JEREMIAH 44 - PATHIAN LEKHABU THIANGTHO (BSI)

Milim Ho A Demna

¹ Aigupta gam ah Judah mite, Mizpah khua, Tahpanhes khua, Memphis khua leh Pathros gam ah chêng zosiate â ding ah Jeremiah kiang ah thu hung tung chu,

² sepai honte Lalpa, Israelte Pathian in zia gual hin a gen a: Jerusalem leh Judai gam ah khawpi zosia chung ah, siatna ka tunsak zosia hi la mu suak kêi un. Vak en ma tiam un; tu’ni hin nutsia ah um in, kuama a chêng ta puau hi;

³ a chêngte’n thil phalo bawl ah ei la suklungnat ziak un. Amau chun pathian dang, a pu leh pateu, nangmau leh amau ziang inle a la ho khâk ngailoteu chu ho in, a kiang ah kithoinate a la lân tau a.

⁴ A Chutisapi’nle, ka suakte, jawlneite chu gunchu tak ah, “Ka thil ki’dak ma ma, ka huat takte chu bawl lo dingin ka don la hiu!” ti gen dingin ka hun sawl ta’n.

⁵ Himaleh, a pathian dangteu kiang ah kithoina lân talo ding leh, a nunsiatnau haisan ding ah ka dotna ei ngaisak lo ah, a bil unle a ngai nuam puau a.

⁶ Ziaziakchun, ka lungnatna leh hachangthakna chu, Judai gam ah khawpite leh Jerusalem kotzingte ah chun butthâk in a hung um tai; tu’ni tiang ah nutsia leh a hawm in a hung um khawlaw tau a hi.

⁷ Tu’hin chu, sepai honte Lalpa Pathian, Israelte Pathian chun zia gual hin a gen hi: Bang ding ah numei, pawsal, naupang leh nausen kidang lo ah Judai gam ah paithâk ah um ding leh a them a nênle nutsia ah umlo ding khop ah la chung ua zia gual thil phalo tak hi kibawl ahi tam?

⁸ La vachênnau Aigupta gam ah pathian dangte kiang ah kithoina lân ah, bang ding ah la khut nasepteu ma ma ah ka lungnatna choktho la hiu em? Khawvel namtin lak ah hânsia law leh gensiat ah um dingin hun paitha ma ma ding ka hi em?

⁹ Judai gam leh Jerusalem kotzingte ah, la pu leh pateu, Judai gam ah lengte leh a jiteu, nanghaw leh la jiteu in tual la tha’nateu haw kha hemil zo la hitau em?

¹⁰ Tu’ni tiang hin kisik limle pu lo leh lau mêl him himle la pu nai puau ah; chuleh, la pu leh pateu leh nanghaw âng ah ka dan thu leh ka thuguatte la zui nai diak puau hi.

¹¹ Ziaziakchun, sepai honte Lalpa, Israelte Pathian chun zia gual hin a gen hi: Judai gam pumpi tawpna ding leh la chung ua siatna huaisia tak tunsak ding ka gaw ta ahi.

¹² Judai gam ah nutsia ah umsun te lak ah, Aigupta gam ah chia suk ah, vachên den gawte chu man ing ka tin, a leng un mangthai in au; Aigupta gam ah chun thi’n tiu in, chemjam leh kial in thigam in au; a lian pen ah kipat a neu pen tiang in, chemjam leh kial ah thigam intiu in; tichun, mite chilsek khum leh tizat, hânsia law khum leh nuizatbûk hita’n au.

¹³ Jerusalem ah umte chemjam tawh, kialna tawh natpi’ ka gawt gual in, Aigupta gam ah chêngte chule gawt tho tho ding ka hi;

¹⁴ tichun, Judai gam ah nutsia ah um sun, Aigupta gam ah chêng ding ah chiate lak ah, suakcha leh hing nalai, Judai gam ah kile’kit ding khat chale um pua’n au. Chia kit ah vachên kit ding lung gul ma maleule, gâl lâk ah suakcha neukhatte beplo ngâl chu chia kit ta pua’n au, ti’n a gen tai.

¹⁵ Chun, a jiteu in pathian dangte kiang in thilpiak a bawl ui ti he zosia leh, a kiang ua ding numei zosia tawh, Aigupta gam ah Pathros mun ah chêng zosia chun Jeremiah a dawnhuu a:

¹⁶ “Lalpa min ah ka kiang ua la thu gen chu, ngaisak naisai pua’ng kau.

