JEREMIAH 34 - PATHIAN LEKHABU THIANGTHO (BSI)

Saltânna Mun ah Zedekiah Thi’den Ding Thu Genlawkna

¹ Babulon Lengpa Nebukadrezar leh a sepai zosia chun, khawvel ah lenggam zosia leh, a lenggam sung ah mipi zosiate chun Jerusalem khua leh a khawpel zosia a do lai tak un, Lalpa‘n zia gual hin Jeremiah kiang in thu a hun gen a:

² Israelte Pathian, Lalpa chun zia gual hin a hun gen a: Chia in la, Judai gam ah Lengpa Zedekiah kiang in zia gual hin vagen in: Lalpa‘n zia gual hin a gen hi, vati’n: Zia khawpi hi Babulon lengpa khut ah pia ding ka hi, ama chun mei in hâl tum in a.

³ Nangmale a khut ah kipat in suakcha lo hial ding la hi; mat in um tei tei in la tin, a khut ah piakdaw in hung um inla; Babulon lengpa chu la mit ngei in mu’n la tin, ki-entua in holim ding la hiu; chuleh, Babulon lam ah chia ding la hi.

⁴ Ahi’n la, aw Judai gam ah Lengpa Zedekiah, Lalpa thu hi ngai nalai tiam in! Nangma chungchâng ah Lalpa‘n zia gual hin a gen hi: Chemjam in thi pua’n la tin;

⁵ thamuang tak in thi ding la hi. Nang masang ah leng a la hita te, la pu la pate â ding ah gimtui a la hâl sek gual un; zia gual ma chun, nang chung ah le gimtui hun hâl in, hun sûn intiu in, “A khawk na e, Lalpa!” hun ti ding ahiu. Zia gual chu hiding in thu ka la gen zawsa ahi tai, Lalpa‘n a tii.

⁶ Ziaphatchun, jawlnei Jeremiah chun, Jerusalem ah Judai gam ah Lengpa Zedekiah kiang in zia thu zosia chu a vagen ta’n;

⁷ zia hun chu Babulon lengpa sepaite’n Jerusalem leh Judai gam ah khawpi um nalai, Lakish tawh, Azekah do ding ah gâl a bawl lai tak uh ahi’n; zia khuate bep hi Judai gam sung ah kul nei khawpi det um sun chu ahi ta’ngâl a.

Suakte Chung ah A Nunsiatnau

⁸ Jerusalem ah mipi zosiate kiang ah zalensak ding thuthung, Lengpa Zedekiah in a bawl zaw phatin, Lalpa‘n Jeremiah kiang in thu a hun gen a;

⁹ mitin in numei hi’n, pawsal hileh, suak ah a vul uh Hebrai mi taphot chu a thâdaw chiat diu ahi; tichun, kuama’n a Juda nam chanpi lak ah mi suak in a vul thei lo ding ahi, ti in.

¹⁰ Chutichun, a leng un mi lian mi lal leh mipite zosia’n amau suakvul chiat uh numei hi’n, pawsal hitaleu, a thâdaw chiat theina ding ua kitiamna thuthung siam ah vapang zosia chun, zia thu chu a zui chiat tau ah; tichun, kuama suak ah a pan kit tâk lo’na ding un, thu chu mang in a leng un a thâdok suak tau hi.

¹¹ Himaleh, a vainung in a hung kisik phut un, tichun, numei hi’n, pawsal hileh a thâdawsau zosia chu a man kit tau ah; a leng ua man kit in, a suak ua um dingin a tawden kit zo tau hi.

¹² Lalpa‘n Jeremiah kiang ah thu hun gen in, zia gual hin Lalpa‘n a hun gen ta’n:

¹³ Israelte Pathian, Lalpa chun zia gual hin a gen a: Aigupta gam ah suak leh sal la tânnau ah kipat ka hun puidaw ah khan, la pu leh pateu kiang in zia gual ah hin gen in, thuthung ka la siam tai:

¹⁴ “Mitin in, a chipi Hebrai mi a kiang ah hung kizuaksa, la nasêm ua kum guk sung a pan nung un, a kum sagi’na sî’n leh la thâdaw sek ding uh ahi; la nau a sepnau ah kipat in la thâdaw tei tei diu ahi,” ti in. Himaleh, la pu leh pateu in ka gen a ngai puau ah, ka thugen chule a ngaitha puau hi.

¹⁵ Tu’naicha khan nang un la thilbawl dan uh kisik in, ka mit mu ah thilpha bawl in, mi tin thâdaw’na ding thu la puang tau a; chuleh, ka min ah ko ah umte In sung ah kipat in, ka kiang ah thuthung la la siam tau a;

¹⁶ himaleh, kin tak in la kihei kit un, mi tin in la suak numei leh pawsalteu a duthusam gual ua la thâdaw nung un, la suak ua um kit ding ah chuanden kit in, mitin in ka min chu la subuak kit tau ahi.

¹⁷ Ziaziakchun, Lalpa‘n zia gual hin a gen hi: Kuama’n a Invêngteu leh a gualteu thâdok ding ka ti gual in la zawm puau ah; nanghaw chung ah chemjam, natpi leh kial hung tung dingin ka thâdok tai, Lalpa‘n a tii. Khawvel lenggam zosia’n a tizat ding uh la chung un hun tunsak ding ka hi.

¹⁸ Chuleh, ka thuthung botsia, ka kiang ah a thuthung siam uh zui lo chu, bawngno kihâpsat ah a kikâl ah mi chia suk chia to theina gual in siam ing ka tin;

¹⁹ bawngno kihâpsat kikâl ah chiatua Judai gam ah mi lian leh lalte, Jerusalem khua mi lian leh lalte, mi tilgete, thiampute leh mipi zosiate chu,

²⁰ a gâlteu leh amau thalup gawte khut in pedok ding ka hi. A luang uh chu chunglêng vachate leh lei chung ah gam sate an ding hung hita’n a.

²¹ Chuleh, Judai gam ah Lengpa Hezekiah tawh a mi lian leh lalte chu vang, a gâlteu, amau tha gua hawl, Babulon lengpa sepai kinung juk kittate khut in pedok ding ka hi.

²² Amau chu thu pia’ng ka tin, zia khawpi do ding hin hun le’pui kit ing ka, Lalpa‘n a tii; tichun, zia khawpi chu hun do zo in, mei in hâl tum ta’n au. Judai gam ah khawpi zosia chu a chêng umlo ah a hawm ah koi ding ka hi, a tia.