JOHAN 9 - PATHIAN LEKHABU THIANGTHO (BSI)

Mitthûmsa Piang Sukvakna

¹ Jesu a chia kawm in, mi pakhat a pia’n ah kipat mitthûm a mu’n.

² A nungzuite chun a kiang in, “Hotupa, zia pa mitthûmsa a pian hi ama gitlo ziak a diam, a nu leh pa gitlo ziak a hizaw diam?” a tiu a.

³ Jesu’n a dawnhu, “Zia pa hin thil a hi’khial pua’n, a nu leh pa’nle a hi’khial diak puau hi: Pathian nasep ama ah a kilat theina dingin a hizawi.

⁴ Sûn ahi pêtcha hin ei sawlpa na ka sep ding ahi: jan hiding ei tai, zia phat chuleh kuama’n na sêm thei ta pua’n au.

⁵ Khawvel ah ka um sung hin khawvel vâk chu ka hi,” a tia.

⁶ Zia chu a gen zaw in, lei ah a chil a sek ah, a chil chun tungman a siam ah, tungman chu mitthûmpa mit a vak nu’piak a,

⁷ a kiang in, “Chia’nla, Siloam dil ah la mai vaphiat in,” a tia. (Siloam chu, ‘Sawl’ ti’na ahi.) Tichun, a chia a mai a vaphiat leh khawmuthei in a hung kit tai.

⁸ A Invêngte, nidang ah a mitthûm lai ah la mute khan, “Zia pa hi khutdaw ah kichu sekpa kha hilo a hem?” a tiu a.

⁹ Mi khenkhat chun, “Ama kha ahi,” a tiu ah; khenkhatte chun, “Ahi puai, a kibatpi ahi,” a tiu ah; ama chun, “Zia pa ma kha ka hi,” a tia.

¹⁰ Amau chun, “La mit bangti hung vak kit a hem leh?” a tiu a.

¹¹ Ama chun, “Mi pakhat, Jesu kiti khan tungman a siam ah, ka mit a nu’ ah, ‘Siloam dil ah vachia’n la, la mai vaphiat in,’ ei tia; ka vachia ah, ka mai ka vaphiat leh, khua ka hun mu thei ta mai ahi,” a tia.

¹² Amau haw chun, “Ama chu khoi ah um a hita em?” ti’n a dong tau a. Ama chun, “Ka hepuai,” a tia.

Pharisaite’n Sukdamna Thu A Dawpchiannau

¹³ Mitthûmsa umpa chu Pharisaite kiang in a hun pui ua.

¹⁴ Jesu’n tungman a siam ah, a mit a hi’vâk piak ni chu sabbath ni a hi’n.

¹⁵ Pharisaite’nle khua a hun mutheina dan chu a dong un. Ama chun a kiang un, “Ka mit tungman ei nu’piak ah, ka mai ka vaphiat leh khua hun muthei ka hi,” a tia.

¹⁶ Pharisai khenkhatte chun, “Sabbath ni le khawksa lo mihing hi, Pathian ah kipat ei puai,” a tiu a. Midang khenkhat chun, “Migilo in zia gual thilmak hi bangti’n bawl ding a hem?” a tiu ah; a lak un kikhenna a hung um tai.

¹⁷ Tichun, mitthûmpa kiang ah chun, “Nang in la mit hi’vâk piakpa kha bang ti’n la ngai em?” a tiu a. Ama chun, “Jawlnei ahi,” a tia.

¹⁸ Judate chun, mitvâkpa nu leh pa chu a ko masang un, ama chu mitthûm a la hi’n, a mit hung vâk kit ahi, ti chu a taksang puau a;

¹⁹ a nu leh pa chu a dong tau a, “Zia pa hi la chapau, mitthûmsa piang la tiu kha a hem? Bangatileh tu’hi hun muthei ta a hem?” a tiu a.

