JEREMIAH 29 - PATHIAN LEKHABU THIANGTHO (BSI)

Babulon Saltângte Kiang ah Jeremiah Lekhathot

¹ Jawlnei Jeremiah in, Jerusalem khua kipat Nebukadnezar in Babulon lam ah sal ah a puite lak ah, a dam nalai sunte lak ah thiampute, jawlneite leh mipi zosiate kiang in, Jerusalem ah kipat in zia gual hin lekha a thot a.

² Zia hun chu, Lengpa Jekoniah leh lengnu, a vaihawmna miliante, Judah leh Jerusalem ah miliante, mi khutthiamte tawh thîk sek mite zosia’n, Jerusalem a nutsia nung ua thil tung ahi.

³ Judai gam ah Lengpa Zedekiah in, Babulon Lengpa Nebukadnezar kiang ah mi a sawlte, Shaphan chapa Elasah tawh, Hilkiah chapa Gemariah te khut ah Babulon lam ah a thot ahi. A lekha thot thu chu:

⁴ Sepai honte Lalpa, Israelte Pathian chun, Jerusalem ah kipat Babulon sal ah ka hun tân sakte zosia kiang in zia gual hin gen in:

⁵ Inte kisak un la chêng un; huan kibawl un la a ga piang taphot neu in.

⁶ Ji leh chate le nei unla, tu leh cha la neitheina ding un mo leh mâkpate nei un; kiam lo in pung tau in.

⁷ Sal ah la tânnau khawpi zosia a phatna ding ngaituau inla, a phatna ding un Lalpa kiang ah don un; amau phat theina chu nanghaw â ding ah le phat theina ahi ngal a.

⁸ Sepai honte Lalpa, Israelte Pathian in zia gual hin a gen ngal a: La lak ua jawlneite leh âisân thiamte chu kithepsak kiu inla, a mang matteu chule limsak kiu in;

⁹ ka min ah la kiang ua a thu genteu chule zuau thu ngen a hisek hi; amau chu ka sawl puai, Lalpa‘n a tii.

¹⁰ Lalpa‘n zia gual hin a gen hi: Babulon â ding ah huntiam kum sawmsagi a bei phat leh, hung kantha bep ing ka tin; zia phat chuleh, la kiang ua ka thutiam guitunsak in, zia mun ah hin hun pui tung kit ing ka.

¹¹ Nang uh â ding ah ka thil guanggal chu ka hechian ma ma ngal a; zia chu tu’nung ah la siatna ding uh hilo in, la phatna ding uh, a tung nai lo ah kinepna ahi, Lalpa‘n a tii.

¹² Ziaphat chuleh, lei ko ua, ka kiang ah la hung pauchap uh chun, hun ngaitha ding ka hi.

¹³ Lei hawl ua, la lunggil zosiau ah lei hawl uh chun, ei mu ngal ta’n lau;

¹⁴ hun kimusak ding ka hi, Lalpa‘n a tii; chuleh, vangphatna hun vuk ing ka tin, nam tinte leh gam tin ah sal ah ka hun nawmangna mun zosia ah kipat in, hun tungding kit in, hun pui khawm ing ka tin, la gam lam un hun pui tung kit ing ka, Lalpa‘n a tii.

¹⁵ Babulon gam ah hin Lalpa‘n ei uh â dingin jawlnei ei pia’i, la ti ziak un,

¹⁶ David lalchutpha kichupa leh, zia khawpi chêng zosiate leh la chanauteu la saltânnau ah hung panglote chung thu, Lalpa‘n zia gual hin a gen hi:

¹⁷ Sepai honte Lalpa chun zia gual hin a gen hi: A chung un chemjamte, kialnate leh natpite hun lênsak ing ka tin; tichun, theichang ga hût, a siat ma ma ziak ah nêk tâk lo gual hun hi’sak ding ka hi.

¹⁸ Chuleh, chemjamte, kialnate leh natpite hun delzui sak pek ing ka; tichun, ka nawmangna gam zosia ah chun, nam zosia leh lenggam zosiate tizat leh hânsiadongte etsakna, mi tizat, eulau leh musit hung hita’n au.

¹⁹ Ka thu a ngaikhawk lo ziak uh ahi, Lalpa‘n a ti’n; ka suak jawlneite a kiang un chatlak lo ah ka thu vagen ding ah ka sawlte thu gen a ngai lo ziak uh ahi, Lalpa‘n a tii.

²⁰ Tu’hin vang, nanghaw Jerusalem ah kipat Babulon ah saltâng ding ah ka sawlmangte haw, Lalpa thugen hi a la ngai tau in:

²¹ Sepai honte Lalpa, Israelte Pathian in, Kolaiah chapa Ahab tawh, Maaseiah chapa Zedekiah, ka min ah zuau thu la kiang ua hung gen teni chungchâng kha zia gual hin a gen hi: Amau teni hi Babulon Lengpa Nebukadnezar khut ah pedok ing ka tin, la mit mu ngei un that ding ahi.

²² A chung ua thil tung ziak tak ah chun, Judai gam ah kipat Babulon lam ah saltângte lak in, “Babulon lengpa chun Zedekiah tawh Ahab mei ah a em gual khan hun bawl ta hen,” ti hi hânsialaw’na paukam in hun mang ta’n au.

²³ Israel gam ah gitlona huaisia tak a la bawl tau in: a Invêngteu jite tawh a jawntat un; chuleh, ka thupiak lo in ka min in zuau thute a gen un; keima a umchan uh hepa leh a hiatpipa ka hi, Lalpa‘n a tii.

Shemaiah â Ding Lekha Thot Chu

²⁴ Chun, Nehelam ah um Shemaiah kiang in zia gual hin vagen in:

²⁵ Sepai honte Lalpa, Israelte Pathian chun zia gual hin a gen hi: Jerusalem ah mipi zosia, Maaseiah chapa thiampu Zephaniah leh thiampute zosia kiang in la min in lekha la la thot ah; a kiang un:

²⁶ Lalpa‘n thiampu Jehoiada thasâng dingin a hun siam ah, Lalpa In ah la um zing ah, mingol, jawlnei gual ah kisiamte chu thîkkol la bul ding ahi.

²⁷ Tu’hin, Anathoth khua kipat Jeremiah, la kiang ah jawlnei ah hung kigenpa kha bang ding ah vau lo la hem?

²⁸ Babulon gam ah ka kiang un, “Saltân sung chu sawt ding ahiziak in, Inte sa’n chêng muang un, grep huante bawl un la a gate chu neu in,” ti thu ei hun thot kha ama hih ahi ngal a, ti in.

²⁹ Thiampu Zephaniah in zia lekha thot chu jawlnei Jeremiah kiang in a hun sim a.

³⁰ Ziaphatchun, Jeremiah kiang in Lalpa‘n thu a hun gen a:

³¹ Saltângte zosia kiang in zia gual hin thot in: Nehelam ah um Shemaiah chungchâng thu Lalpa‘n zia gual hin a gen hi: Ka sawl lo pi’n Shemaiah in la kiang un thu a hung genlawk ah, zuau thu taksang ding ah a hung thep zaw ziakin,

³² Lalpa‘n zia gual hin a gen hi: Nehelam ah Shemaiah in Lalpa kãl ah thu a la gen ziakin, a suante chu gawt ding ka hi; ka mipite chung ah thilpha ka hun bawl phat leh, mipite lak ah pang ding suan leh pâk khat ziang le nei ta pua’n a, Lalpa‘n a tii, ti in.