JEREMIAH 50 - PATHIAN LEKHABU THIANGTHO (BSI)

Babulon Chung ah Gawtna

¹ Kaldaite chênna gam, Babulon chung thu ah jawlnei Jeremiah kiang ah zia gual hin Lalpa‘n a hun gen a:

² Namtin lak ah hil unla, puangjak un, puanlap khaidok unla, puangjak un; îmgu lo in a kiang un: Babulon chu lâksa a hita’n, bêl chu a mualpho ta’n, Merodakh chule a lungthuai tai. A limteu chu sukmualpho a hitau in, a milim siamkawmteu chule suklungthuai zaw a hitau hi.

³ Mallam ah kipat ama do ding nam khat a hung kuandok tai; a gam chu a hawm ah nutsia in hung umsak intin, a sung ah kuama chêng ta pua’n ah; mihing leh gancha zosia’n taisan sik sek ta’n au.

⁴ Zia hun lai ah chun, Israelte leh Judate chu hung khawm in tiu in, Lalpa a Pathian uh chu kap kawm kawm in hun hawl in au, Lalpa‘n a tii.

⁵ Zion lam nga’n, a lampi ding dong malam pek in, kumtuang thuthung, bangmatik ah le hetmil tâk lo ding ah Lalpa tawh kizopna nei in hung khawm ta’n au.

⁶ Ka mite chu belam mangtasa gual a hiu a; amau puitute chun tânggamte ah chun a pui mang zo tau in; mual leh tângte lak ah chia mang in, a huang uh a hemil zo tau hi.

⁷ A mu taphot in a ne zo malam pek un, a mêlmateu chun, “Lalpa, a pu leh pateu kinepna, a tatna mun ding tak uh Lalpa chung ah thil a la bawlkhial tâk ziak un, eimau maw’na bangma a um puai,” a tiu a.

⁸ Babulon ah kipat taidok unla, Kaldaite gam ah kipat tai mang un la, kêl hon lak ah a chal a malat gual in, a taidok tau in.

⁹ Babulon gam hun sim dingin mallam ah kipat nam thupi takte chu, hun choktho ding ka hi’ngâl ah; a do dingin hung kigual intiu in, zia kipat chun lak zaw hita’n au. A thalchangteu chu gâlkap thiam tak, kap khial ngai lo gual chu ahi ngâl in.

¹⁰ Kaldai gam chu bulu hung hi’ntin, a bulu ah kuante chu niang ma ma in au, Lalpa‘n a tii.

¹¹ Aw, ka gochan bulu’te haw, kipak in lim maleu chinle, hampa selno lak ah bawngchal leh, sakol hat hâm gual in hâm malechin;

¹² la nu chu huaisia tak ah hung mualpho in, nang hingnu chu hung minsia ta’n a. Ngai un, ama chu nam lak ah nuainung pen leh, gamthip, gamgawchâk leh gamkeu hung hi’n a.

¹³ Lalpa a chung ah a lungnat ziakin, kuama chên lo’na leh a hawm ah nutsia hung hita’n a; Babulon haw kha taphot in tiza’n, a beliamna zosia ziakin cheksa’n au.

¹⁴ Lalpa chung ah a gitlo ziak un, Babulon kîmvêl ah la panmun uh luau inla, thalpi’n kâp unla; nanghaw thalpi chawi zosiate haw, thalchang îtcha kiu in.

¹⁵ Kiltin ah kipat ama do-na’n kiko unla, “A kipedok tai; a kulpite chu a chim ta’n, a kulbângte chun tual a jep tai,” tiu in. A chung ah Lalpa phuba lâk ni a hiziak in, a chung ah phuba lâu inla, la chung ua a hun bawl gual gual in, a chung ah le bawl thuk tau in.

¹⁶ Babulon ah kipat in, buchi the’te chu naw mang unla, bu lâk hun ah kawite chawite le naw mang un; zaw’na chemjam lau in mitin, a chipiteu lam ah kile’kit in, a gam lam chiat uh zuan in jam ta’n au.

¹⁷ Israelte chu sakeibaknei in a delzui zing belam tawhbang a hiu hi. Assuria Lengpa’n a nêk zaw nung in, tu’hin Babulon Lengpa Nebukadrezar in a gu leh chângte chu a chêp tai.

¹⁸ Ziaziakchun, Israelte Pathian, sepai honte Lalpa chun zia gual hin a gen hi: Assuria Lengpa ka la gawt gual tho ah khan, Babulon lengpa leh a gam chu hun gawt ding ka hi.

¹⁹ Israelte chu a tatna mun un pui kit ing ka tin, Karmel leh Bashan ah ta kit in, Ephraim leh Gilead mualte ah chun vâ tak in ne ta’n au.

²⁰ Zia ni phat chuleh, Israelte thulimlo’na chu hawl intiu in; ahi’n la, mu zaw hita pua’n tin; Judah gitlona hawl maleu mu zaw hita pua’n ah, a um nalai sun ding ah ka hawite chu ngaidam ding ka hi tai, Lalpa‘n a tii.

²¹ Merathaim gam ah chia to un, a do dingin kuan unla, Pekod ah chêngte chu do unla, a leng un hawi nei lo in that gam un, ka hun thupiak zosia kha zawm un, Lalpa‘n a tii.

²² Kidona husa huaisia tak leh, siatna thawm in a gam chu a dim tai!

