JEREMIAH 32 - PATHIAN LEKHABU THIANGTHO (BSI)

Jeremiah in Mun A Chawkna Thu

¹ Judai gam ah lengpa Zedekiah a lal kum sawm a ti’n in, zia chu Nebukadrezar lal kum sawm leh giat tin kum ah chun, Jeremiah kiang ah Lalpa‘n thu a hun gen a:

² Zia hun ah chun Babulon lengpa sepaite chun Jerusalem khua a ûm ua, jawlnei Jeremiah chu Judai gam ah lengpa In huang sung suangkul ah a tân lai tak ahi’n;

³ zia tak ah chu Judai gam ah Lengpa Zedekiah in a la khum ahi. Zedekiah chun, “Bangatia nang in: Zia khawpi hi Babulon lengpa khut ah pia ding ka hi’n, ama’n la ding ahi;

⁴ Judai gam ah Lengpa Zedekiah chule, Kaldaite khut ah kipat suakcha pua’n tin, Babulon lengpa khut ah piak in um in a; tichun, kimai tua ah kiho in, a mit ngei in mu ding ahi;

⁵ Kaldaite chu do maleu chinle, zo pua’n la tiu in; tichun, Zedekiah chule Babulon ah pui tung intin, ka hung kanthâk kit masang sia um den ta’n a, Lalpa‘n a tii, ti ah bang ding ah la gen a hem?” a ti’n.

⁶ Jeremiah in a dawnhu a, “Lalpa‘n ka kiang in zia gual hin a hun gen hi:

⁷ La pa neu Shallum chapa, Hananiah chu la kiang ah zia gual thu hung gen ding hin hung ding ahi: Anathoth ah ka lou mun kha kichawk in, a tatdaw kitna ding ah thuneina chu nang â ahi ngal a,” ti in.

⁸ Zia gual chun ka paneu chapa, Hanamel chu Lalpa gen gual in suangkul huang sung ah chun a hung a, zia gual hin a hung gen a: “Benjamin gam ah Anathoth khua ka lou mun kha kichawk inla, a neitu hi’na leh a tatdawna thuneina chu nang â ahi ngal a; nang â dingin kichawk ta’n,” a hung ti’n. Tichun, Lalpa gen ahi ti ka he tai.

⁹ Tichun, Anathoth khua ka paneu chapa Hanamel lou mun chu ka kichawk ta’n, a man dingin dangka shekel sawm leh sagi ka têdaw piak tai.

¹⁰ Kichawkna lekha ka min zik zo in, ka namdet ah, a hetpi dingle ka siam ah; tichun, a man ding paisa chu bûkna’n ka têdaw piak tai.

¹¹ Ziaphatchun, kichawkna lekha tawh, a dan leh mualte tawh kichâl khum chu ka kilâk ah, a kichâl khum lo ah um chule ka la ta’n;

¹² chuleh, ka paneu chapa Hanamel tawh, kichawkna lekha min zik ah hiatpitute tawh, lengpa vaihawmna huang sung ah chun zia kichawkna lekha chu Mahseiah chapa Neriah chapa Barukh khut ah chun ka pedok tai.

¹³ A leng ua het in Barukh kiang in zia gual hin thu ka pia’n:

¹⁴ Sepai honte Lalpa, Israelte Pathian in zia gual hin a gen hi, ti in: Zia kichawktuana tepte’na lekha kichâl khum hi tawh, a kihongsa hi kilâk inla, sawt tak a umtheina dingin lei bêl sung khat ah koitup in.

¹⁵ Sepai honte Lalpa, Israelte Pathian in zia gual hin a gen ngal a: Zia gam ah hin Inte, loute leh grep huante chu kichawk tua kit hung hi’n a, ti in.

Jeremiah in A Thu Kichetna Ding ah A Pauchapna

¹⁶ Neriah chapa Barukh kiang ah kichawkna lekha chu ka piak zaw phatin, zia gual hin Lalpa kiang in ka pauchap a:

¹⁷ Katei, Lalpa Pathian! La thilhitheina nasa tak leh, la khutbân jak ah lei leh vante siampa chu nang la hi! Nang â dingin thil haksa talua a um puai.

¹⁸ Khang sâng tam tak chung ah ja’ngaina la pia’n; himaleh, a pu leh pateu bawlkhialna a tu leh chateu pheichung ah phuba lasek chu nang la hi’n; aw Pathian lopi leh hat, la min chu sepai honte Lalpa ahi;

¹⁹ la lemguat dan a mak ah, la thilbawl dan a lopi hi; la mit chun mihingte tawidan zosia a mu suak ah, mi tin chu a tawidan dungzui leh a thilbawl uh tawh kigûn tak ah thuk zing sek la hi.

²⁰ Aigupta gam ah tepte’na leh, thilmak tam tak la la etsak ah; tu’ni tiang ah Israelte leh nam dang zosiate lak inle, tu’ni chan ah la min mang lo ah um dingin la bawl hi.

²¹ Nang in teptênate, thilmakte, khut hat tak leh bantha jak huaisia tak in la mipi Israelte chu Aigupta gam ah kipat in la la puidok ta’n;

²² a pu leh pateu kiang ah gampha, khuaizu leh bawngnawi luanna gam, piak ding ah la la tiamna, zia gam hi la la pia ta’n;

²³ tichun, a lut ua gam chu a lua tau hi. Himaleh, la thu mang lo in, la dan le zui talo in, a bawl ding ua la thupiak zosia chu a zui ta puau a. Ziaziakchun, zia gual ah siatnate hi a chung un la tunsak a hita hi.

