JOHAN 10 - PATHIAN LEKHABU THIANGTHO (BSI)

Jesu Belampu Pha Chu

¹ Jesu chun: “Titakzet in, ka hil la hiu, kuale belam huang kotkhak ah lut lo ah, lampi dang ah hung kãl lut chu, zia mi chu gucha leh suammang ahi.

² A kotkhak ah lut chu belamte chingpa chu ahi.

³ Ama chu a kotkhak vêngpa chun kot a hon piak ah; a belamte’n le a aw a hiau ah; ama belamte chu a min un a ko chiat ah, a puidok sek hi.

⁴ A belamte chu a puidaw suak tak leh, a ma-âng un a chia in, a belamte chun a aw a het ziak un a zui sek ui.

⁵ Midang nung vang zui pua’n au, a kiang ah kipat taimang zawn au, midang aw a hetlo ziak un,” a tia.

⁶ Zia tekhinthu hi Jesu’n a kiang un a gen a; himaleh, a thugen chu a ngaina a he him him puau hi.

⁷ Jesu’n a kiang un thu a gen kit a, Titakzet in ka hil la hiu, Keima hi belam kotkhak chu ka hi.

⁸ Ka malam ah hungte zosia kha gucha leh suammang a hiu in; belamte’nle a thuu a la ngai puau hi.

⁹ Keima hi kotkhak chu ka hi. Keima ah hung lut chu bit intin, lut in pawt intin, nêk dingle mu’n a.

¹⁰ Gucha chu gu ding leh, that ding leh susia ding longal in a hung ngai pua’n; kei ka hileh chu mi tam tak in hinna a nei ua, tam tak a nei theina ding ua hung ka hi.

¹¹ Kei belampu pha chu ka hi; belampu pha chun a belamte â dingin a hinna a piai.

¹² Belampu tak hilo ah, sumthalawte, a belamte neipa hilote vang chun, ngei hung a mu tak leh, a nusia vak ah, a jamsan ziang sek hi; zia tak chuleh ngei chun amau haw chu man in, belamte chu a jam chek ta sek ui.

¹³ Sumlawte chu, gawi kawm a hiziak un, belamte chu a ngaitua pha nuam puau hi.

¹⁴ Keima hi belampu pha chu ka hi; ka belamte chu ka hia’n, kei â te chunle keima ei hiau hi.

¹⁵ Pa chun keima ei het ziakin, ken le Pa chu ka hia’i; chuleh, belamte â dingin ka hinna ka pia’i.

¹⁶ Zia belam huang ah hilole belam dang ka nei nalai hi; amau haw chule hun pui ding ka hi, ziate chunle ka aw hun hia’n tiu in, belampu pakhat nuai in, huang khat ah hung lawi khawm ding a hiu.

¹⁷ Ka lâk kit thei ding ah ka hinna ka piak ding ziakin, ziaziakchun Pa chun ei hepi ahi.

¹⁸ Kuama’n ei lâkpiak pua’n a, keima thu thu ka piak jawk ding ahi. Pia thei ka hi’n, la kitthei le ka hi. Zia thupiak hi ka Pa ah kipat ka mu ahi, a tia.

¹⁹ Zia thute chu a gen ziakin Judate lak ah kikhenna a hung um kit tai.

²⁰ A lak ua mi tam tak chun, “Zia pa hi thitha jawl ahi, a ngol a hi, bang ding ah a thugen ngâi ngâi la hiu em?” a tiu a.

²¹ Khenkhatte chun, “Zia tawh bang thilte hi thitha jawlte thu’ um chi ahi puai. Thitha chun mitthûm a hi’vâk piak thei ah a hem?” a tiu a.

Judate’n Jesu A Doilonau

²² Zia hun ah chun, Jerusalem ah Kipumpiakna Kût a bawl lai tak uh, phalbi lai ahi’n;

²³ Jesu chu tempul ah Solomon hulliap in a vâk tawl tawl a.

²⁴ A kîmvêl ah chun Judate a hung khawm un, a kiang in, “Bang chan a hem lung vânglak tak ah lei koi ding? Messiah chu la hileh kichian tak in ei gen ta’n la,” a hung tiu a.

²⁵ Jesu’n a kiang un, “Ka hun hil ta kha lam, nang un la taksang puau ah ahi. Ka Pa min ah thil ka hite hin, ka chanchin a taklang zo tai;

²⁶ himaleh, la taksang puau hi; ka belamte la hilo ziak un ahi.

²⁷ Ka belamte chun ka aw a hiau hi. Ke’n le amau chu ka hia’n, amau chun ei zui sek ui.

²⁸ Chuleh, a kiang un kumtuang hinna ka pia’n, bangtik chan inle mangthai pua’n au. Kuama’n ka khut ah kipat ei lâkpiak pua’n au.

²⁹ Ka Pa, ka khut ah ei pepa chu mi zosia sâng ah lopi zaw ahi; ama khut ah kipat chun kuama’n lâkpiak thei pua’n au.

³⁰ Kei leh ka Pa chu pumkhat ka hiu,” ti’n a dawnhu a.

³¹ Ziaphatchun, Judate chun ama se ding gua’n suang a hun lau a.

³² Himaleh, Jesu’n, “Ka Pa ah kipat in nasep pha tam tak ka hun etsak tai. Bang pen ziak ah chu suang ah ei se gua la hiu em?” a tia.

³³ Judate chun, “La nasep phat ziak ah hun se gua ka hi puau in, mihing hingal ah Pathian in la kisiam ah, Pathian la gensiat ziakin ahi zawi,” a tiu a.

³⁴ Jesu’n a dawnhu, “La Dan Lekhabuu ah, ‘pathiante la hiu ka ti ahi,’ ti zik hilo a hem?

³⁵ Pathian thu hung tunnate bep bawn, ‘pathiante’ a ti leh, zia Pathian Lekha thu chu sukkek thei a hipua’n,

³⁶ Pa’n a se’chuam, khawvel ah ei sawl, ‘Pathian Chapa ka hi,’ ka ti ziakin bangatia Pathian la gensiai, ei ti’thei ding la hiu em?

³⁷ Ka Pa nasep ka sep lo chun ei taksang kiu in.

³⁸ Ahi’n la, ka sep ahi chun, kei ei taksang lo maleu chinle, thil kibawlte bêk hi taksang un; Pa keima ah um ti leh, keima Pa ah ka um ti la het ua, la taksan theina ding un,” a tia.

³⁹ Ziaziakchun, ama chu mat a hun guau a; himaleh, ama chu a khut ua kipat chun a suakcha kit tai.

⁴⁰ Ziazaw chun, Jordan gâl lam, Johan in a lim lai ah mi a baptis sekna mun lam khan a chia ah, zia tak chun a um den tai.

⁴¹ Mi tam tak a kiang in a hung un, amau haw chun, “Johan in thilmak bangma bawl lo maleh, zia mi chungchâng a gen tapo kha a dik suak kêi hi,” a tiu a.

⁴² Zia tak ah chun mi tam tak in a hun gingcha tau hi.