²³ Khawvel pumpi khetna sektum chu, khetbot leh khet phel in a um tai! Namtin lak in Babulon chu, tizat um a suak tai!

²⁴ Aw Babulon, Lalpa la cho ziakin, la thângkam ah chun nang ma ma la awk ta’n, maleh, zia chu nang in la hepuai; mudaw la hita’n, mattom in la um tai.

²⁵ Lalpa‘n a gâlvan koikhawmna In a hong ta’n, a lungnatna gâlvante a hun ladok tai; Lalpa, sepai honte Pathian in, Kaldai gam ah bawl ding khawk tak a nei ngâl a.

²⁶ Kiltin ah kipat in hun do un; a bu Inte chu hong un; bu gual in siavum unla, susia dik dek un; a bangma khêkchâk nei kiu in.

²⁷ A bawngchal zosiau that unla, sa thatte kiang ah piau in. A chung uh a gik na e, amau gawtna hun, a ni ding ua tiam chu a tung tai!

²⁸ Ngai un! Lalpa I Pathian un Tempul chung thu ah a phuba lâkna thu, Zion ah taklang dingin Babulon gam ah kipat in gâljam leh vâkvaite chu a hung ui.

²⁹ Babulon do dingin thal kap thiam, thalpi chawi zosia chu ko khawm un. Hual kîmvêl unla, khat chale suachâtsak kiu in. Lalpa, Israelte Mithiangtho chu ki-uangsak tak ah a la simmaw ziak un. Ama’n a la bawl tawh kiphutawk in a chung ah bawl tau in.

³⁰ Ziaziakchun, a tangvalteu chu lamka thuam tin ah thalup ah um in, a sepai zosiau chule zia ni chun tha’gam sik sek hung hi’n au, Lalpa‘n a tii.

³¹ Aw kiletsakpa, ka hun do la hi, Lalpa, Sepai honte Pathian chun a tii; ka hun gawtna ding hun, a ni chu a hung tung ta’ngâl a.

³² Mi kiletsak chu kisui intin, kuama a kaitho ding umlo in kipuk ding ahi; a khawpite chu mei ah hâl ing ka tin, a kîmvêl ah um zosia kâng tum ding ahi.

³³ Sepai honte Lalpa chun zia gual hin a gen hi: Israelte chu tawden ah a um gual un, Judate chule tawden in a um ui; sal ah amau mante chun pawtsak nuam lo in a tuchak tinten ui.

³⁴ Amau Tanpa chu vang a hat hi; a min chu Sepai honte Lalpa ahi. Khawvel gâlmuang tak ah a um ah, Babulon gam ah chêngte buai tak ah a umna ding un, amau chung thu ding chu vang khawksak in a.

³⁵ Kaldai leh Babulon ah chêngte leh, a milian leh lalteu leh a mipite do dingin, chemjam a um hi, Lalpa‘n a tii!

³⁶ Âisân thiamte do ah, mite ngolna ding chemjam chu! A sepaiteu that gam ding chemjam chu!

³⁷ A sakol leh kângtalaiteu leh, a lak ua nam dang sepai umte, numei sua ding ah do ding chemjam! A go thilteu do ah suam ding chemjam chu!

³⁸ A tuiteu chawp kang ah do ding khawkhâl chu! A gam uh milim in a dim in, milimte chu limpi in a ngolpi zo ta’ngâl un.

³⁹ Ziaziakchun, Babulon ah chun, gamsa, sa-uakte leh Vasakolte chêng ta’n au; zia gam chu mipi’n lua talo in, suan zosia tiang in a hawm ah nutsia hung hita’n a.

⁴⁰ Pathian in Sodom leh Gomorrah leh a kîmvêl ah khuate a suksiat gual ah khan, zia khua chun kuama chêng ta pua’n tiu in, kuama’n chênna’n siam kit ta pua’n au, Lalpa‘n a tii.

⁴¹ En un, mallam ah kipat in, mipite a hung suk ui; nam hat tak leh leng tam tak, leimun tawp lam ah kipat in, a hung kuandok ui.

⁴² Thalpi leh cheicha a hun pan un, mi huham leh lainatna neilote a hiu. Aw Babulon chanu, nang hun do dingin, tuisuagiat kinawk gual ah husa nei, sakol chung ah chuang in, sepai hangsan, gâlkuan ding gual in a kisiam ui!

⁴³ A chanchin uh Babulon lengpa’n a la het phat in, a khutte chu a zawitha tai; numei naunei ding natna’na hun tut gual in a hun tut tai.

⁴⁴ Jordan lui gâl nângbuk lak ah kipat sakeibaknei hung pawtdok in gan tatna mun a hun zot gual in, amau chu thakhat in hun del mang ding ka hi; a chung ua vaihawm ding ah ka guat pen chu têldok ta’ng ka. Keima gual hi kua a hem um? Kua a hem ei cho ngam? Ka âng ah pang ngam ding belampu kua a hem um?

⁴⁵ Ziaziakchun, Babulon do-na ding ah Lalpa thil guanggal leh, Kaldaite gam do-na ding ah a thil tupte hi ngaituau in: Matheilo in gan hon lak ah a note chu kaimang hung hi’n tiu in, gancha huang chu lauthawnsak ta’n a.

⁴⁶ Babulon pûkna husa chun khawvel kithing intin, a kâ thawm chu le namtin lak ah het hi’n a.