JEREMIAH 48 - PATHIAN LEKHABU THIANGTHO (BSI)

Moabte Chung ah Gawtna

¹ Moab chungchâng, Sepai honte Lalpa, Israelte Pathian in zia gual hin a gen a: Katei, Nebo khua chu suksiat ahi tai! Kiriathaim chu sukmualpho a hita’n, sal ah pui mang a hitau hi; a kulpi det chu a mualpho ta’n, suksiat in a um tai.

² Moab minthanna a bei ta’n, Heshbon ah chun a siatna ding a guanggal un: “Hung un, nam khat ahi nau hi, sumangthai hitiu,” a tiu a. Aw Madmen, nang le sukthip in hung um in la tin, chemjam in hun delzui ding ahi.

³ Ngai tia, Horonaim ah mite kâ thawm chu: “Kisukgamna! Kisukgamna huaisia!”

⁴ “Moab chu suksiat ahi tai!” ti’n a chate a kap jak tau hi.

⁵ Luhith lam to ah thasia tak ah kap kawm kawm in, a kal to tau hi; Horonaim lam ah kum suk in, lungdong thavai kâ thawm a hiau hi.

⁶ Jam un! La hinna ding uh kihawl chiat un! Gamkeu ah gamsabiltung gual in tai un!

⁷ La kulpite leh la hausakna la kisuanpi ziakin, matheilo in mat ah um ding la hi; Khemosh pathian chu a nasêm thiampute tawh, a suakte tawh pum in, sal ah pui mang in um in au.

⁸ Lalpa‘n a la gensa gual in, khawpi zosia susiapa chu hung intin, phâijawl ah khawpite hisia’n, phâicham chule sumangthai intin, khawpi khat chale hawi pua’n a.

⁹ Moab chu suksiat ah um ngei ngei ding a hiziak in, a thân suang ding khek piak un; a khawpite chu suksiat sik sek hi’ntin, a sung ah kuama chêng ta pua’n a.

¹⁰ Thadâ tak ah Lalpa nasêmte chu hânsia dong in um uh hen la, a chemjam thisansua ding gua jukkitpa chule hânsia dong in um ta hen.

¹¹ Moab chu a khangdawn lai ah kipat, nuam tak ah a la um, uain a hâi ah kiteilet ngailo a, um hiat hiat gual chu a la hi’n; sal ah mat khâk ah um ngai lo a la hi; ziaziakchun, a gim a dai pua’n, a gimtuina le suksiat ahi puai.

¹² Ziaziakchun, uain thawl ah kipat teidok ah, a thawl tei awng a, khen tel dik dek ding mi ka hun sawlna ding hun chu, hung tung ngei ngei ding ahi tai, Lalpa‘n a tii.

¹³ Israelte’n Bethel a kisuanpiu, a mualpho khawlaw gual un, Moabte’nle Khemosh ziakin hung mualpho ta’n au.

¹⁴ Bangtidan ah, “Mi hangsan leh gâldo’na mihat ka hi,” kiti thei la hiu em?

¹⁵ Moab gam leh a khawpi zosia susiapa chu, a hung kuan to in, a tangval doichuam diakte chu, thalup dingin a kuandok tau hi, Lengpa, a min sepai honte Lalpa chun a tii.

¹⁶ Moab siatna ding chu a nai ta’n; la vangsiatna ni ding chun, kin tak in a hun nai hi.

¹⁷ A kîm a vêl ah chêngte leh, a min he zosiate haw, ama sûn tau in; ama sûnna’n, “Lal tiang hat leh, tiangkhut lopi tak chu, bangtidan ah bong mai ahi tam?” ti tau in.

¹⁸ Dibon chanu, la lalchutpha kipat in, la lopina kipat ngei in hung kum suk inla, lei gawchâk ah hung kichu ta’n! Moab suam dingpa chu, nangma do in a hung kuandok ta’n, la kulpi dette chu a susia zo tai.

¹⁹ Aroer ah chêngte haw, lamlian pâm ah dingin la en tiam un! Pawsal gâljam leh numei a hung suakcha nu kiang in, “Bang thu ahi tam?” ti’n dong tiam un.

²⁰ Moab chu suksiat ahi tâk ziakin, sukmualpho in a um tai; lusûn in kap chuai chuai tau in! Arnon lui pâm ah chun Moab chu, suksiat dim dem ahi tai ti gen un.

²¹ Gam tâng cham chung ah khawpite: Holon, Jahzah, Mephaah,

²² Dibon, Nebo, Beth-diblathaim,

²³ Kiriathaim, Beth-gamul, Beth-meon,

²⁴ Kirioth, Bozrah leh Moab gam, a nai tuam leh a gamla ah khawpi zosiate chung ah vaihawmna a hung tung tai.

²⁵ Moab kisuanpi a thahâtna chu khetbot in a um ta’n, a khutbân chule sattan in a um tai, Lalpa‘n a tii.

