JOSHUA 10 - PATHIAN LEKHABU THIANGTHO (BSI)

Nisa Tûktânna

¹ Jerusalem khua Leng Adoni-zedek in, Joshua’n Âi khua a la’n, a susia sik sek ah, Jeriko khua Leng a la suksiat gual in Âi khua leh a leng chung in a bawl in, chuleh, Gibeon khua mite’n Israelte tawh kilemna a siam un, a lak un a chêng tau hi, ti a hun het phatin,

² Gibeon chu khawpi lian tak, Lengte chênna khawpi gual leh Âi khua sâng ah lianzaw leh a khua sung ah chêngte le mi hangsan leh hat ngen a hiu ti a het ziakin, a lau ta ma mau a.

³ Tichun, Jerusalem Leng Adoni-zedek chun, Hebron khua Leng Hoham, Jarmuth khua Leng Piram, Lakish khua Leng Japhia leh Eglon khua Leng Debir te kiang in thu a thot ah, a kiang un:

⁴ “Hung unla, ei hung panpiu in, Gibeon vado hitiu; Joshua leh Israelte tawh kilemna a siam tâk ziak un,” ti’n a gen a.

⁵ Tichun, Amorte Leng panga: Jerusalem Leng, Hebron Leng, Jarmuth Leng, Lakish Leng leh Eglon Lengte chun a sepaiteu chu a ko khawm ua, a sepai hon zosiau tawh chia to in, Gibeon khua jawn ah giamun siam in, a do tau a.

⁶ Chun, Gibeonte chun Gilgal giamun ah Joshua kiang in thangko a sawl ua, a kiang in, “La suakte hi ei thâthawt kin; kin tak in ka kiang lam un hung to ngâl inla, ei hukdok dingin ei hung panpi in; tânggam ah chêng Amor Lengte zosia ei do dingin a pangkhawm ta’ngâl un,” ti’n a vagen sak a.

⁷ Tichun, Joshua tawh a kiang ah gâl do mi, mi hat leh hangsan zosia chu Gilgal ah kipat in a kuan to tau a.

⁸ Lalpa‘n Joshua kiang in, “Amau chu lau him him kin, la khut ah ka piaksa ahi ta’ngâl un; a lak ua khat chale nang hun zo ding um lo a hiu,” ti’n a gen a.

⁹ Tichun, Joshua chu jankhua’n Gilgal ah kipat hung del a hiziak in, amau chu a hun do phut ziang ta mai a.

¹⁰ Chun, Gibeon khua mun ah a mêlmateu tam tak that in, Beth-Horon zawtna kaltona tiang ah del zui in, Azekah leh Makkedah tiang ah a thalup gam tâk ziak un, Lalpa‘n Israelte ma-âng in amau chu a patau sak ta’n.

¹¹ Israelte ma-âng ah jam mang ah Beth-Horon kenliang ah a tai suk lai un, Lalpa‘n van ah kipat in gialchang lianpi pi, Azekah tiang in a chung ua a hun kiaksak ziakin, Israelte’n chemjam ah a thalup sâng un gialchang in a se’lup a tam zawu hi.

¹² Lalpa‘n Israelte khut ah Amorte a piak ni chun Joshua’n Israelte mit mu in Lalpa kiang ah zia gual hin a gen a: “Nisa, Gibeon khaw chung zawn ah ding zing inla; Thapi, nang le Aijalon guam chung zawn in um zing in,” a ti’n.

¹³ Tichun, a mêlmateu chung ah phuba, a lak zaw masiau in nisa chu a ding zing ah, thapi le a chawl tai. Zia thu hi Jashar Lekhabu ah zik hilo a hem? Nisa chu vanlaijawl in a chawl ta’n, ni khat pumpi tum ding kinaw him him lo in a um tai.

¹⁴ Lalpa‘n Israelte â ding ah a do piak ziakin zia gual ah mihing aw a ngaithâkna ni chu masang leh tu’ni tiang hinle a um ngai puai.

¹⁵ Ziaphatchun, Joshua a giamun Gilgal lam ah kile’kit chu Israelte zosia’n le a zui tau a.

Lal Pangate Zaw’na

¹⁶ Zia kâl ah chun, Leng pangate chu a la taidok in Makkedah kawlhawm in a la kisêl tau hi.

¹⁷ Chun, Joshua kiang in, “Lal pangate kha Makkedah kawl hawm in a kisêlguu hi,” ti a hil tau a.

¹⁸ Joshua’n a kiang un, “Kawlhawm sit dingin suangpi lîk lut unla, chuleh, a vêng dingle mi koi unla;

¹⁹ nang uh vang hung um den lo in, la mêlmateu del pek unla, a nung lam ua kipat in do pek un. A khawpiteu ah lutsak kiu in, Lalpa la Pathian un la khut un amau chu a piaksa la hi ta’ngâl un,” a tia.

²⁰ Chuleh, Joshua leh Israelte’n mi tam tak thatlum ah, a zawthian ua, a suakcha sunte le khawpi sung ah a tai lut zaw phat un,

²¹ mi zosia chu Makkedah giamun lam ah Joshua kiang ah bit tak in a hung kile’kit zo tau ah; kuama’n Israelte kãl in thu kam khat ziang le a gen puak ngam ta puau hi.

