JONAH 1 - PATHIAN LEKHABU THIANGTHO (BSI)

Pathian Ah Kipat Jonah Tai mang Guatna

¹ Amittai chapa Jonah kiang in Lalpa‘n thu a hun gen a:

² “Nineveh, khaw lopi tak ah chun chia vak inla, a chungthuu ah hin tâng vasam in; a gitlonau chu ka ma âng in a hung tung to ta’ngal in,” ti in.

³ Himaleh, Jonah chu Lalpa ah kipat in Tarshish lam zuan ah tai mang gua’n a kipandok ta’n, Joppa khua’n a chia suk a; Tarshish lam zuan ding long pakhat a mu’n, a chuanman ding a pia, Lalpa âng ah kipat tai mang gua’n, Tarshish lam zuante tawh kiton ding in a chuang tai.

⁴ Himaleh, Lalpa‘n thigawpi nasa tak tuisuagiat chung in a hânsak ta’n; tuisuagiat chung ah chun thigawpi nasa tak a hung hân ta ziak in, long chu sia ding a kisa ziang tai.

⁵ Longpute a lau tau ah, mi tin in a pathian uh a ko chiat tau a. A long uh sukjangkhaina dingin, a sung ah vante chu tuisuagiat in a paitha tau a. Zia hun ah chun Jonah chu long sunggil lam pek ah lut in, i-mut tui tak in a la ipmu tai.

⁶ Longpu lian pen a hung ah, “Aw nang i-mut thûtpa, bang bawl la hem? Tho inla, la pathian ko in! I manthailo’na ding un pathian in ei ngaitua piak thei khâk leh,” a hung tia.

⁷ Longpute chun, “Hung tiam un, zia thil phalo I chung ua hung tung ta hi kua ziak a hem, I hiattheina ding un âisân hitiu,” a ti tau a. Tichun, âi a sân tau a, Jonah chung in a chu tai.

⁸ A kiang in, “I chung ua zia gual thil phalo a hung tun tâk mai hi bang ziak a hem ei hil in. Bang nasêm la hem? Khoi tak ah kipat hung la hem? Khoi gam mi la hem? Bang mi la hem?” ti’n a dong tau a.

⁹ Ama chun, “Hebrai mi ka hi’n, Lalpa, van Pathian, tuisuagiat leh khawmual siampa ho mi ka hi,” ti’n a dawnhu tai.

¹⁰ Ziaphatchun, mite chu a lau zaw diak tau a; chuleh, a kiang in, “Bang thilbawl kha la hita le!” a tiu a. Lalpa ah kipat jam mang ahi ti a la hilsa ahiziak in, a la he ta’ngal un.

¹¹ Ziaphatchun, amau in a kiang in, “Tuisuagiat hi kei uh â ding ah a thip theina dingin bang hun law ding ka hiu em?” a ti tau a. Tuisuagiat kinawk chula a nasa deu deu ngal a.

¹² Ama’n a kiang un, “Ei domdok unla, tuisuagiat sung ah ei pai thau in; ziaphat chuleh, tuisuagiat chu nang uh â dingin hung thip ta’n a; keima ziak ah zia gual thil hi tuak la hiu ti ka he ngal a,” a ti tai.

¹³ Se’pho lam ah kile’kit ding gua’n, nasa tak in long chu a jap tei tei nalai ua; himaleh, tuisuagiat kinawk chu a ti lo dan dan un a huaisiat deu deu tâk ziakin, a jap zo ta puau hi.

¹⁴ Ziaphatchun, Lalpa kiang in a kikodok tau a: “Aw Lalpa, lungsiat tak in zia mipa ziak hin keihaw ei sumangthai lo ding in ka hun ni ui. Midik thisan maw ka chung un nga kin; aw Lalpa, nang in, la nawp dan dan in la bawl ngal a,” a tiu a.

¹⁵ Tichun, Jonah chu a domdok ua, tuisuagiat ah chun a sep lut tau a; tichun, tuisuagiat phul but but chu a thip tai.

¹⁶ Ziaphatchun, mite chun Lalpa a lau zaw diak tau a; tichun, Lalpa kiang in kithoina a lân ua, thutiamte a bawl tau hi.

¹⁷ Himaleh, Lalpa‘n ngapi lian tak pakhat, Jonah a la val dingin a la guanggalsa a um ah; tichun, Jonah chu ngapi gilpi sung in sûn thum leh jan thum a um tai.