JEREMIAH 38 - PATHIAN LEKHABU THIANGTHO (BSI)

Jeremiah Suangkul Tânna

¹ Tu’hin, Mattan chapa Shephatiah, Pashhur chapa Gedaliah, Shelemiah chapa Jukal tawh Malkiah chapa Pashhur in, mipite zosia het ding ah Jeremiah thu gente chu a la hiau a:

² Lalpa‘n zia gual hin a gen hi: Kuale zia khawpi sung ah umden taphot chu, chemjam, kial leh natpi’n thi ding a hiu; ahi’n, kuale Kaldaite khut ah kipedok ziang tapo chu hing intin, a dam sung siau chu gâlhing mat gual ah um in, hing ding a hiu.

³ Lalpa‘n zia gual hin a gen hi: Zia khawpi hi Babulon lengpa khut ah piak in um intin, la ngei ngei ding ahi, a tii ti in.

⁴ Ziaphatchun, a milian leh lalte chun, lengpa kiang in, “Zia khawpi sung ah sepaite leh mipite zosia hilungthuai ding ah zia gual thu chu a gen ziakin, zia mipa hi thalup ding ahi. Zia mipa hin, mipite â ding ah thilpha hawl lo in, a siatna ding bep uh a hawl zaw ngâl a,” a ti tau a.

⁵ Lengpa Zedekiah chun, “Ama chu zia hin a um hilam, ama chu la khut ua um ahi; nanghaw kãl in lengpa’n bangma ka bawl thei puai,” ti’n a dawnhu a.

⁶ Tichun, Jeremiah chu a man ua, lengpa chapa Malkiah tuikul vêngtute huang sung ah chun, khauhual in Jeremiah chu a khai lut tau a. Zia tuikul sung ah chun tui umlo in, buanthuak ngen a la um nalai ah; Jeremiah chu buanthuak lak in a ketha suk tai.

Ebed-Melek in Jeremiah A Hukdawna

⁷ Lengpa In ngak Ethiopia mikiget, Ebed-melek in Jeremiah chu tuikul sung in a khelut ui ti a la hia’n. Lengpa chu Benjamin Kotpi a hung kitun lai tak in,

⁸ lengpa Insung ah kipat Ebed-melek hung taidok in, lengpa kiang in zia gual hin a hung gen a:

⁹ “He pu lengpa, zia mite hin jawlnei Jeremiah tuikul sung ah kial ah thi ding ah a khiak lut uh hi a dik puai, khawpi sung inle vaithum a um ta paw’ngâl a,” ti’n a vagen a.

¹⁰ Ziaphatchun, lengpa chun Ethiopia mipa Ebed-melek chu thu a pia, “Zia kipat hin mi pathum pui inla, Jeremiah chu a la thi’man, tuikul sung ah kipat in vakaidok un,” a tia.

¹¹ Tichun, Ebed-melek in mite chu a pui ah, lengpa In lam ah pui in, nîk leh puan koikhawmna pindan in a lut ua, zia tak ah puansia leh a ekte haw chu khauhual ah siam in, Jeremiah umna tuikul sung in a thun suk tau a.

¹² Ziaphatchun, Ethiopia mi, Ebed-melek chun Jeremiah kiang in, “Zia puansia leh a eksate hi la zak ah khit in,” a hun ti’n. Zia gual chun, Jeremiah inle a bawl ngâl a.

¹³ Tichun, khauhual ah chun Jeremiah chu tuikul sung ah kipat chun a khaidok tau a. Tichun, Jeremiah chu gâlvêngte huang sung ah chun a um den tai.

Zedekiah in Jeremiah A Dot Kitna

¹⁴ Lengpa Zedekiah in jawlnei Jeremiah chu a ko ah, Lalpa tempul lutna pathumna chun a valamtua a. Jeremiah kiang in lengpa chun, “Thil pakhat ka hun dot ding a um in, ka kiang ah bangma îmgu kin aw,” a tia.

