JOHAN 8 - PATHIAN LEKHABU THIANGTHO (BSI)

Numei ângkawm A Matnau

¹ Jesu chu Oliv tâng lam in a chia a.

² Jingkal matak in tempul ah a hung kit ah, mi zosia a kiang in a hung un; ama chu a kichu, thu a zilsak tai.

³ Zia tak ah chun, lekhazikte leh Pharisaite chun, numei ângkawm pakhat a mat uh chu a hun pui ua, a lai un a dinsak tau a;

⁴ Jesu kiang in, “Hotupa, zia numei hi a ângkawm lai tak ah kiman ahi’n.

⁵ Mosi Dan ah chun zia gual mi hi suang ah se’lup ding ah thupiak ahi; nang in bangti’n la ngai em?” a hung tiu a.

⁶ Zia chu ama a mat theina ding ua, ze-etna a hung dot uh ahi’n. Jesu chu a khûn ah, a khutzung in leitual a zik a.

⁷ A vêl vêl ah a dot ziak un, a hung dakdok ah, a kiang un, “La lak ua gitlona neilo pen pen in zia nu hi suang in hun sep masa pen un,” a tia.

⁸ Ziazaw chun a khûn suk kit ah, leitual chu a zik kit tai.

⁹ A thugen chu a het phat un, a upate lam ah kipat in, pakhat khat in a pawtdok tau a; Jesu leh numei a lai ah dingnu bep chu a um tau hi.

¹⁰ Jesu’n ama chu a hun en ah, “Numei, khoilam tung a hitau em? Pakhat inle thiamlo a hun chan puau maw?” a tia.

¹¹ Ama nu chun, “Lalpa, kuama’n thiamlo ei chansak puau hi,” ti’n a dawnhu a. Jesu’n a kiang in, “Ke’nle thiamlo ka hun chansak diak puai, chia’n la, gilo kit ta kin,” a tia.

Jesu Khawvel Vâk Chu

¹² Jesu’n a kiang un thu a gen kit a, “Keima khawvel vâk chu ka hi. Ei zui tapo chu thim in leng pua’n tin, hinna vâk nei zaw’n a,” a tia.

¹³ Pharisaite’n a kiang in, “Nangma chung thu kigen mai mai la hi, la thu hiatsak a dik puai,” a tiu a.

¹⁴ Jesu’n a dawnhu, a kiang un, “Keima leh keima kigen hiziang lengle, ka thugen hi a dik hi; khoi ah kipat hung ka hi ka kihia hen, khoi ah chia ding ka hile ka kihiai; nang un vang khoi ah kipat hung ka hi la gen thei puau in, ka chiana dingle la gen thei diak puau hi.

¹⁵ Nang hawn mihing dan bep in thu la tan sek un, keima’n vang kuama thu ka tan puai.

¹⁶ Keima’n thu tan tamawng lengle, ka thutan chu a dik hi, keima ngawn ka hipua’n, Pa ei sawlpa tawh um ka hizawi.

¹⁷ La Dan Lekhabuu ah chun, mi pani kithutuakna chu a dik ahi, ti ahi khalam.

¹⁸ Keima’n ka chung thu ka kigen in, ka Pa ei sawlpa chunle, keima chung thu ma a gen hi,” a tia.

¹⁹ Ziaphatchun, amau chun a kiang in, “La Pa chu khoi ah um a hem?” a tiu a. Jesu’n a dawnhu ah, “Nanghaw hin, keima lei hepuau in, ka Pa le la he diak puau hi. Keima ei he hileuchin, ka Pa le he ziang ding la hiu,” a tia.

²⁰ Jesu’n, zia a thugente hi, tempul sum koina mun ah a thu zilsakna a gen ahi; a hunle a tun nailo ziakin, kuama’n a man ngam puau hi.

Jesu’n A thi ding A Genlawkna

²¹ Chuleh, a kiang un Jesu’n zia thu hi a gen kit a: “Chia mang ding ka hi, ei hawl in la tiu in; himaleh, nanghaw chu la gitlonau in thi ding la hiu. Ka chiana lam ah hung theilo ding la hiu,” a tia.

²² Judate chun, “Ka chiana hung thei pua’n lau, a ti hi, ama leh ama kithâ gua ahi diam?” a tiu a.

²³ Ama chun, a kiang un, “Nanghaw nuai lam ah kipan la hiu ah, kei ka hileh vang chunglam ah kipan ka hi; nanghaw hi zia khawvel ah mi la hiu in; kei chu zia khawvel ah mi ka hi puai.

²⁴ Ziaziakchun, ‘La gitonau ah thi ding la hiu,’ ka ti la hiu; keima lei ginchâk lo ziak un, la gitlonau ah chun thi ngei ding la hiu,” a tia.

²⁵ Ziaphatchun, amau chun, “Nang hi kua la hem?” a tiu a. Jesu chun, “Bang ding ah hun gen kit nalai ding ka hem?

²⁶ La chungthuu ah hin gen ding leh demna ding tam tak ka nei nalai hi; himaleh, ei sawlpa chu midik tak ahi’n, ama ah kipat ka hiatte chu zia khawvel kiang ah hin ka gen zawk ahi,” a tia.

²⁷ Amau haw chun Pa chung thu gen ahi lam lam le a hepuau hi.

²⁸ Tichun, Jesu’n a kiang un, “Mihing Chapa hi la hun khaikâng tak ua leh, kei hi ama chu ka hi ti hun he ta’n la tiu in; chuleh, keima thu bangma ka bawl lo dan leh, Pa’n ei thupiakte bep bawl sek ka hi dan hi hun hechian ta’n lau.

