JEREMIAH 52 - PATHIAN LEKHABU THIANGTHO (BSI)

Jerusalem Pûkna Thu Gennonna

¹ Zedekiah chu leng ah a pan lim in, kum sawmni leh khat mi bep a hi nalai ah; Jerusalem ah kum sawm leh khat vai a hawm hi. A nu chu Libnah khua Jeremiah chanu Hamutal ahi.

² Jehoiakim gual tho ah khan Lalpa mit mu ah thil phalo tak a hun bawl a.

³ Jerusalem leh Judah chun Lalpa a suklungnat ma ma ziak un, ama umna mun ah kipat a la nawdaw ahi tai. Zedekiah chu Babulon Lengpa chung in a hung hel ta’n.

⁴ A lal kum kua’na, tha sawmna leh a ni sawm tin ni chun, Babulon Lengpa Nebukadrezar chu Jerusalem do dingin a sepai zosia tawh hung in, khawpi kîmvêl ah panmun siam in a châng tau a.

⁵ Tichun, Lengpa Zedekiah lal kum sawm leh khatna tiang in a khawpi chu ûm kîmvêl in a um tau a.

⁶ Tha li’na, a ni kua tin ni kipat in khawpi sung ah chun a gam ah mipite nêk ding an a um tâk lo ziakin, kial a huaisia ta ma ma ziang a.

⁷ Ziaphatchun, khawpi kulbâng khel hawm in, sepaite chu jan kâl in lengpa huan lam ah bângthua kikâl in a la tai mang zo tau ah, Kaldai sepaite chun khawpi ûm kîmvêl in a la chang zing un. Arabah lam zuan in a jam mang tau a.

⁸ Himaleh, Kaldai sepaite chun lengpa chu a delzui un, Jeriko phâijawl ah chun Zedekiah chu a man tau a; ziaphatchun, a sepai zosia taijak in, a jamsan zo tau a.

⁹ Lengpa chu a man tau a, Hamath gam ah Riblah mun ah Babulon Lengpa kiang in a pui to ua, a chung châng thu ding a gendaw piak tai.

¹⁰ Babulon Lengpa chun Zedekiah chapate chu a pau mit mu in a that ah; chuleh, a miliante zosia chule Riblah mun ah chun a that sik sek tai.

¹¹ Zedekiah chule a mit teni a kheldaw piak zaw nung in, thîkkol bu sak in Babulon lam in a pui ta’n; zia tak ah chun a thi tiang in suangkul ah khum in a um den tai.

¹² Chun, Babulon Lengpa Nebukadrezar lal kum sawm leh kua’na, tha ngana, a ni sawm ni’ chun, Babulon lengpa vêngtute lak ah hotu lianpen Nebuzaradan chu Jerusalem khuan a lut a.

¹³ Lalpa In, lengpa In tawh Jerusalem khua sung ah In zosia tawh a hâl tum ah; miliante In zosia le a hâl tum khawm tai.

¹⁴ Kaldai sepaite zosia, lengpa vêngte lak ah hotulian kiang ah um zosia chun, Jerusalem kulbâng chu a suchim dim dem tau a.

¹⁵ Vêngtu lak ah hotulian Nebuzaradan chun, mipi lak ah thu genthei deute leh khawpi sung ah nutsia ah umte; chuleh, a jam mang lak ah Babulon Lengpa khut ah kipelut zosia tawh, khut nasep thiam um nalaisunte chu tawh a leng un sal in a pui mang suak tai.

¹⁶ Ahi’n la, sepaite lak ah hotulian Nebuzaradan chun, a gam sung ah thu gentheite lak ah khenkhatte chu, grep huan enkol ding leh lou bawl dingin a nusia tai.

¹⁷ Lalpa In ah sum-eng khuamte leh a kitunnate leh, Lalpa In ah kisilna kuangpi sum-eng ah kibawlte chule khen phel in, sum-eng zosia chu Babulon lam in a pawmang tau a.

¹⁸ Chuleh, tempul ah biakna matchâk sum-eng ah kibawl zosia: Belte, Vutluate, Thaumeite, Kuangkângte leh Thîk-haikhawte chu a leng in a pawmang sik sek tau a.

