JEREMIAH 46 - PATHIAN LEKHABU THIANGTHO (BSI)

Aigupta Chung ah Gawtna

¹ Nam tinte chung thu ah Lalpa‘n jawlnei Jeremiah kiang in thu a hun gen a.

² Aigupta chungchâng, Josiah chapa Lengpa Jehoiakim, Judai gam ah a lal kum li na’n, Euphrates lui pang ah Karkhemish khua Babulon Lengpa Nebukadrezar in, Aigupta Lengpa Pharaoh Neko sepaite a zaw’na chungchâng ah a thugen chu:

³ Gâlvan leh phaw siam unla, kido’na mun chu nai un!

⁴ Sakol vanpuakna tua unla, a chung ah chuang un! Thik lukhuk khuk in, la panmun chiat uh lua unla, la cheichau tât-hiam unla, thik awmphaw’n kivan un!

⁵ Bang ding ah amau lauthawng ah hun mu ka hem? A kinungchawn tau a; a gâl hangsanteu tawden a hitau a, kin-gang tak in a taichek zo tau hi. Nung lam en talo in, tizatna’n a tuamchak zo tai, Lalpa‘n a tii.

⁶ A chan-gangpa a jam man pua’n, gâl hangsan le a suakcha diak puai; mallam Euphrates luikam ah chun, a kipalpai gam tau hi.

⁷ Nail luipi gual ah hung khang ah, a luikam hung dimlêt gual ah lian hi kua ahi tam?

⁸ Aigupta chu Nail luipi gual in a hung khang in, a luikam dimlêt gual in a hung lian hi. Amau chun, Hung kipan ing ka tin, khawvel hi chûm suak ing ka tin, khawpite leh a sung ah chêngte chu, susia dik dek ing ka, a tii.

⁹ Aw sakolte haw, ma lam zuan un; aw kângtalaite haw, baw zui un! Gâl hangsante chu kuandaw sak unla, Ethiopia tawh Putte chun phaw a chawi un, Ludte’n thalpi a chawi ui.

¹⁰ Zia ni chu Lalpa Sepai honte Pathian ni guat chu ahi, phuba lâk ni ahi’n, a mêlmate a soisak ni chu ahi. A chemjam in that gam intin, a du-khop tak in a thisan uh dawn ta’n a. Mal gam ah Euphrates lui pang ah, Sepai honte Lalpa Pathian in, kithoina a siam ta’ngâl a.

¹¹ Aw, nungak thiangtho Aigupta chanu, Gilead ah chia to inla, thingnâi damdawi vala’n. Damdawi tam tak la mang ta na’n a phachuam pua’n, nang â ding ah damna a um puai.

¹² La mualpho’na chu namtin in a hiau ah, la kâ thawm in khawvel pumpi a thawng hi; gâlhangsan tawh gâl hangsan a kibawtuau a, a paniu in a pûk khawm tau hi.

Babulon in Aigupta Do Ding ahi

¹³ Aigupta gam do ding ah Babulon Lengpa Nebukadrezar a hung kuan ding thu, Lalpa‘n jawlnei Jeremiah kiang in zia gual hin a la gen a.

¹⁴ Aigupta gam ah vagenjak unla, Migdol, Memphis leh Tahpanhes khuate ah hin, vapuang jak tau in; a kiang un, “La panmun uh luau inla, kigingsa’n um un, la kîmvêl ua umte chu, chemjam in hun that gam ding ahi ngâl un,” tiu in.

¹⁵ Bang ding ah la pathian uh Apis jamsia a hem? Bang ding ah la bawngchal pathian uh, pang zo talo a hem? Lalpa‘n a vok pâi ziak ahi.

¹⁶ La sepaite kipal pâi in a pûktha zo tau ah, pakhat in a dang khat kiang in, “Hung in, I piannau gam ah, I mipite lak lam ah chia kit tai tiu, mêlmate a hat ta luau hi,” a tiu a.

¹⁷ Aigupta Lengpa Pharaoh chu a min dingin, “Mi husia, A Hun pha Mangkhialpa,” ti’n ko un.

¹⁸ Lengpa, a min Sepai honte Lalpa chun, kihaksial hial in, Tângte lak ah Tabor gual leh, tuisuagiat pâm ah Karmel gual in, mi pakhat hung kuan ding ahi.

¹⁹ Nang Aigupta chanu, venbit ah um, sal ah pui mang ah um dingin, la van siamtup ta’n. Memphis khua chu a hawm ngawn hung hi’ntin, a sesa leh a sung ah chêng umlo a, nutsia hiding ahi ngâl a.

²⁰ Aigupta chu bawnglâ, mêlpha tak gual ahi’n, mallam ah kipat in a ne ding, sialchip in a hun baw hi.

²¹ A sepai hat gawiteu chule, a lak ua bawngchal thau tak a bang un; amaule pang ngam lo in, a kihei un, a tai mang zo tau hi; a siatna ding niu chu, a chung un a hung tung ta’n, amau gawtna hun chu ahi tai.

²² A gâlte chu thingphuk ding, heicha chawi gual ah amau do ding ah, a hung kuan ziak un, gûl gual in a kithol mang zo tau hi.

²³ A gam mang uh vâk lut theilona khop chu, hun vât nâm ding a hiu, Lalpa‘n a tii; amau chu khaubepi sâng ah tam zaw a hiziak un, simsên ding gual a hipuau hi.

²⁴ Aigupta chanu chu mualpho ding ahi; mallam ah kipat hung kuante khut ah, piakdaw ah um ding ahi.

²⁵ Sepai honte Lalpa, Israelte Pathian in, “Ngai in, Thebes-te pathian, Amon tawh Pharaoh; chuleh, Aigupta mipite leh a pathianteu, a lengteu leh Pharaoh leh ama muang zosia chu hun gawt ding ka hi.

²⁶ Amau thalup ding ah hawl zing, Babulon Lengpa Nebukadrezar tawh, a sepai hotute khut in pedok ding ka hi. Zia nung tak chuleh, masanglai gual khan, Aigupta gam ah mite hung chêng kit in au, Lalpa‘n a tii,” ti’n a hun gen a.

Pathian in Israelte Hukdok Ding ahi

²⁷ “Himaleh, nang ka suak Jakob, bangma lau kin. Aw Israel, lungthuai diak kin; gamla tak ah chun hun hukdok in, la suan la pâkteu chu, a saltânnau gam ah kipat in, hukdok ding ka hi’ngâl a. Jakob chu hung kit intin, thamuang tak leh chawldam tak ah chêng in, kuama’n sulau thawng ta pua’n au.

²⁸ Nang, ka suakpa Jakob vang, bangma lau kin, ka hun umpi zing hi, Lalpa‘n a tii. A lak ua ka hun thejakna nam tinte chu, sutawp ing ka tin; nangma chu vang hun sutawp pua’ng ka! A kigûn tawk bep in hun gawt ing ka tin, gawt lo in vang hun mawk koi pua’ng ka,” ti in.