JEREMIAH 37 - PATHIAN LEKHABU THIANGTHO (BSI)

Zedekiah Kinepna Lawsam

¹ Babulon Lengpa Nebukadrezar in Josiah chapa Zedekiah chu, Jehoiakim chapa Koniah thasâng ah Judai gam ah leng in a pansak a.

² Himaleh, ama hi’n, a suakte hi’n, a gam sung ah mipite hileu, jawlnei Jeremiah kam ah Lalpa‘n thu a hun gente ngaisak a um puau hi.

³ Lengpa Zedekiah chu Shelemiah chapa Jehukal tawh, Maaseiah chapa Zephaniah thiampu chu jawlnei Jeremiah kiang ah, “Lungsiat in Lalpa I Pathian kiang un ei pauchap piak in,” ti’n a vadotsak hi.

⁴ Zia hun ah chun, Jeremiah chu suangkul ah khum nailo a hiziak un, mipi lak in a vak tawl tawl nalai hi.

⁵ Zia hun a chun, Pharaoh sepaite chu Aigupta gam ah kipat in a hung pawt tau a; Kaldaite Jerusalem bulu pêt chun, zia thu chu a het phat un, Jerusalem khua chu a nusia tau hi.

⁶ Ziaphatchun, Lalpa‘n jawlnei Jeremiah kiang in thu a hun gen a:

⁷ Israelte Pathian, Lalpa chun zia gual hin a gen hi: Judah lengpa, kei ei dong ding ah nang uh teni hun sawlpa kiang in, nanghaw panpi ding a hung kuan Pharaoh sepaite hi a gam lam uh, Aigupta lam ah kile’kit ngâl ding a hiu.

⁸ Chun, Kaldaite chu hung kile’kit in, zia khawpi hi do in, hun la ngâl in, mei in hâl tum ngâl in au.

⁹ Lalpa‘n zia gual hin a gen hi: “Kaldaite’n ei nusia ngei ngei ding a hiu,” ti’n kithêm kiu in; amau chu chia mang lo hial ding a hiu.

¹⁰ Nanghaw hung do Kaldai sepaite zosia chu zo in, puanbûk ngak a liamte bep chu um maleule, hung kipan kit in zia khawpi hi hun hâl tum zo tho tho ding a hiu ti’n gen un, a ti tai.

Jeremiah Suangkul Lutna

¹¹ Pharaoh sepaite lau ziak ah Kaldai sepaite’n Jerusalem a nutsia phat un,

¹² Jeremiah chu Jerusalem a kipat in Benjaminte gam lam ah, mipi lak ah ama gochan ding la dingin a vachia a.

¹³ Ama chu Benjaminte Kotpi a tun phatin huang sung ngak Hananiah tupa, Shelemiah chapa Irijah chun jawlnei Jeremiah chu a la man ah, a kiang in, “Nang hi Kaldaite lam ah zam mang ding la hi,” ti’n a la man ta mai a.

¹⁴ Jeremiah in a kiang in, “Zuau thu ahi chu; kei Kaldai mite kiang lam in ka jam puai,” ti’n a dawnhu a. Himaleh, Irijah chun a ngaisak pua’n, Jeremiah chu a man tei tei ah, milian leh lalte kiang in a pui tai.

¹⁵ Milian leh lalte chu Jeremiah chung in a lungna ma mau ah, a vuau ah, lekha zikpa Jonathan In suangkul ah chun a khum tau ah; zia tak chu suangkul ding ah siam ahi him a.

¹⁶ Tichun, Jeremiah chu In nuai lam tuikul ding ah kicho khuk sung a chun sawt tak a khum tau a.

¹⁷ Ziaphatchun, Lengpa Zedekiah in a ko ah, pha tak in a la lop a. Lengpa chun a In sung ah a guk in a kiholimpi ah, a kiang in, Lalpa‘n bang a gen mawng mawng em ti’n a dong a. Jeremiah in, Lalpa‘n thu a gen hi! Nangma hi Babulon lengpa khut ah piakdaw hiding la hi, ti’n a dawnhu a.

¹⁸ Chuleh, Jeremiah in Lengpa Zedekiah kiang in zia gual hin a gen nalai a: “Nangma tawh, la suakte tawh, zia mipite chung ah hin bang ka bawlkhial ah, suangkul ah lei khum a hem?

¹⁹ Babulon lengpa chu nang do ding leh, zia gam hi do dingin hung talojen in a, ti sek, la jawlneite chu khoi ah um zo a hitau em?

²⁰ Tu’hin, lengpa ka Lalpa, lungsiat in ka thu gen hi ngai in; ka dotna hi lungsiat in ei ngaithâk piak inla, lekhazikpa Jonathan In ah thi den ding bep in ei sawl lut kit lo hial in,” ti in.

²¹ Tichun, Lengpa Zedekiah chun thu a pia; Jeremiah chu gâlvêngte huang sung in a khum tau a; khawpi sung ah vaithum a um sung sia chu nisi’n in vaithum tâng khat a pia zing tau hi; tichun, gâlvêngte huang sung ah chun a um den tai.