JEREMIAH 7 - PATHIAN LEKHABU THIANGTHO (BSI)

Jeremiah in Namtin Chung ah Pathian Vaihawmna Ding Thu A Puanjakna

¹ Jeremiah kiang in, Lalpa‘n zia gual hin thu a hun gen a:

² Lalpa In kotbul ah dingin la, zia thu hi vagen in: Judai gam ah mi zosiate leh, zia kotkhak ah lut ah Lalpa ho ah hung zosiate haw, Lalpa thugen hi a la ngai un:

³ Israelte Pathian, sepai honte Lalpa chun zia gual hin a gen hi: La umdanteu leh la thilbawl danteu siamphau inla, zia mun ah hin keile la kiang un hung chêng ing ka.

⁴ “Zia hi Lalpa tempul ahi, Lalpa tempul ahi, Lalpa tempul ahi! Kuama’n bangma ei law pua’n au,” ti ah kithepna thute hi taksang kiu in.

⁵ La umdanteu leh la thilbawl danteu la siamphat chiat ua, mimal tin kikâl ah dikna a um phat leh,

⁶ la lak ua gam dang mite, nauchagate leh meithâite la nuaisia lo ua, zia mun ah hin mawna neilote thisan la sua lo ua, nanghaw kisukliamna ding bep ah pathian dangte la zui lo uh chun,

⁷ ziaphat chuleh, masanglai ah la pu leh pateu kiang ah a kumkhaw go ding ua ka la piakna, zia gam sung ah hin la lak un hung chêng ta’ng ka.

⁸ A phatchuamna ding umlo, zuau thu gingcha’n zia tak ah hin la um mai mai ui.

⁹ Gucha zing, tual that zing, zawntat zing leh zuau ah kitiam zing in, Baal kiang ah thilpiakte pia zing kawm in, la het lo uh pathian dangte ho ah zui zing kawm in,

¹⁰ ka kiang lam ah hung in, zia In, keima min ah kisa ah hin ka ma-âng ah hung dingin, zia gual thil ki’dak um zosiate hi bawl zing kawm in, “I bit nalai ui,” ti tei tei nalai ding la hiu em?

¹¹ Zia In, ka min ah kisa hi nanghaw mit mu ah suammangte chênna hiziang ding a hem? Entha zing ka hi ti la he’nau hi, Lalpa‘n a tii.

¹² Tu’hin, chiau inla, a lim tak ah ka min chênna Shilloh kha, ka mipi Israelte gitlona ziak ah bang law ka hita’m ti vaen un.

¹³ Chuleh, tu’hin nanghaw’n le zia thil phalo zosia chu la bawl tau ah, la kiang ua thu gen tun tun malengle lei ngaisak puau ah, ka hun ko leh le lei dawnhu nuam diak puau hi, Lalpa‘n a tii;

¹⁴ ziaziakchun, la pu leh pateu leh nanghaw tiang ah la lua ding ua ka la piakna mun leh, ka min ah kiphuak zia In hi, Shilloh chung ah ka bawl gual khan hun bawl ding ka hi.

¹⁵ La suapinu Ephraim chate zosia ka la paimang gual ah khan, nang le ka muphâk lo ah hun paimang ding ka hi.

Mipite Thumatlona

¹⁶ Nang vang, zia mite â ding ah hin pauchap kin la, amau â dingin dot piak kin la, paupuak kin la, ka kiang in hun gen piak kin; a la limsak lo ding ka hi’ngal a.

¹⁷ Judai gam ah khawpi sung leh, Jerusalem khawlai dung ah a thilbawlteu chu mulo la hiu em?

¹⁸ Van lal kiang ah lat ding, vaithum kanna ding a chateu in thing a chom un, a pateu in mei tik in, a nuteu in vaithum a mêk ui; chuleh, ka lungnat choktho dingin pathian dangte kiang in dawnchi thillatte a sungdok ui.

¹⁹ Keima ei sulungna ding ah a bawl uh ahi em? Lalpa‘n a tii. Amau kisuknatna ding ah a bawl uh hilo a hem?

²⁰ Ziaziakchun, Lalpa Pathian in zia gual hin a gen ngal a: ka lungnatna leh ka thangtawmna chu zia mun ah mihing leh ganchate, gam lak ah thingte leh, lei ah theiga zosiate chung ah hin hun sungtha ding ka hi; hun kâng tum intin, kuama’n phelmit pua’n au, ti in.

²¹ Sepai honte Lalpa, Israelte Pathian chun zia gual hin a gen hi: La kithoinau ah chun la hâlmang thillat uh belap unla, a sa chu kinêk un.

²² Aigupta gam ah kipat ka puidaw lai ah khan, la pu leh pateu kiang in kithoina leh hâlmang thillat chungchâng ah thupiak leh thugen bangma ka nei puai.

²³ Himaleh, zia hi ka thupiak chu ahi: Ka thu ngai un, tichun, la Pathian uh hi’ng ka tin, nang uh chule ka mite hi’n lau; chuleh, nang uh â ding ah thilpha a hitheina dingin ka thupiak gual bep in um un, ti in.

²⁴ Ahi’n la, ka thu a ngai puau a, a bil uh le a daw puau hi; zia malak sâng ah chun a ngaituanau lu’lul leh phalo tak dungzui in, amau phasak lam ngen zui in, a ma lam uh en lo in, a nung lam ngen uh a en zaw tau hi.

²⁵ Aigupta gam ah kipat la pu leh pateu ka la puidaw ah kipat tu’ni tiang hin, ka suak jawlneite zosia kha nisi’n in la kiang un ka hun sawl a;

²⁶ ahiziak in, ka thu gen ngaisak lo in, a lochal ten nalai ui. A pu leh pateu sâng ah khawk zaw sêm in a um ui.

²⁷ Ziaziakchun, zia thu zosia hi a kiang ua la vagen ding ahi; himaleh, la thu gen chu ngaitha pua’n au. Ko in la tin, himaleh, hun dawnhu pua’n au.

²⁸ A kiang un zia gual hin la gen ding ahi: Zia namte hin Lalpa, a Pathian uh thu gen a ngaisak puau in, a thu le a mang puau hi; a lak un thu dikna a um ta pua’n, a kam unle a suadok ta puau hi.

²⁹ La sam uh tan un la pai mang un; Lalpa‘n ama chok lungna bepte nam chu paitha’n, a nungngat tâk ziakin, tângsipte ah chun Kâ La sa tau in.

³⁰ Ka min ah kisa In chu subuak dingin, ki’dak um tak thilte a sung in a koi un; Judai gam ah mite chun ka mit mu in thil phalo tak a bawl ta’ngal un, Lalpa‘n a tii.

³¹ Hinnom chapa guam ah chun, a chanuteu leh a chapateu mei ah latna dingin Topheth thoimualte a siam ui; zia gual ah chu bawl dingin thu ka pepua’n, ka ngaituana’nle a um kha puai.

³² Ziaziakchun, Topheth leh Hinnom phâijawl kiti talo in, kithana phâijawl kiti hun hung tung ding ahi: Topheth ah chun mun neuchale awng talo ah kivui ding a hitau hi.

³³ Zia mite thiluang chu chunglêng vachate leh, lei chung ah gam sate an hung hita’n tin, kuama’n naw lau ta pua’n au.

³⁴ Chun, Judai khawpi leh Jerusalem khawlai dung ah chun kipakna husate, limna husate, monu leh mopa husate suthip ing ka tin, gam chu a hawm ah um ta ding ahi ngal a.