JONAH 3 - PATHIAN LEKHABU THIANGTHO (BSI)

Ninevehte Gitlo Simna

¹ Lalpa chun, Jonah kiang in a niveina dingin a hun gen kit a:

² “Kipan inla, Nineveh khua lopi tak ah chun chia’n la, a kiang ua la vagen ding ah ka thu hun hil kha va puangjak in,” a tia’.

³ Tichun, Jonah chu a kipandok ngal a, Lalpa gen gual in Nineveh khua’n a chia ta’n. Nineveh khua chu a lian ma ma ah, a palthenna ding ah le ni thum lam sêt lût ahi.

⁴ Jonah chun, khawpi sung ni khat lam a zawt nung in thu a gen pan a: “Ni sawmli zaw leh Nineveh hi sukmanthai hiding ahi tai,” ti’n tâng a sam a.

⁵ Nineveh khua mipite chun Pathian a taksang tau a; anngawl ding thu a puang ua; mitin, a lian a neu in saidip puan a sil tau a.

⁶ Zia thu chu Nineveh khua lengpa’n a hun het phat in, a lalchutpha ah kipat dingdok in, a lal puan a lîptha, saidip puan sil in, leivui lak in a kichu tai.

⁷ Ziaphatchun, Nineveh ah chun thupuan a bawl ta’n: “Lengpa leh a sia’mângte thupiak in: Mihing hileh, bawng hon hileh belam hon natiang in an ne lo, tui dawn lo in, bang ma chale tep kiu hen.

⁸ Mihingte leh ganchate’n saidip puan sil uh hen la, aw ngai tak in Pathian ko chiat tau hen. Mitin in a thil phalo bawl uh haisan in, a khut ua thagum sua’na chu haisan chiat tau hen.

⁹ I manthailo’na ding un; Pathian chun a lung khiam in, a lungnatna huaisia tak ah kipat chun kihei kit in ah ti kua a hem hethei ding?” a tia.

¹⁰ Pathian in a thil bawlteu, a lampiu phalote a kiheisan dan uh a mu phât in, a chung ua thil phalo tung ding a gensate chu bawl talo dingin a lungthim a theng tai.