JOEL 1 - PATHIAN LEKHABU THIANGTHO (BSI)

Gam Suksiat Sûnna

¹ Lalpa thu, Pethuel chapa Joel kiang ah hung kigendok chu:

Gam Suksiat Sûnna

² Putêkte haw, zia hi hiau in, zia gam ah chêng zosiate haw, la bil uh dawu in! Zia gual thil hi nangmau khang leh, la pu la pateu khang inle a tung kha ngai em?

³ Zia chu la chateu hil unla, la chateu in amau chate chiat hil sawn uh hen la; amau chunle a khang sawnteu hil sawn chiat uh hen.

⁴ Khaubepi’n a pe’tan bang cheng chu, khaubepi hon in a ne zo un. Khaubepi hon in a nêkbang siau chu, khauphâk in a ne zo un; khauphâk in a nêkbang sia chu, lungno in a ne zo tai.

⁵ Nanghaw zukhamte haw, hung haldok unla, kap tau in; nanghaw uain dawn ah khamte haw, la kam ua kipat uain thum tak chu, lak mang ahiziak in thûm tau in.

⁶ Ka gam chu nam hat tak, simsên lo in a hun sim ta’ngal un; a hateu chu sakeibaknei ha gual ahi’n, sakeibakneipi uiha gual a nei ui.

⁷ Ka grep guite a susia’n, ka theipi kungte a eknêl in, a hawng a khe’dok hi; chuleh a bâkte heutha’n a paimang tau hi a bâkte a keugawp zo tai.

⁸ Nungak in saidip puan sil ah, a khangdawng lai pawsal a sûn gual in kap un.

⁹ Lalpa In ah thâiga thillat ding leh, dawnchi thillat dingte a tasam tai. Lalpa nasêmte chu thiampute’n a sûn tau hi.

¹⁰ Loute chu suksiat gam a hita’n, gam chu lei in a sûn hi; bu chu suksiat ahi zo ta’n, uain a kang in, sathau chu a bei zo tai.

¹¹ Barli leh gehu bu a siat ziakin, lou bawl mite haw, beidong tau in; lou lai ah thâichi a siat gam tâk ziakin, nanghaw grep chîngte haw mau tau in.

¹² Grep gui a vuaitha ta’n, theipi kung a keugawp zo tai. Lou ah thâichi kung tin: theipi, theibufai, zubi leh epulte a keugawp zo tai; mipite kipakna zosia a chuai tai.

Gitlo Thupha Chawi leh Pauchap Ding Ah Kona

¹³ Nang uh thiampute haw, saidip puan sil in sûn tau in; nanghaw mâichâm ah nasêmte haw, thûm in mau tau in. Nanghaw ka Pathian nasêmte haw, hung unla, jankhua’n saidip puan sil tau in! La Pathian In ua kipat in, thâi thillat leh dawnchi thillatte a chawl tai.

¹⁴ Anngawlna mang thiangtho unla, mipi kikhopna gun tak bawl un. Lalpa la Pathian In uh chun, upate leh zia gam ah chêng zosia chu kikhawm unla, Lalpa ko tau in.

¹⁵ Zia ni chu a chung a gik na e! Lalpa ni chu a nai ta’ngal a; Hat Chungnung Pa ah kipat in, manthaina hung tung ding ahi.

¹⁶ I mit muu in I anteu chu, hi’mangthai ah um in, I Pathian In ua kipat in, kipakna leh limna sukbei hi talo a hem?

¹⁷ Thâichi mute chu lei tang keu in a kânggam ta’n; bu Inte chu a hawm ngen a hita’n; bubûkte chule a koi ding bu umlo ziakin, phel thâk ahi zo tai.

¹⁸ Ganchate chu a liangvai nau e! Hampa hing umlo ziakin, bawng honte a vâkvai tau hi, belam honte le a basam tau.

¹⁹ Aw Lalpa, nangma ka hun ko hi. Mei in gamthip ah hampate a kângtum ta hen; meikuang in lou lai ah thing zosia, a kâng tum zo tai.

²⁰ Lui tuite a kangtan tâk ziak leh, gam ah hampa hing zosia mei in, a kat tum zaw tâk ziakin, gamsate natiang in nangma a hun ko ui.