²⁶ Lalpa do ding ah a kisan pawm ziakin, Moab chu dawn khamsak tau in; Moab chu a luak lak ah kibualsak tau in; ama chule mite nuizatbûk hung hita hen.

²⁷ Israelte chu guchate lak ah kimandok hilomaleh, nang in la nuisan sek ah; amau la genkhâkna taphot ah chun la luchang la thinkhum sek hilo a hem!

²⁸ Aw, Moab gam ah chêngte haw, khawpi nusiau inla, suangbûk ah vachêng tau in! Kawlhawm gei ah bu sep, vakhu gual in vachêng ziang tau in.

²⁹ Moab kiletsak dan tak chu ka la hiau a, a kiletsak leh a huhamnate, leh a lungthim ki-uansak dante leh, a kidoikhop dante zosia chu.

³⁰ A ja lam bei dante chu ka hia’n, a kisuanpi chule bangma a hipua’n, a thil bawlteule panna bei ahi dan ka hia’i, Lalpa‘n a tii.

³¹ Ziaziakchun, Moab chu sûn in, Moab ah chêng zosia chu ka kâ khum hi; Kir-heres ah chêng zosia chu sûn in, ka kâ khum hi.

³² Aw Sibmah ah grep kung, Jazer ka kâ khum sâng in, nang â dingin ka kap zawi! La bâk jamte hin tuisuagiat gâl lam ah, Jazer tiang in a jam ui; hisetu chu nipithei ga leh, grep ga minte chung in a hung tung tai.

³³ Moab gam phatna kipat in, thatnopna leh kipakna lâkmang in a um ta’n; grep tui sûkna khûk ah kipat in, grep tui a kang ta’n; kuama’n kipak kawm in, grep ga chu a chil ta puau a; husa chu kipakna husa a hita puai.

³⁴ Heshbon tawh Elealeh a kapdok tau a; a kâ thawm uh chu Jahaz leh Zoar ah Horonaim leh Eglath-shelishiyah tiang ah het ahi; Nimrim tui natiang a kang hial hi.

³⁵ Chun, Moab mite’n mun thiangtho ah a pathian kiang ua kithoina a bawlteu leh, a thillatteu chu sutawp ding ka hi, Lalpa‘n a tii.

³⁶ Ziaziakchun, Thithâk La, theile’ kimut gual in Moab gam chu ka lungthim in ka sûn ta’n; Kir-heres ah mite chu Thithâk La, theile’ kimut gual in ka sûn hi; a hausaknau zosia a mangthai ta’ngâl a.

³⁷ Mizosia’n sam mêt mui in, a khamul uh a mêt nâm tau hi; khut zosia âtliam ah um in, kawng zosia’n saidip puan ah gâk ahi tai.

³⁸ Moab gam ah Inchung zosia leh lamthuam tin chu lusûnna ngen in a dim zo tai; kuama’n a dawi tâk lo lei bêl gual in Moab chu ka susia ta mai hi, Lalpa‘n a tii.

³⁹ Bang gual bep ah hisiat a hitau em! Bang gual lawm ah lusûn ahi tau em! Bang gual bep ah Moab chu mualpho kit ahi tam! Tichun, Moab chu a kîmvêl ah mi zosia nuizatbûk leh tizat a hung hitau hi.

⁴⁰ Lalpa‘n zia gual hin a gen a: En un, mupi gual in hun baw suk intin, a tha chu Moab do in hun jak pal in a;

⁴¹ Khawpite chu lâk hi’ntin, kulpi dette chu lûdaw in um in a. Zia ni chuleh Moab sepai hangsante lungchang chu, numei naunei dingte lungchang gual in, lauthawng ta’n au.

⁴² Moab nam pumpi chu, Lalpa do ah a kiletsak ziak un, suksiat dik dek hita’n au.

⁴³ Aw Moab ah chêngte haw, la ma-âng un tizat um, khuksekua leh thâng ngen a um hi! Lalpa‘n a tii.

⁴⁴ Tizat umna suakchate chu, khuksekua’n ke’lut intiu in, khuksekua kaldok taphot chu, thâng ah awk in au. Amau ka gawt phat leh, zia zosia chu Moab chung ah tunsak ding ka hi, Lalpa‘n a tii.

⁴⁵ Heshbon dailîm nuai ah chun, gâljam ah taite sawlsam in a chawl tau a; Heshbon ah kipat in mei a hung kuangdok in, Sihon In ah kipat meikuang a diangdok ta’n a; zia chun do lungpu zing Moab mipite gamgi leh, mualvum zosia chu a kâng tum tai.

⁴⁶ Aw Moab, la chung a gik na e! A chapateu leh a chanuteu sal ah pui mang ahi tâk ziak un, Khemosh mipite chu a mangthai tau hi.

⁴⁷ Ahi’n la, ni nunung lam tak leh, Moab vangphatna tungding kit ding ka hi, Lalpa‘n a tii.