²⁰ A nu leh pa chun a kiang un, “Zia hi ka chapau, mitthumsa piang kha ahi ti ka hiau hi;

²¹ bang gual ah hun mu thei a hem ti vang ka hepuau hi; kua’n a mit a sukvak piak a hile ka he diak puau hi; ama le piting a hita’n, ama dong leu chin, ama chung thu chu kigen thei in a,” a tiu a.

²² A nu leh pa chun Judate chu a lau ziak uh ahi’n; Judate chun, “Kua’nle Jesu chu Messiah ahi, a tiu leh kikhopna In ah kipat nawdaw ding,” a tisau ahi ziakin.

²³ Ziaziakchun, a nu leh pa chun, “Piting a hita hilam, ama dong un,” a tiu ahi.

²⁴ Ziaphatchun, mitthûmpa chu a ko kit ua, a kiang in, “Pathian chu pâk ta’n! Zia mipa kha vang migilo ahi ti ka hiau hi,” a tiu a.

²⁵ Ama chun a kiang un, “Ama chu migilo ahileh hilo ka hepuai, thil pakhat ka hia’i, masang khan mitthûm ka hi’n, tu’hin vang ka muthei tai,” a tia.

²⁶ Amau chun, “Bang a hun law em? La mit bang a ti sukdam em?” a tiu a.

²⁷ Ama chun a kiang un, “Dan ah khanle ka gen ta kha lam, la he nuam puau ah; bangatia tu’hi he nuam kit la hitau em? Nang hawle ama nungzui hi la nuam ua a hem?” ti’n a dawnhu a.

²⁸ Ama chu a vau tau a, “Nang ama nungzui la hi’n, kei uh Mosi nungzui ka hiu.

²⁹ Pathian in Mosi kiang in thu a gen hi ti ka hiau hi, ahi’n, zia pa hi khoi ah kipat hung a hem ka hepuau hi,” a tiu a.

³⁰ Ziaphatchun, ama chun a kiang un, “Khoi ah kipat hung ahi la hetlo ua, ka mit ei hung sukvâk piak thei ziang hi ahi, a makna pen chu.

³¹ Pathian in migilo thu a ngai pua’n; ahi’n la, kua’nle Pathian a ho ah, a doigual a bawl chun a ngaithâk piak sek hi.

³² Khawvel kisiam lim ah kipat in, mi a pian ah kipat mitthûmte mit hi’vâk piak I hekha nai puau hi.

³³ Zia mi hi Pathian ah kipat mi hiloleh vang, bangma hi’theilo ding a hi,” a tia.

³⁴ Amau chun a kiang in, “Nang la pumchang ah gilo ah piang hin kei uh ei hil gua la hi maw?” a tiu a; tichun, ama chu a nawdok tau hi.

Thagau Lam Mitthûmna

³⁵ Jesu’n ama chu a nawdok ui, ti a la he ta’n; ama chu a mudaw kit phatin, a kiang in, “Mihing Chapa la gingcha em?” a tia.

³⁶ Ama chun a kiang in, “Lalpa, ama chu kua a hem? Ama chu ka gin theina dingin ei hil tia,” a hun tia.

³⁷ Jesu’n a kiang in, “Ama chu la mu tai, tu’ nangma hopa hi ahi,” a tia.

³⁸ Ama chun, “Lalpa, ka ging hi,” a tia. Tichun, ama chu a ho tai.

³⁹ Jesu’n a kiang in, “Zia khawvel ah hin vaihawm ding ah hung ka hi, mitthûmte chun mitvakna a neina ding uh leh, mitvâkte chu a mit uh a thûmna dingin,” a tia.

⁴⁰ Zia a thugen chu a kiang ah Pharisai umte chun a la hiau ah, a kiang in, “Aleh, kei uh le mitthûm ka hiu em?” a tiu a.

⁴¹ Jesu’n a kiang un, “Mitthûm hileuchin gitlona neilo ding la hiu a; ahi’n, ‘Ka muthei nai,’ la ti ziak un, la gitlonau ah um zing la hiu hi,” a tia.