²⁴ En in, khawpi lakna ding ah panmunte saw; Kaldaite khut ah um ding ah la gen gual in a hun do pan tau hi. Chemjamte, kialnate leh natpi’n khawpi sung chu a manaw ta’n, tu’hin la la gensa kha a chung un muthei dingin a hung guitung ta hilam.

²⁵ Himaleh, aw Lalpa Pathian, nang in khawpi chu Kaldaite khut ah la la piaksa hi tanapi inle, ka kiang ah, “Lou chu sum in chaw’n la, hiatpitutele nei in,” lei la ti nalai ah, ti in.

Mipite Kile’kit Ding Thu ah Pathian Thamuanna Chu

²⁶ Jeremiah kiang in Lalpa‘n thu a hun gen a:

²⁷ “Ngai in, keima Lalpa hi, mihing zosiate Pathian chu ka hi; kei â dingin a haksa talua bang a um em?” ti in.

²⁸ Ziaziakchun, Lalpa‘n zia gual hin a gen hi: Zia khawpi hi Kaldaite khut leh Babulon lengpa Nebukadrezar khut ah pia ding ka hiziak in, ama’n kilâk ding ahi.

²⁹ Zia khawpi do ah hung kuan Kaldaite chu hung lut in, Baal â ding ah kithoina latna In zosia leh, pathian dang kiang ah dawn chi sungtha ei sulungnate In zosia chu, mei ah hung hâl in, kâng tum in a.

³⁰ Israel mite leh Judai gam ah mipite chu, khangdawng ahi lai ua kipat ka mit mu ah thil phalo bawlte ngen a la hi’ngal un; Israel mipite chunle a khut un ka lungnatna ding ngen a bawl ta’ngal un, Lalpa‘n a tii.

³¹ Zia khawpi hi a kisak lim ah kipat tu’ni tiang hin, ka lungnatna leh thangtawmna a la choktho zing ahi;

³² ziaziakchun, Israel mipite leh Judai mipite zosia’n, ei sulungna ding ah a thil phalo bawlteu zosia ziakin, amau, a lengteu leh a milian leh lalteu, a thiamputeu leh a jawlneiteu, Judai gam ah mipite leh Jerusalem khua chêng zosia tawh a leng un ka mit mu ah kipat in sumangthai sik sek ding ka hi.

³³ A mai lam uh hilo in, a nung lam uh ei ngat zo tau a; gunchu tak in a la hil ta maleng, ngai nuam lo in, ka hilna a mang puau hi.

³⁴ Ka min chuanna In chu subuak dingin, a milimteu chu a tâkdok tau a.

³⁵ Hinnom chapa phâijawl ah chun, a chateu leh a chapateu Molekh kiang ah, mei ah lat ding ah a piakna ding un Baal thoimualte chu a tung ding tau a; zia chu ka thupiak le a hipua’n, ka lungthim ah le ka la gêl khâk lo, Judai gam ah mite thil phalo tak a la bawlsak guat ziak uh ahi.

³⁶ Ziaziakchun, tu’hin zia khawpi hi, “Babulon lengpa khut ah chemjam, kialpi leh natpi’ pûk lut ding ah piakdaw hung hiding ahi,” la ti chung châng thu ah, Lalpa, Israelte Pathian in zia gual hin a gen hi, ti’n la:

³⁷ En in, ka lungnatna leh ka hachangthakna, ka lung awi lo bêk ziak ah amau ka la nawdawna gam zosia ah kipat in hun pui khawm kit ing ka tin, zia mun hi hun tut kit in, bit tak in hun chênsak kit ding ka hi.

³⁸ Amau chu ka mite hung hi’n, keile a Pathian uh hung hita’ng ka.

³⁹ Amau leh a tu leh chateu tiang â ding ah thilpha a hitheina ding ah, kumkhua ei lau theina ding un, lungthim ngaituana leh tawidan kibang pia ding ka hi.

⁴⁰ Amau â ding ah thilpha bawl ding thul lo ah ka bawl piak zing theina dingin, a kiang un kumkhaw thuthung siam ding ka hi; keima ei nutsia kit lona ding un, a lungthim un kilausak ding ka hi tai.

⁴¹ Amau â ding ah thilpha bawl chu ka lung lam hita’n a; tichun, zia gam ah hin ka lungthim leh ngaituana zosia tawh, ginumna’n phudet ta’ng ka.

⁴² Lalpa‘n zia gual hin a gen ngal a: Zia mipite chung ah siatna zia zozaipi hi ka la tunsak gual gual hin, amau â ding ah thilpha ka la tiamsa zosia hile hun tunsak kit ding ka hi.

⁴³ “Zia gam, mi leh gamsa um lona gamthip hi Kaldaite khut ah piaksa a hi,” la ti’nau ah hin, loute hun chaw ding la hiu.

⁴⁴ Sumchang in loute hun chaw’n, kichawkna lekhate zik det ah châl bit in, hiatpitu dingte le siam ta’n au; Benjamin gam ah te, Jerusalem khua kiang vêl ah te, Judai khawpite, tâng gam khawpite, Shephelah ah khawpite leh Negeb ah khawpite ah chunle; mipite chu a gam un tungding kit ding ka hi tâk ziakin, Lalpa chun a ti a hi.