²⁹ Keima ei sawlpa hi keima tawh um khawm ka hiu; ama kipakna ding bep ka bawl zing sek ziakin, ama chun kei ngawn in ei nusia ngai puai,” a tia.

³⁰ Zia thute chu a gen phat chun, mi tam tak in ama a hun taksang tau hi.

Nungzui dik tak

³¹ Jesu’n ama gingcha Judate kiang in, “Ka thu la um zing ua leh, ka nungzui dik tak hi’n lau;

³² thu tak chu hun hia’n la tiu in, thu tak chun suak ah kipat hun pawt sak in a,” a tia.

³³ Amau chun a dawnhuu a, “Kei haw hi Abraham suante ka hiu, kuama suak in ka um kha puau hi, bangtidan ah, ‘Suak ah kipat pawt ding la hiu,’ la ti a hem?” a tiu a.

³⁴ Jesu’n a dawnhu a, “Titakzet in ka hil la hiu, kuale, gitlo bawl zing chu gitlona suak ah um ahi.

³⁵ Suak chun Insung ah umna det a nei pua’n; Chapa chun vang umna det a nei hi.

³⁶ Tichun, chapa’n a hun zalensak chun, zalen tak tak hiding la hiu.

³⁷ Nang haw hi Abraham suante la hiu ka henai; himaleh, ka thu hin nangmau ah mun a neilo ziakin, nang un tha lei guat uh ahi.

³⁸ Keima’n ka Pa ah kipat thu ka mute ka gen in; nang unle la Pau ah kipat thu la muteu la bawl sek uh ahi,” a tia.

Jesu tawh Abraham

³⁹ Amau chun a kiang in, “Ka Pau chu Abraham ahi,” a tiu a. Jesu’n a kiang un, “Abraham chate hileuchin, Abraham thilbawlte bawl ding la hiu in;

⁴⁰ himaleh, Pathian ah kipat thu tak ka hiatte hun hil sek keima hi thâ lei guau hi. Abraham in vang zia gual chun a bawl ngai puai.

⁴¹ La pau nasep chu la sêm uh ahi hilam,” a tia. Ziaphatchun, amau chun, “Keihaw hi jaucha mai mai ka hi puau in, pa pakhat ka nei ui, Pathian ngei chu,” a tiu a.

⁴² Jesu’n a kiang un, “Pathian chu la pau hileh keima ei hepi ding la hiu in; Pathian ah kipat ka hung pawt ah, zia tak hi hung tung ka hi’n. Keima nop thu hung ka hipua’n, ama’n ei sawl ah hung ka hi.

⁴³ Bangatia, ka thugen hi hethiam theilo la hiu em? Ka thugen la pom lo ziak uh ahi.

⁴⁴ La pau diabol mite la hiu in, la pau doigual bawl la nuam ui. Ama chu a lim ah kipat tualthat ahi’n, thu tak in a um ngai puai; ama ah chun thu tak him him a um puai. Zuau a gen tak leh ama mizia dungzui in a gen sek a; ama chu zuauthei ahi’n, zuauthei te pa le ahi.

⁴⁵ Himaleh, thu tak ka gen ziakin lei gingcha puau hi.

⁴⁶ Migilo ka hi’na genchian thei la um awm? Thu tak gen ka hileh bangatia ei gingcha lo la hiu em?

⁴⁷ Pathian ah kipat hungte chun Pathian thute a ngai sek ui. Nanghaw hi Pathian ah mi la hilo ziak un, a thute le ngailo la hiu hi,” a tia.

⁴⁸ Ziaphatchun, Judate chun a hun dawnhuu a, “Nang hi Samari mi, thitha jawl ka hun tiu kha, ka ti dikten uh hilo a hem?” a hun tiu a.

⁴⁹ Jesu’n a dawnhu a, “Thitha jawl ka hi pua, ka Pa chu ka chawihoi zaw ahi; himaleh, nang un lei suminsiau ahi.

⁵⁰ Keima min phatna hawl ka hipua’n; ei hawl piak mi pakhat a um nai.

⁵¹ Titakzet in ka hil la hiu, Kua’nle ka thu a zui chun thi ta pua’n a,” a tia.

⁵² Ziaphatchun, Judate chun a kiang in, “Tu’hin thitha jawl la hi ti ka hechian tau hi, Abraham a thi ta’n, jawlneite le a thi tau hi; nang in la, ‘Kua’nle ka thu a zui chun thina tep pua’n ah,’ la ti’n;

⁵³ a la thi ta, ka pau Abraham sâng ah lopi zaw la hem? Jawlneite le a thi zo tau hi. Nang hi kua la hem?” a tiu a.

⁵⁴ Jesu’n, “Keima kilopisak hileng, ka kilopisakna chu bangma hipua’n a. Nang hawn, ‘Ka Pathian uh,’ la tiu, ka Pa chu ei chawisangpa ahi;

⁵⁵ ama chu helo maleu chinle, keima’n vang ama chu ka hia’i; ama chu ka hepuai ti leng, nanghaw gual tho ah zuau thei hiding ka hi; himaleh, ama chu ka hia, a thule ka jawm ahi.

⁵⁶ La pau Abraham khan ka hun hi mu ding a la kithalawp ma ma ah; a hun mu ngei ah, a kipak ahi,” a tia.

⁵⁷ Ziaphatchun, Judate chun a kiang in, “Nang kum sawmnga le ting nailo in Abraham chu la mu kha a hem?” a tiu a.

⁵⁸ Jesu’n a dawnhu a, “Titakzet in ka hil la hiu, Abraham um masang khanle ka la um tai,” a tia.

⁵⁹ Ziaphatchun, suang ah se ding gua’n suang a luak tau a; himaleh, Jesu chu a kisêl ah, tempul ah kipat chun a pawtdok tai.