JOHAN 1 - PATHIAN LEKHABU THIANGTHO (BSI)

Thu Chu Taksa A Channa

¹ A tîl in Thu a um a, Thu chu Pathian tawh um ahi’n, Thu chu Pathian ahi.

² Zia chu a tîl in Pathian tawh a um in,

³ bangkim a leng in ama ziak ah siam ahi; thilsiam zosia ama siam lo bangma a um puai.

⁴ Ama ah chun hinna a um in; zia hinna chu mihingte vakna ahi.

⁵ Zia vâk chu thim lak in a hung vâk in, zia chu thim in a zo puai.

⁶ Pathian hun sawl mi pakhat a um in, a min chu Johan ahi.

⁷ Ama chu Vâk thu hiatsak dingin a hunga, ama ziak ah mi zosia’n a gin theina ding un.

⁸ Ama chu vâk chu a hipua’n, zia Vâk thu chu hiatsak ding ah hung a hizawi.

⁹ Vâk dik tak, mitin salvâk ding chu khawvel ah hung ahi.

¹⁰ Ama chu khawvel hin a um a, khawvel hi ama siam ahi; himaleh, khawvel in ama a la hepuai.

¹¹ Ama chu ama mite kiang in a hung ah, ama mite chun a la lop puau hi.

¹² Himaleh, ama a la lop ah, a min gingte chu Pathian chate hitheina a piai.

¹³ Ziate chu thisan a hin ahi puau in, taksa dawi gual ah hinle ahi diak puau in, mihing dawi dan ah hinle ahi diak puau a, Pathian hin ahi zawu hi.

¹⁴ Tichun, Thu chu taksa’n a hung chang a, I lak un a hung chêng ah, Pathian Chapa changkhat neisun lopina chu ahi’na gual tak in, hepina leh thutak ah dim in I la muu ahi.

¹⁵ Johan in a chanchin a hiatsak a, “Zia mi, ka nung ah hung dingpa chun ei makhel tai, ka malam ah umsa him ahi, tia ka gen sek kha ama hi ahi,” a tia.

¹⁶ Ama bukimna kipat in hepi chung ah hepi sawnna I chang chiat ui.

¹⁷ Mosi mang in Dan thupiak ahi’n; himaleh, hepina leh thutak chu Jesu Khrista ah chun a hung um tai.

¹⁸ Kuama’n bangtik lai inle Pathian a mu kha puau hi; himaleh, a Chapa changkhat neisun, Pa lung tawh kituak chun a chanchin a genchian hi.

Baptispa Johan Thu Hiatsak

¹⁹ Judate’n, “Kua la hem,” ti ah vadong ding ah Jerusalem khua kipat, a kiang ah thiampute leh Levite a sawl lai ua khan, Johan thu hiatsak chu zia hi ahi:

²⁰ Ama chun, kilep lo hial in a la kiphuang a, “Messiah chu ka hi puai,” a tia.

²¹ Amau chun a kiang in, “Kua la hi em leh, Elijah la hi em?” ti’n a dong kit un. Himaleh, ama chun, “Ka hi puai,” a ti kit a. Aleh, “Jawlnei la hi em?” a ti kit un. Ama chun, “Hilo,” a ti kit ngen a.

²² Ziaphatchun, amau chun, “Aleh, kua la hem? Ei sawlte ka hil kit theina ding un, la chung thu bang lei hil thei a um em?” a tiu a.

²³ Ama chun, “Jawlnei Isai in: ‘Lalpa lampi chu siam zang un!’ tia a gen, gamthip ah kiko aw kha ka hi,” a tia.

²⁴ Zia a mi sawlteu chu Pharisaite lak ah mi a hiu a.

²⁵ Amau chun, “Messiah le hilo, Elijah le hilo, jawlnei le la hi diak lo leh, bang a tia mi baptis sek la hem?” ti’n a dong un.

²⁶ Johan in a dawnhu ah, “Keima’n tui in ka baptis sek hi; himaleh, la hetlo uh la lak un a ding zing hi.

²⁷ Ka nung ah hung dingpa kengtawdap khau tham tâkle hilo ka hi,” a tia.

²⁸ Zia hi Johan in mi a baptisna mun, Jordan luigâl ah Bethani khua thil tung ahi.

Pathian Belamno Chu

²⁹ A jing ah chun Johan chun, Jesu ama kiang lam zuan ah hung chu a mu phât in, “En tiam un Pathian Belamno, khawvel gitlo pawmangpa saw!