¹⁵ Zedekiah kiang in Jeremiah chun, “Hun hil leng ei that lo ding la hia hem? Chuleh, hun hil malengle ei ngaisak diak lo ding la hi’ngâl a,” ti’n a dawnhu a.

¹⁶ Tichun, Lengpa Zedekiah chun a gûk in Jeremiah kiang ah kitiamna a nei ah, “Hinna ei pepa Lalpa min in ka kitiam hi. Hun that pua’ng ka tin, a hun thalup gawte khut inle hun pedok diak pua’ng ka,” a ti tai.

¹⁷ Ziaphatchun, Jeremiah in Zedekiah kiang ah chun, “Lalpa, sepai honte Pathian leh Israelte Pathian chun zia gual hin a gen hi: Babulon lengpa milian leh lalte mai ah la kipiak lut leh la hinna hukhin hi’ntin, zia khawpi hile mei ah hâl tum hipua’n tin, nang leh la Inkuan mite chu hing in lau.

¹⁸ Himaleh, Babulon lengpa milian leh lalte nuai ah la kipiak lut nop lo chun, zia khawpi hi Kaldaite khut ah piak lut hi’ntin, mei ah hâl tum in, nangma ngei le a khut ua kipat in suakcha him him pua’n la, ti’n a gen hi,” a tia.

¹⁹ Lengpa Zedekiah chun Jeremiah kiang in, “Kaldai mite kiang ah lutsa Judah mite chu ka lau hi; amau khut ah ei pedok ah, ei suasal kha’n au ti ka lau hi,” a ti’n.

²⁰ Jeremiah in, Zia gual chun hun bawl pua’n au, la kiang ah Lalpa thu ka gen hi ngai mai in; chutileh, nang â dingin pha’n tin, chuleh, la hinna le humbit hiding ahi.

²¹ Himaleh, a nuai ah kituklut la nop lo leh vang, la chung ah tung ding Lalpa‘n zia gual hi ei musak ahi;

²² Judah lengpa In sung ah numei kinusia, Babulon lengpa milian leh lalte’n a puidok lai tak ua zia gual ah gente hi ei musak ahi: La ginchak ma ma, la gualte’n hun thêm tha’n, a hun zawthaw bawl tau hi; tu’hin, la kengte chu buanthuak lak in a tâng ta’n, a hun nusia zo tau hi, a tiu hi.

²³ La jiteu leh la chateu zosia chu Kaldaite kiang ah kaidok intiu in, nangmale a khut ua kipat in suakcha pua’n la tin, Babulon lengpa’n hun man in a; chuleh, zia khawpi hile hâl tum hi’n ah, ti’n a gen a.

²⁴ Ziaphatchun, Zedekiah in Jeremiah kiang in, “Zia I kiholimna hi kuama dang kiang ah la gendaw lo ding ahi; achutiloleh, thi ding la hi;

²⁵ milian leh lalte hin la kiang ah ka thugente hi heleu, la kiang ah hung intiu in, ‘Lengpa kiang ah la thu gen chu kei uh le ei hil un, ka kiang ua bangma îm kin; achutiloleh, hun that mai ding ka hiu. La kiang ah lengpa chun bang a gen him him em?’ ti’n au.

²⁶ Zia gual ah chu a hun ti phat ua leh, a kiang un, ‘A thi den ding bep in Jonathan In ah ei sawl kit ta kiu in, ti don ah lengpa kiang ah chia ka hi,’ ti’n dawnhu in,” ti’n a hil a.

²⁷ Milian leh lal zosia chu Jeremiah kiang ah hung in, a hung dong ta ngei ua; himaleh, lengpa’n a hil gual tak in a la dawnhu chiat tai. Tichun, kuama’n bangma a dong nuam kit ta puau hi. Kuama a kiholimnau hegu le a um paw’ngâl a.

²⁸ Tichun, Jerusalem a pûk masang sia vêngtute huang sung ah chun Jeremiah chu a um den tai.