²² Ziaphatchun, Joshua’n, “Kawlhawm sitna chu hong unla, zia tak ah kisêlgu Leng pangate chu ka kiang ah hun puidok tiam un,” a tia.

²³ A gen gual in a bawl tau a, Leng pangate: Jerusalem Leng, Hebron Leng, Jarmuth Leng, Lakhish Leng leh Eglon Lengte chu kawlhawm ah kipat chun a hun puidok tau hi.

²⁴ Zia Leng pangate chu Joshua kiang ah a hun pui tung phat un, Joshua’n Israelte zosia chu a ko khawm ah; chuleh, a gâl kuanpite lak ah hotute kiang ah chun, “Hun nai unla, zia leng pangate ngawng hi la keng un chuan den un,” a tia. Tichun, a hun nai un, a keng un a ngawngcheng uh a chawt dên piak tau hi.

²⁵ Chun, Joshua’n a kiang un, “Lau kiu inla, huphul him him kiu in; kisuhat unla, hangsan tak in pang un; Lalpa‘n la kidopiu la mêlmateu taphot zia gual hin bawl pek ding ahi ngâl ah,” a tia.

²⁶ Zia nung ah chun Joshua’n a vaw pâi ah, a that ta’n; thingkung panga chung in a khai ah. Chuleh, nitâk lam tiang in thing ah chun a khai den tai.

²⁷ Nitum jul in Joshua’n thinglêk ah kipat latha ding ah thu a piak dungzui in a la thau ah, a luang uh chu a kisêlnau kawlhawm ma ma chun a seplut tau a; a sit dingin suangtum lianpi a koi un, zia chu tu’ni tiang hin a um den tai.

²⁸ Zia ni chun Joshua’n Makkedah mun chule a la’n, a leng teu natiang chemjam in a satlum ah; zia khua chêng zosia chu khat chale suakcha lo in, a that gam sik sek tai. Jeriko khua Leng chung ah a bawl gual gual khan Makkedah khua lengpa chung inle a bawl tai.

²⁹ Chuleh, Joshua tawh Israelte zosia chu Makkedah khua kipat chun Libnah khua a zuan ua, Libnah khua chule a do tau a.

³⁰ Lalpa‘n zia khua lengpa chu Israelte khut in a pia ta’n; a sung ah chêng zosia chule chemjam in a satlum sik sek tau ah; a sung ah mi khat chale a hawi pua’n, Jeriko khua lengpa chung ah a bawl gual khan, zia lengpa chung ah chunle a bawl tai.

³¹ Chun, Joshua tawh Israelte zosia chu Libnah khua kipat in Lakish khua lam in a chiau ah, a ûm ua, a do tau a.

³² Lalpa chun Israelte khut in Lakish khua chu a pia’n, ani ni tin ni’ chun a la zo tau a; Libnah khua a bawl gual gual un a sung ah um zosia chemjam ah satlum sik sek in, a tawden tau a.

³³ Gezer khua Leng Horam chu Lakish khua panpi dingin a kipan ah; Joshua’n ama tawh a mipite chu pakhat chale hawi lo in a that gam tai.

³⁴ Lakish khua kipat in Joshua leh Israel mipite zosia chun Eglon khua a zuan tau ah, a khuau ûm in, a do tau a;

³⁵ Zia ni ma ma chun a la tau ah; Lakish khua a bawl gual gual un a sung ah um zosia chemjam ah sat lum sik sek in, a zo tau a.

³⁶ Joshua chu Israelte zosia tawh Eglon khua kipat in Hebron khua zuan in a chia kit ua; a vado ua,

³⁷ a la ngâl tau ah; zia khua leh a leng, a khawpel zosiau tawh a sung ah um zosia chu chemjam in a sat lum sik sek tau a; Eglon khua a bawl gual gual un pakhat chale hawi lo in, a khua nangawn susia sik sek in, a sung ah um zosia chu a that gam tau hi.

³⁸ Chun, Joshua leh Israelte zosia chun Debir khua a zuan ua, a do tau a,

³⁹ a khua leh a lengpa, chuleh a khawpel zosiau chu a lau ah; chemjam in a khua sung ah um zosia a that gam tau a, pakhat chale a hawi puau ah; Hebron khua a bawl gual gual leh, Libnah khua leh a lengpa chung ah a bawl gual gual khan, Debir khua leh a lengpa chung inle a bawl tai.

⁴⁰ Chutichun, Joshua’n a gam pumpi, tâng gamte, Negeb lam, phâi gam leh tâng pang gamte leh a lengteu zosia that gam in, a la zo vek ah; Lalpa, Israelte Pathian in thu a piak dungzui in, a hathei zosia khêk neilo ah, mi pakhat chale hawi neilo in a sumang sik sek tai.

⁴¹ Tichun, Joshua’n Kadesh-barnea ah kipat Gaza tiang leh, Goshen gam zosia tawh Gibeon khua tiang in a susia sik sek tai.

⁴² Zia lengte zosia leh a gam uh hi, Lalpa Israelte Pathian in Israelte a dopi ziakin, Joshua’n hun khat thu in a lak piak vek a hi.

⁴³ Tichun, Joshua leh Israelte zosia chu Gilgal ah a giamun lam un a chia kit tau hi.