³⁰ Zia pa saw ahi, ‘Ka nung ah hung ding, himaleh, ei makhel ta hen, ka malam ah umsa him ahi,’ ka ti kha.

³¹ Ama chu ka la he ziang pua’n; himaleh, ama chu Israelte lak ah taklat a hi’theina ding ah tui ah baptisma chansak ding ah hung masa ka hi,” a tia.

³² Johan ma ma chun a gen a, “Van ah kipat in Thagau chu vakhu gual in a chung ah hung chu suk in ka la mu’n, a chung in a um den tai.

³³ Ama chu ka la he ziang pua’n; himaleh, tui ah baptis ding ah ei sawlpa chun ka kiang in, ‘A chung ah Thagau hung suk ah, a chung ah hung chû, umzing la muna pen pen chu, zia mi chu Thagau Thiangtho ah baptispa ding chu hiding ahi!’ a ti’sa kha ahi.

³⁴ Zia chu ama chung ngei ah ka mu tâk ziakin, ama hi Pathian Chapa ngei chu ahi ti ka hiatsak ahi,” a tia.

Nungzui Masate

³⁵ A jing ah chun Johan tawh nungzuite pani a hung ding kit un,

³⁶ Jesu vâk vêl lai chu a la en un, ama chun, “En tiam un, Pathian Belamno saw!” a tia.

³⁷ Zia nungzui panite chun a gen chu a het phat un, Jesu chu a zui ngal tau a.

³⁸ Jesu chu a hung kihei ah, a hun zui uh chu a mu, a kiang un, “Bang hawl la hiu em?” a la tia. Amau chun, “Rabbi (zia chu Hotupa, ti’na a hi) khoi ah chêng la hem?” a tiu a.

³⁹ Ama chun, “Hung unla, hung en un,” a tia. Amau chu a hung ua, a umna chun a hung tau a, zia ni chun a kiang in a châm ua, a chianau chu nitâk lam dak li ding vêl a hita’n.

⁴⁰ Johan thugen a la he hun zui panite lak ah pakhat chu Andria ahi; ama chu Simon Peter suapi ahi.

⁴¹ Ama chun a masa pen in a suapipa Simon a hawldok ah, a mu phât in, “Messiah ka mu tau hi,” a tia (zia chu Sathaunu’, ti’na a hi).

⁴² Tichun, ama chu Jesu kiang in a pui a. Jesu chun, “Johan chapa Simon la hi; himaleh, Tu’kipat hin Kipha ti hita’n la,” a tia (zia chu Peter ti’na ahi).

Jesu’n Philip leh Nathanael A Kona

⁴³ A jing ah chun Jesu chu Galili lam ah chia a gua’n, Philip a mu, a kiang in, “Ei zui in,” a tia.

⁴⁴ Philip chu Bethsaida khua um ahi’n, zia chu Peter leh Andria umna khua ma ahi.

⁴⁵ Philip chun Nathanael a hawldok ah, a kiang in, “Mosi Dan Lekhabu leh Jawlneite Lekhabu a la kizik, ‘Joseph chapa, Nazareth Jesu’ kiti kha kei un ka mu tau hi,” a vatia.

⁴⁶ Nathanael chun, “Nazareth khua thilpha a pawt thei ah a hem?” a tia. Philip chun, “Hung inla, hung en in,” a tia.

⁴⁷ Jesu’n a kiang lam zuan ah Nathanael hung chu a la mu in, a chung thu a la gen a, “En tiam un, Israel mi tak, zuauthepna neilo mi saw!” a tia.

⁴⁸ Nathanael chun a kiang in, “Bangtik ah lei het khâk a hem?” a hun tia. Jesu’n a kiang in, “Philip in a hun ko ma, theichang bul ah la um lai ah khan ka hun mu tai,” a tia.

⁴⁹ Ziaphatchun, Nathanael in a kiang in, “Rabbi, Pathian Chapa, Israelte Lengpa chu la hi!” a tia.

⁵⁰ Jesu’n a dawnhu a, “Theichang bul ah ka hun mui, ka ti ziak ah nang in lei gin ahi maw? Ziate sâng ah thil lopi zaw le hun mu ding la hi.

⁵¹ Titakzet in ka hil la hi, tu’nung leh van kihong ah, Pathian vansawlchâkte Mihing Chapa chung ah kum suk leh kal to hun mu ding la hi,” a tia.