JEREMIAH 40 - PATHIAN LEKHABU THIANGTHO (BSI)

Jeremiah Tawh Gamawptu Gedaliah Chu

¹ Sepai hotulian Nebuzaradan in Ramah khua Jekoniah a thâdaw nung in, Jeremiah kiang in Lalpa‘n thu a hun gen a: Babulon lam ah saltâng ding ah Jerusalem khua leh Judai gam ah salmat zosia kha tawh, thikkhau ah hên in a pui khawm a.

² Sepai hotulian chun Jeremiah a pui ah, a kiang in: “Lalpa la Pathian un zia mun ah siatna hi a tunsak ahi;

³ Lalpa thu mang lo ah, a chung ah thil la la bawl khial tâk ziak un, a la gendawsa gual ngei in Lalpa‘n zia gual hi a hun tunsak a hita hi. Ziaziak tak ah chu la chung ua zia gual thil hi hung tung ahi tai.

⁴ Tu’hin, en tiam in, tu’ni hin la khut ah thikkhau chu tham in, ka hun thâdok la hi tai. Babulon ah ka kiang ah la hung nop leh hung ziang inla, pha tak in hun enkol ziang ing ka; ahi’n la, Babulon ah ka kiang ah la hung nop lo chun, la hung tei tei a ngai diak puai. En in, gam pumpi hi la nopna lam lam la têl thei hi; pha la sakna lam lam ah chia mai in.

⁵ Gen ding pen le helo ah la um leh la, Shaphan tupa Ahikam chapa, Gedaliah kiang ah chia kit mai in; ama chu Babulon lengpa’n, Judai gam ah khawpi zosia awptu ding ah a guat a hita’n; tichun, mipite lak ah a kiang in vaum mai in; Ahiloleh, pha la sakna lam lam zuan mai in,” a ti tai. Tichun, sepai hotu lian chun a nêk ding leh thilpiak a piak zaw phatin, a nopna lam lam zuan dingin a koi tai.

⁶ Ziaphatchun, Jeremiah chu Mizpah khua Ahikam chapa Gedaliah kiang in a chia ah; a gam ah mipi nutsia ah umte lak ah chun a vachêng tai.

⁷ Chun, gamlak ah sepai hotuliante leh a sepai zosiau in Babulon lengpa’n, Ahikam chapa Gedaliah chu a gam pumpi vaihawmtu dingin a guat ah, Babulon lam ah sal ah pui mang ah umlo, michagate, numei, pawsal leh chapang zosia chu a kolsak hi ti thu a het phat un;

⁸ Mizpah khua Gedaliah kiang in a chiau a, Nethaniah chapa Ishmael, Kareah chapa Johanan, Tanhumeth chapa Seraiah, Netophath mi Ephai chate leh Maakath chapa Jezaniah tawh a sepai zosiau le a hiu a.

⁹ Shaphan chapa Ahikam chapa, Gedaliah chun amau leh a sepaiteu kiang ah chun kihaksial hial in: “Kaldaite nuai ah lut khâk ziang ding chu lau kiu in. Zia gam ah hin umzing in la tiu in, Babulon lengpa na sêm leu chin, nang uh â dingin pha mai ding a hi.

¹⁰ Kei ka hileh, Mizpah khua hin um ing ka tin, I kiang ua hung ding Kaldaite âng in la leng ua thasâng in a la pang ding ka hi; nang un vang uain leh nipithei ga leh sathaute kilak khawm in, la belteu ah kikoikhawm in, la khawpi lâknateu ah chun chêng ziang un,” ti’n a gen a.

¹¹ Zia gual ma chun, Juda mi Moab ah umte, Ammonte lak ah um zosia leh; gam dang ah um zosia leh lengpa’n Judai gam ah mi nutsia nei a hi ti leh, a chung ua vaihawmtu ding ah Shaphan chapa, Ahikam chapa Gedaliah a guat hi ti a hun het phat un;

¹² a kithejaknau gam tin ah kipat, Judate zosia chu Judai gam ah Mizpah mun a, Gedaliah kiang in a hung khawm tau ah; amau chun uain leh nipithei ga tam tak a hun pawkhawm tau a.

¹³ Zia lai tak ah chun, Kareah chapa Johanan tawh, gamlak ah um sepai zosia hotute chu Mizpah mun ah Gedaliah kiang in a hung un;

¹⁴ a kiang in, “Ammonte Lengpa Baalis in nangma that dingin Nethaniah chapa Ishmael hun sawl ahi ti la he em?” a vatiu a. Himaleh, Ahikam chapa Gedaliah in a thugen uh chu a taksang puai.

¹⁵ Ziaphatchun, Kareah chapa Johanan chun a gukcha’n, Mizpah khua chun Gedaliah kiang in, “Lungsiat in, kuama het lo dingin, Nethaniah chapa Ishmael vathat dingin ei chiasak in aw. Ama’n bang ding ah nang hun that in, la kîm leh kiang ah Juda mi kikhawmte hi the’chek ah um in, Judai gam ah nutsia ah um sunte hi hi’mangthai ah um mai ding a hiu em?” ti’n a vagen a.

¹⁶ Himaleh, Ahikam chapa Gedaliah chun, Kareah chapa Johanan kiang in, “Zia gual chun vabawl kin, Ishmael chung thu ah hin zuau la gen hi,” ti’n a dawnhu tai.