¹⁹ Gâlvêngte lak ah hotu lianpen chun, belbute, vutluate, kuangdalte, bêlte, thaumei tunnate, thîk-haikhawte, tui dawp vêlna kuangte pum in, sana leh dangka thîk ah kisiam zosia chu a kipuak mang tai.

²⁰ A sûtpi panite, a kuangpi khat leh a kitunna ding ah bawngchal sawm leh ni lim ah kisiamte tawh, kuangkâng kitunna pum in, Lalpa In ah matchâk ding Lengpa Solomon in sum-eng ah a la siam, ûm leh bêl zosia chu, bang gual bep ah gik ahi em tile het zaw hilo ahi.

²¹ Sûtpite sândan chu tong sawm leh giat leh a let dan tong sawm leh ni kîmvêl gêl ah kisiam a hiu a; a sung hawm, bêl li ah sa ah kisiam ahi.

²² Zia khuam teni chu sum-eng ah kisiam, a lubawk khat gêl um; zia a lubawk sândan chu tong nga gêl a hiu a; zia a lubawkte chu a chung lam vathakal jem leh a kîmvêl kawlbuthei ga mongpal jem in a um kîmvêl, sum-eng thiang ah kisiam gêl a hiu a. A sûtpi khat zawk chule zia gual tho ah chu theibufai gapal jem ah kibawl chu a nei a.

²³ A sîk lam ah chun theibufai ga mongpal gual ngen chu sawmkua leh guk a um ah; vathakal jem kîmvêl ah a cheina theibufai ga mongpal gual ngen ah kisiam chu za khat a um hi.

²⁴ Vêngtute lak ah hotulian chun thiampu Seraiah tawh, a kithuapi Zephaniah tawh, zia mun vêngtu pathumte chule pui a hiu a;

²⁵ chuleh, khawpi sung ah kipat chun, sepaite lak ah hotu pakhat tawh, khawpi sung ah um nalai lengpa thudot sek mi sagi tawh, a gam sung ah mipite chung ah vaihawm sepai hon lak ah a lekha zikpau tawh, a gam sung ah mipite lak ah mi sawmguk khawpi sung ah a muteu sia chu tawh a pui khawm tai.

²⁶ Ziaphatchun, vêngtute lak ah hotulian Nebuzaradan chun zia sia chu Riblah mun ah Babulon Lengpa kiang ah chun a pui tung a.

²⁷ Chuleh, Babulon Lengpa chun zia zosia chu Hamath gam ah Riblah ah chun a that sik sek tai. Chutichun, Judai gam ah mite chu a gam paw lam un sal ah puimang in a um zo tau hi.

²⁸ Nebukadrezar in sal ah a pui mang jat chu: A lal kum sagi’na chun Judai gam ah kipat in mi sang thum leh sawmni leh thum a pui mang a;

²⁹ Nebukadrezar lal kum sawm leh giatna chun, Jerusalem khua kipat in mihing za giat sawmthum leh ni a pui mang a;

³⁰ Nebukadrezar lal kum sawmni leh thum tin kum in, a vêngtute lak ah hotulian Nebuzaradan in Judai gam ah mi za sagi sawmli leh nga a pui mang kit a; tichun, a leng un sangli leh za guk chu pui mang a hiu.

Jehoiakim in Saltânna Mun ah Doisakna Chang

³¹ Judai gam ah Lengpa Jehoiakim saltânna kum sawm thum leh sagi’na, tha sawm leh ni’na, zia tha a ni sawmni leh nga tin ni chun, Babulon ah Evil-merodak in vai a hawm pat kum in, Judai gam ah Lengpa Jehoiakim chu doisakna nei in, suangkul ah kipat a thâdawk a;

³² a kiang ah jaidam tak ah thu gen in, Babulon ah a kiang ah um Leng dang zosia sâng ah chungnung zaw’n a koi a.

³³ Tichun, Jehoiakim chun a suangkul ngâkna puan chu theng in, a dam sung sia chu nisi’n in Lengpa dawkan ah chun a kiang in an a ne den tai.

³⁴ A dam sung sia a nisi’n chanvo ding chu Babulon Lengpa’n a thi ni tiang in, a pia zing tai.