JEREMIAH 5 - PATHIAN LEKHABU THIANGTHO (BSI)

Pathian Mite Nunsiat Dan

¹ Jerusalem khawpi kotzing ah chun tai vêl unla, en vêl un la kansui un! dik tak ah bawl leh, thu dik hawl mi pakhat bêk la muu em, khawpi sung kil leh kâk hun hawl tiam un, Jerusalem ka ngaidam theina dingin.

² Lalpa min sal in kitiam sek maleu, zuau ah kitiamna bawl mai mai a hiu.

³ Aw Lalpa, thu dikna hawl hilo la hem? Amau chu la vaw ta’n, maleh khawk a sa puau a; la sawi ta’n, ahi’n la, a kisudik nuam puau hi. A maichangteu suangpi sâng ah tâk zaw’n a kisiam un, kile’kit a nuam puau hi.

⁴ Ziaphatchun keima’n, “Zia mite hi migenthei leh, ngaituana neilote a hiu hilam e, Lalpa lampite leh a Pathian dan uh chu a hepuau hi.

⁵ Mihausate kiang lam ah chia ing ka tin, a kiang un gen mai ing ka; amau chun vang Lalpa lampi chu hia’n, a Pathian dan uh chu he ngei ngei in au,” ka ti’n. Himaleh, a leng un a ngawngkol uh a susia tau a, a mi kânna khaute a ât tan zo tau hi.

⁶ Ziaziakchun, gammâng ah kipat hung pawt, sakeibaknei chun that intin, gamkeu ah kipat hung pawt, Ngei in puaitel in a. A sukkhialnau a tam ziak leh, a nungtolnau a huaisiat bêk ziakin, a khawpiteu chu gialbem in a châng ah; a pawtdok taphot chu puaitel hi’n au.

⁷ Bangti hun ngaidam ding ka hem, la chateu in ei nusia in, pathian hilote min in a kitiam tau hi. A vâ sêt ua ka vâk phatin, nawchizuakte In ah lût in, a ângkawm zo tau hi.

⁸ Amau chu sakol pha tak ah kivâkvâ gual a hiu, midangte ji etlâ ziakin a hâm sek ui.

⁹ Zia thilte ziak ah chun gawt lo ding ka hem? Zia tawhbang ah um namte chu, thuk lo ah umsak mai ding ka hem? Lalpa‘n a ti ahi.

¹⁰ A grep phung kitiang kikâl ah chia to un la susiau in, ahi’n, a tawp tut kiu in; a bâkte chu heu un, Lalpa â a hipaw ngâl a.

¹¹ Israel Inkuante leh Judah Inkuante chu, ginum lo tak ah a la um zaw tak ziak un, ti’n Lalpa‘n a tii.

¹² Lalpa chu lepchia in a ngawu a, “Bangma bawl lo hial in a. I chung un siatna bangma tung pua’n tin, chemjam a hem kialna a hem tuak puai tiu,” a tiu a.

¹³ Jawlneite chu hui gual mai mai a hiu, amau ah thu tak a um paw’ngâl a. Zia gual ma chun a chung un tung in a!

¹⁴ Ziaziakchun, sepai honte Pathian, Lalpa chun zia gual hin a gen hi: Zia gual thu chu a gen ziak un, la kam ah chun ka thute chu, meikuang gual in ka hun siam in, zia mipite hi thingkhua gual in, ti chun, mei in amau chu hun kâng tum in a.

¹⁵ Aw Israel, gamla tak ah namte chu, nangma do dingin hun pui ding ka hi, Lalpa‘n a tii. Nam sekdo tak, kumlui tak leh, a pau uh la het ngailoteu leh, a gen uh la hiatthei lo teu a hiu.

¹⁶ A thalbawm uh chu thân kihongsa gual ahi’n, gâldona pawsal pha ngen a hiu.

¹⁷ La louma suak leh bute hun nêk zaw piak intiu in, la chanuteu leh la chapateu hun nêk zaw piak in au; la belam hon leh bawng honteu hun nêk zaw piak in, la grep leh theichang gateu le hun nêk zaw piak in au. Chuleh, la kisuanpi ma mau khawpi kul det tak neite chule, a chemjam un hun hisia’n au.

¹⁸ Zia gual hun ah chunle, hun suchimit ziang nai pua’ng ka.

¹⁹ Chuleh, la mipite’n bang ding ah, Lalpa I Pathian un zia zosia hi, I chung ua hun tunsak ahi dia aw? ti ah a hun dot phat ua leh a kiang un, “Keima ei nusia in, la gam sung un pathian dangte lei hosan tâk ziak un; la gam uh hilo ah chun, nam dangte na sep piak ta’n lau,” ti’n gen in a tii.

²⁰ Jakob Inkuante kiang in zia thu hi gen unla, Judai gam ah tângkopi tau in:

²¹ Aw, mingol leh ngaituana beite haw, mit nei ngâl ah mulote, bil nei ngâl ah helote haw, zia thu hi ngai un:

²² Lalpa chun, Ei lau lo la hiu em, ka âng ah kithing lo maw la hiu, tuisuagiat â ding ah gamgi, kumtuang ah a luandaw lo’na ding, bang gual in kinawk vêl maleh, a letdaw lo’na ding, bang gual ah thawm ngai in husa nei maleh, a chopkhûp theilo ding ah, piaunêl ah a dai ding uh ka kai piak hi.

²³ Zia mite hi vang mi lu’lul leh, lungchang ah helmang a hiu; a kihei un, a kigêl mang zo tau hi.

²⁴ A lunggil un, “Lalpa I Pathian uh lau hitiu, ama’n a hun tak in gawtui ei pia’n, chavâng gua leh khâl gawtuite ei pia’i, pawltâk hun ding leh hapta kit dingte ei koi piak ngâl a,” a ti nuam puau hi.

²⁵ La mantheilonau chun ziate chu a naw mang zo ta’n; la gitlonateu ziakin, thilpha la mu dingteu chu a naw mang zo tai.

²⁶ Ka mipite lak in michavai mu in a um ta’ngâl a. Midangte neithil a lâkpiak ui. Vacha mante gual in thâng a kam un, mihingte a man sek ui.

²⁷ Vacha bawm dim ah kikhum gual in, a Inteu chu kithepna’n a dim hi; ziaziakchun, a hung hausa tau a, a hung thupi tau hi,

²⁸ a hung thau un, a hung zol tau hi. Nunsia tak ah thilbawl a chintawk a nei puau a; nauchagate a hung phat theina ding un, dik tak in vai a hawm puau a; mi tasamte a panpi puau hi.

²⁹ Zia thilte ziak ah hin, gawt lo ding ka hem? Zia gual thilbawl namte chu, thuk lo ah koi mai ding ka hi em? Lalpa‘n a ti ahi.

³⁰ Gam sung ah chun thil lau um tak leh, tizat um tak a um hi:

³¹ Jawlneite’n diklo tak in thu a gen un, thiampute’n le jawlneite thupiak dungzui in vai a hawm ui; ka mite chun la zia gual nei chu a nuam un, a tawpna hung tung ta leh, bangti’n la bawl ta diam uh?