¹⁷ Zia malak ah chun, kei haw tawh ka pu leh pateu, ka lengteu leh ka milian leh lalteu in, Judai gam ah khawpi leh Jerusalem kotzingte ah ka la hisek gual uh khan, van lengnu kiang ah thil piak leh uain latna ka kitiam dungzui un bawl ding ka hiu. Nêk leh châk ah buting leh lamzang tak ah um in, vangsiatna ka tuak kha puau hi.

¹⁸ Himaleh, van lengnu kiang ah kithoina leh uain ka lat lo un, bangkim in tâksap lam manaw in, chemjam leh kial in ka thi zo tau hi,” ti’n a dawnhu tau a.

¹⁹ Chuleh, numeite chun, “Van lengnu kiang ah kithoina leh uain latna chu bawl zing ing kau; ka pawsalteu pang lo ah van lengnu vaithum ding ka bawl ua, a lim ka chuansak ua, uain a kiang ah ka lat sek uh hiding ah la ngaitua a hem?” ti’n a dawnhuu a.

²⁰ Ziaphatchun, Jeremiah in zia gual ah hun dawnhu mipi zosia, pawsalte leh numeite kiang ah chun,

²¹ “Judai gam ah khawpite leh Jerusalem kotzingte ah, nang uh leh la pu leh pateu, la lengteu leh la milian leh lalteu; chuleh, gam sung ah mipi zosia’n kithoina la la latteu kha, Lalpa‘n hezing lo a hita’m? A ngaituana’le lut lo him him ahi em?

²² La thil phalo bawl uh leh, la thil ki’dak um bawlteu hi, Lalpa‘n a en pei ta puai; ziaziakchun, la gam uh chu nutsia ah um leh a hawm, a chêng um talo ah tu’ni tiang ah um khawlaw a hita hi.

²³ La gimtui hâl ziak un, Lalpa chung ah la gilo tau in, Lalpa thu mang lo ah, a dan leh thuguatte leh a thupuknate la zop lo ziak un, tu’ni la tuak gual uh haksatnate hi a hung tung zaw ta ahi,” ti’n a gen a.

²⁴ Chun, Jeremiah in mipi zosia leh numei zosiate kiang ah chun, “Lalpa thu hi ngai tiam un, nanghaw Aigupta gam ah Judah mite haw.

²⁵ Sepai honte Lalpa, Israelte Pathian chun zia gual hin a gen hi: ‘Van lengnu kiang ah thillat leh uain lân ding ah ka la kitiamnau mualsua ding ka hiu,’ kam ah la tiu chu, nanghaw tawh la jiteu in a tak tak in la mualsua ta mai ui. Bang hileh, la thutiam uh chu mualsuau inla, la thilpiak dingteu chule pia zing tau in!

²⁶ Ziaziakchun, nanghaw Aigupta gam ah Judah mi umte haw, Lalpa thu hi ngai tiam un: Ngai un, Lalpa chu ama min ah kihaksial in, Aigupta gam ah chêng Judah mite chun, ‘Lalpa Pathian min in,’ ti in ka min hi sua kit him him ta pua’n au, Lalpa‘n a tii.

²⁷ A phatna ding uh hilo, a siatna ding un amau chu chânggu zing ding ka hi; Aigupta gam ah Judah mite zosia chu, pakhat chale hawi lo in, chemjam leh kial in that gam sik sek ding ka hi.

²⁸ Chemjam ah kipat suakcha sunte chu, Aigupta gam ah kipat in Judah gam ah tawmcha hung kit in au; Judah mi nutsia ah um sun, Aigupta gam ah chêng ding ah hungte chun, kei thugen a hem, amau thugen guitung zaw a hem ti hechian ta’n au.

²⁹ Zia mun ah hin hun gawt ing ka tin, la chung ua thil phalo hung tung ding ka gensa zosia hi, hung guitung tei tei ding ahi, ti la hiattheina ding un, zia hi nanghaw â ding ah tepte’na hi’n ah, Lalpa‘n a tii.

³⁰ Judai gam ah Lengpa Zedekiah, a hinna hawl zing a gâlpa, Babulon Lengpa Nebukadrezar khut ah ka piakdaw gual in, Aigupta Lengpa Pharaoh Hophra chule, ama tha gua a gâlte khut in pedok ding ka hi, Lalpa‘n a tii,” ti’n a gen tai.