua Galzawna Chanchin Lakkhawm

¹⁶ Chutichun, Joshua’n gam a lâkte zosia chu: tânggam zosia, Negeb lam zosia, Goshen gam leh a phâijang zosia leh, Arabah leh Israel tânggam leh a phâijang zosia,

¹⁷ Seir ah kipat Hermon tâng nuai ah Lebanon phâijang ah Baal-gad tiang ah, Halak tâng dung tiang in a la suak tai. A lengteu a man ah, vaw pâi in, a that sik sek tai.

¹⁸ Joshua’n zia lengte zosia a do zaw’na ding ah hin hun sawt tak a lut hi.

¹⁹ Gibeon khua um Hiv mite tilo ngâl chu Israelte’n kichamna a siampiu khua dang him him a um puai; a dang zosia chu a kidopi ah a lak piak ngen ahi.

²⁰ Mosi kiang ah Lalpa‘n thu a la piak gual ah a sukchimit sik sek ah, daidawp lo ah a sukmang dik dek theina dingin Lalpa‘n a lungthim uh sutâk in, Israelte chu a dosak sek ahi ngâl a.

²¹ Ziaphatchun, Joshua a hung ah, tânggam ah kipat leh, Hebron khua kipat leh, Debir khua kipat leh, Arah khua kipat leh Judah tâng gam zosia ah kipat leh Israel tâng gam zosia ah kipat in Anakimte chu a phiat nâm suak ta’n; Joshua chun a chênnau khawpi zosia pum in a sumangthai sik sek tai.

²² Israelte gam sung ah chun Anakimte lak ah mi pakhat chale hawi in a um ta puau a; Gaza, Gath leh Ashdod khua te ah chun khen khat a um bep tau a.

²³ Tichun, Mosi kiang ah Lalpa‘n a gen gual tak in Joshua’n gam pumpi chu a la suak ta’n; chuleh, Joshua chun Israelte chu a phung kikhen dungzui chiat ua a gochan ding un a pechiat tai. Tichun, a gam chu gâl muang in a um tai.