JOEL 3 - PATHIAN LEKHABU THIANGTHO (BSI)

¹ Judah leh Jerusalem vangphatna tundin kit hun a tun tak leh;

² nam zosia Jehoshaphat phâijawl ah pui khawm ing ka tin; ka go leh ka mipi Israelte, namtin lakah a la the’chek ziak un a chung un vaihawm ding ka hi. Ka gam chu a la kihawm jak tau in,

³ ka mite chung in âi a sân un, nawchi man dingin pawsal naupangte a piau in, a uain man ding un numei chapangte a zuak ui.

⁴ Aw Tura leh Sidon, Philistia gamkai zosiate haw, kei â ding in bang la hiu em? Lei dit kit him him awm? Ei dit kit hi leu chin kin tak in la luchung ngei un hun thuk kit pai ziang ding hiveng.

⁵ Ka dangka leh sanate leh ka go thilpha zosia la tempul uh cheina dingin la kipuak mang zo ta’ngal un.

⁶ Judah leh Jerusalem ah mipite chu a gamgiu ah kipat gamla tak in la thak mang un; Grikte kiang in la zuak mang zo tau a.

⁷ Himaleh, tu’hin, la zawkmangna munteu nusia dingin chawk tho ing ka tin; chun, la thilbawl dungzui tak un la luchung un hun thuk kit ding ka hi.

⁸ La chapateu leh la chanuteu chu Judah mite khut in zuak ing ka tin; amau in gamla tak ah nam khat, Sabeante kiang ah zuak sawn in au; ti’n Lalpa chun a gen ta’ngal a.

Jehoshaphat Phâijawl Ah Vaihawmna

⁹ Zia hi namte lak ah puang un: Kido dingin kisau in, galhatte chu chok tho un. Sepai zosia’n hun nai u hen la, hung to chiat uh hen.

¹⁰ Loukaina matchâkte chu chemjam in sêk unla; louthawna matchâkte chu cheicha’n sêk un; mi jawngkhal inle, “Gâlhat ka hi” ti hen.

¹¹ A kîmvêl ah nam zosiate haw, kin tak in hung khawm un! Aw Lalpa, la gâlhatte chu hun pui suk in.

¹² Namte amau leh amau kichoktho uh hen la; Jehoshaphat Phâijawl ah chun hung khawm uh hen; zia mun ah chun a kîmvêl ah nam zosiate chung ah, vaihawm ding ka hi’ngal a.

¹³ La kawite hun pan in, bu lâk a hun ta’ngal a. Chia inla, chil in, grep sûkna khûk a dim ta’ngal a. Grep tui koina a dimlêt tai, a gitlonau a huaisia ngal a.

¹⁴ Thutanna phâijawl chu mipi’n a dim hi! Thutanna phâijawl ah chun, Lalpa ni chu a nai ta’ngal a.

¹⁵ Nisa leh thapi suk thim a hiu a, aksite’nle a vâk uh a sêlgu tau hi.

¹⁶ Zion ah kipat in Lalpa a kiko ah, Jerusalem ah kipat in aw a sua hi; tichun, lei leh vante chu a kilîng ui. Himaleh, Lalpa chu a mite â ding ah kisêlna ahi’n, Israel mipite â ding ah kulpi sâng ahi.

Judah Lopina Ding Chu

¹⁷ Chutichun, kei Lalpa la Pathian uh, ka tâng thiangtho, Zion ah ka chêng hi ti hun he ta’n lau. Jerusalem chu thiangtho intin, mikhualte’nle haw malam kit ta pua’n au.

¹⁸ Zia ni chuleh, tângte chun uain thum vatsak ta’n tin, mualte ah chun bawngnawi luang intin, Judai gam ah lui guam zosia chun, tui luang ta’n a; Lalpa In ah kipat in tuinâk hung luangdok intin, Wadi Shittim chu tui in buak khum ta’n a.

¹⁹ Judate chung ah thagum sua ziak leh, a gam sung ah midik thisan a sua ziak un, Aigupta gam suksiat in um intin, Edom gamkeu gamthip hung suak in a.

²⁰ Himaleh, Judah gam chu kumkhua’n lua in um intin; Jerusalem le suan zosia tiang ah lua in um ta’n a.

²¹ A thisan phubau chu la’ng ka tin, a mawnau chu silthiang lo ding ka hi; Lalpa chu Zion ah a chêng ngal in.