JOHAN 15 - PATHIAN LEKHABU THIANGTHO (BSI)

Jesu Chu Grep Gui Tak ahi

¹ Kei hi grep gui tak chu ka hi, ka Pa chu a grep huanneipa ahi.

² Keima ah bâk ga lo tapo chu a sâttha sek hi. A bâk ga sua tapo chu, a ga tam zawk diakna dingin a hi’thiang sek hi.

³ Nanghaw vang, la kiang ua thu ka gen tâk ziak hin la thiangtho tau hi.

⁴ Nangmau ah ka um zing gual hin, keima ah um zing un. Bâk chu a guipi tawh a kizop lo leh, ama ngawn ah a ga theilo gual hin, nangmaule keima ah la um zing lo ua leh ga thei pua’n lau.

⁵ Keima hi grep guipi chu ka hi’n, nang uh a bâkte chu la hiu. Kuale keima ah um ah, keile ama ah ka umna chu, zia mi ngei chun ga tampi a hun sua sek hi; keima lo in bangma la hi’thei puau hi.

⁶ Mi keima ah a um zing lo chun, bâk gual ah sâtthâk ah um in, a hung vuai sek hi; tichun, a chomkhawm un, mei lak in a pai lut un, a kâng sek hi.

⁷ Nanghaw le keima ah la um zing ua, ka thute le nangmau ah a um zing chun, la dawi dawi uh don un, zia chu hi’piak in um in lau.

⁸ Tam tak ah la ga ziak un ka Pa chu choihoi in a um sek hi; tichun, ka nungzuite hi’n lau.

⁹ Pa’n keima ei hepi gual in, ken le nanghaw ka hun hepi ahi; ka hepina’n um zing un.

¹⁰ Ka thupiakte la zop zing ua leh ka hepina’n um zing in lau; keima’n le ka Pa thupiakte ka jawm ah, a hepi ah ka um zing gual hin.

¹¹ Ka kipakna nangmau ah a um zing ah, nangmau kipakna le sukbutin ah a umtheina dingin, la kiang un zia thute hi ka gen ahi.

¹² Zia hi ka thupiak chu ahi: Keima’n ka hun hepi gual hin, nangmaule kihepi tua chiat un, ti hi.

¹³ Min a gual a pâi â ding ah a hinna a piak sâng ah hepina lian zaw kuama’n a nei puai.

¹⁴ Ka thupiak tapo la bawl ua leh ka gualte hi’n lau.

¹⁵ Tu’khêl vang suakte hun ti ta pua’ng ka, suak chun a pu thilhite a he ngai puai; gualte hun ti zaw ta’ng ka, ka Pa ah kipat ka thil hiatteu zosia ka hun hiatsak sik sek tangal in.

¹⁶ Nang un lei têl puau in, keima’n ka têl jawk la hiu. La chiau ah, vaga ding leh la gau um zing dingin ka guat la hi zawu hi; ka min ah Pa kiang ah la dot tapo uh a piak theina ding in.

¹⁷ La kihepi tua chiat theina ding un, zia thupiak cheng hi ka piak la hiu.

Gingtute Khawvel in A Huatna

¹⁸ Khawvel in a hun huat chun, nang uh a huat ma khan keima ei haw tai, ti la het diu ahi.

¹⁹ Nanghaw khawvel mi hileuchin, khawvel in ama mite chu hepi in a; khawvel mi la hita pawngal un, khawvel ah mi ka têldaw la hizawu ah, ziaziakchun, khawvel in a huat la hiu.

²⁰ Suak chu a pu sâng in a lian zaw puai, ti thu ka gen tâk kha hezing unla. Amau in kei ei sukgenthei ua leh, nang uh le sugenthei in au; ka thu a zop ua leh nangmau thu le zawm in au.

²¹ Himalehle, zia thil zosia hi ka min ziakin la chung un hun bawl in au, kei ei sawlpa a het lo ziak un.

²² Keima hung lo in, a kiang un thu hung gen lo hileng chu, gitlona neilo hiding a hiu a; himaleh, tu’hin vang a gitlonau suanlam ding bangma a nei ta puau hi.

²³ Kuale keima ei hua chu ka Pa le hua ahi.

²⁴ Midang in thil a la hi khâk ngailote a lak ua hi’lo hileng chu, gitlona nei hipua’n au; tun ahileh vang chu, kei leh ka Pa chu ei mu tau in, huat le ei haw tau hi.

²⁵ A ziak umlo in ei huau hi, ti ah Dan Lekhabu a la kizik kha a guitunna dingin zia thilte hi tung ahi.

²⁶ Himaleh, Genpiakpa, Pa ah kipat ka hun sawl ding, thutak Thagau chu a hung tun phat leh, keima chanchin ma hi hun taklang ding ahi.

²⁷ Nangmaule a lim ah kipat ka kiang ah um la hiziak un, keima chanchin genjakte hung hiding la hiu, a tia.