JOSHUA 1 - PATHIAN LEKHABU THIANGTHO (BSI)

Pathian in Joshua Mawpuakna A Piai

¹ Lalpa suak Mosi a thi’nung in, Mosi kithuapi sek Nun chapa Joshua kiang in Lalpa‘n zia gual hin a gen a:

² “Ka suak Mosi lah a thi ta’n; tu’hin nangma tawh, zia tak ah mipi zosia hi Israelte â ding ah ka piakna gam chu lua dingin Jordan lui gâl kâi dingin kisa tau in.

³ Mosi kiang ah ka la kitiamna dung zui in, la keng ua la chotnau taphot chu ka hun piak ahi ngâl hi.

⁴ Gamthip ah kipat Lebanon tâng leh Luipi Lian, Euphrates tiang ah Hit mite gam zosia tawh, tumlam ah Tuipi Lian chu la gam giu hi’n a.

⁵ La dam sung in mihingcha la âng ah pang ngam ding kuama um pua’n ah. Mosi ka umpi gual khan nang le hun umpi ing ka tin; hun kilepsan pua’ng ka tin, hun nusia diak pua’ng ka.

⁶ Hat tak leh hangsan tak in um in; a pu leh pateu kiang ah piak ding ah ka la tiamna gam hi, zia mipite gochan dingin hawm piak ding la hi’ngâl a.

⁷ Ka suak Mosi’n dan thu a hun piak dung zui ah um dingin, hat tak leh hangsan tak in um phot mai in; la chiana taphot ah la lamzan zing theina dingin, la changlam a hem leh la veilam a hem in pêtmang him him kin.

⁸ Zia dan lekhabu hin la kam pawtsan ki’hen la; a sung ah kizik dung zui ah chingthei tak ah la bawltheina dingin, a thute chu a sûn a jan in ngaitua sek in. Ziaphat chuleh, la lampi lamzang intin, lawting ding la hi’ngâl a.

⁹ Ziaziakchun, thu ka hun pia la hi: hat tak leh hangsan tak in um in; lau kin la, lunglel diak kin; Lalpa la Pathian chun la chiana taphot ah hun umpi zing ding ahi ngâl ah,” a ti tai.

Gam Bulu Ding ah Kisakna

¹⁰ Ziaphatchun, Joshua’n mipite chung ah hotute chu zia gual hin thu a pia’n:

¹¹ “Giabuk ah chiau inla, mipite kiang ah zia gual hin thu vapiau in: ‘La nêk ding uh ngaituau in; ni thum sung in Lalpa la Pathian un a hun piakna gam chu lua dingin Jordan lui gâl kâi ding la hi ta’ngâl un,’ tiu in la,” a tia.

¹² Reuben phung ah mite, Gad phung ah mite leh Manasseh phung kimkhat ah mite kiang in Joshua’n hiti hin a gen a:

¹³ “Lalpa la Pathian un la kichawldamna ding un, zia gam hi hun pia ding ahi, ti Lalpa suak Mosi’n thu a hun piak kha hezing un.

¹⁴ Jordan lui gâl lam ah Mosi’n a hun piakna gam ah chun la jiteu, la chateu leh la gancha honteu a la um uh hen. Ahi’n, la lak ua gâlhangsan zosia gâlthuam ah kivan ah la unauteu masang ah gâl kâi in, amau panpi ding ah la hung kuan ding uh ahi;

¹⁵ Lalpa la Pathian un a piakna gam chu lua ah, nanghaw gual tho ah la unauteu Lalpa‘n chawldamna a piak masangsiau gâl chu la dopi ding uh a hiu. Ziazaw chuleh, Lalpa suak Mosi’n a hun piakna, Jordan lui gâl sua lam kâi ah la gam ua chun kile’kit in, zia gam chu chang ta’n lau,” a tia.

¹⁶ Amau inle Joshua kiang in, “La thupiak zosia chu bawl ing ka tiu in, lei sawlna taphot ah chunle chia ing kau.

¹⁷ Bangkim ah Mosi thu ka la zawp sek gualmau khan, nangma thu le zawm jel ing kau. Lalpa la Pathian in Mosi a la umpi gual tho ah khan, nangmale hun umpi zing ta hen!

¹⁸ Kuale la thupiak nial ah, la thupiak zosia zawm nuam lo taphot chu thalup mai ding hiu hen. Hat tak leh hangsan tak in um phot mai in,” ti’n a dawnhu tau a.